Pravasiinfo

Qatar Refugee Support; ലോകമെമ്പാടുമുള്ള അഭയാർത്ഥികളുടെ സംരക്ഷണത്തിനും അവർക്ക് മെച്ചപ്പെട്ട ജീവിതസാഹചര്യങ്ങൾ ഒരുക്കുന്നതിനുമുള്ള പ്രവർത്തനങ്ങളിൽ ഖത്തർ തങ്ങളുടെ പ്രതിബദ്ധത വീണ്ടും ആവർത്തിച്ചു. ഖത്തർ ഫണ്ട് ഫോർ ഡെവലപ്‌മെന്റ്, യുഎൻ അഭയാർത്ഥി ഏജൻസി, ഹമദ് ബിൻ ഖലീഫ യൂണിവേഴ്‌സിറ്റിയിലെ കോളേജ് ഓഫ് ഇസ്‌ലാമിക് സ്റ്റഡീസ് എന്നിവയുടെ സംയുക്ത ആഭിമുഖ്യത്തിൽ ‘ടുഗെദർ ഫോർ റെഫ്യൂജീസ്’ എന്ന പേരിൽ പ്രത്യേക പരിപാടി സംഘടിപ്പിച്ചു. ലോക അഭയാർത്ഥി ദിനത്തോടനുബന്ധിച്ച് എഡ്യൂക്കേഷൻ സിറ്റിയിലെ മിനററ്റൈൻ സെന്ററിലായിരുന്നു ചടങ്ങ്. മാനുഷിക പ്രവർത്തനങ്ങളിലും മധ്യസ്ഥ ചർച്ചകളിലും ഖത്തർ വഹിക്കുന്ന സുപ്രധാന പങ്കിനെക്കുറിച്ച് മുൻ സുഡാൻ വിദേശകാര്യ മന്ത്രിയും എച്ച്ബികെയു പ്രൊഫസറുമായ ഡോ. മുസ്തഫ ഉസ്മാൻ ഇസ്മായിൽ അൽ അമീൻ ചടങ്ങിൽ സംസാരിച്ചു. അഭയാർത്ഥികളെ വെറും സഹായം സ്വീകരിക്കുന്നവരായി മാത്രം കാണാതെ, അവർക്ക് വിദ്യാഭ്യാസം, തൊഴിൽ പരിശീലനം, സാമ്പത്തിക അവസരങ്ങൾ എന്നിവ നൽകി സമൂഹത്തിലെ മികച്ച അംഗങ്ങളാക്കി മാറ്റണമെന്ന് അദ്ദേഹം പറഞ്ഞു. ഈ വർഷത്തെ അഭയാർത്ഥി ദിനം പുതിയ ഹിജ്‌റ വർഷത്തിന്റെ തുടക്കത്തോടൊപ്പമാണ് വന്നതെന്നത് ശ്രദ്ധേയമാണ്. ഹിജ്‌റ നൽകുന്ന സംരക്ഷണം, ഐക്യദാർഢ്യം, പ്രത്യാശ എന്നീ സന്ദേശങ്ങൾ അഭയാർത്ഥി സംരക്ഷണവുമായി ഏറെ ചേർന്നു നിൽക്കുന്നതാണെന്നും അദ്ദേഹം ഓർമ്മിപ്പിച്ചു. സർക്കാരുകൾ, സർവ്വകലാശാലകൾ, മാനുഷിക സംഘടനകൾ എന്നിവർ തമ്മിലുള്ള ഏകോപനം അഭയാർത്ഥികളുടെ ദുരിതം കുറയ്ക്കാൻ അത്യാവശ്യമാണെന്ന് പാനൽ ചർച്ചകൾ വിലയിരുത്തി. അഭയാർത്ഥികളുടെ അതിജീവനത്തിന്റെ കഥകൾ, വിവിധ പ്രായത്തിലുള്ളവർക്കായുള്ള പ്രവർത്തനങ്ങൾ, ഗഹനമായ ചർച്ചകൾ എന്നിവ പരിപാടിയുടെ ഭാഗമായി നടന്നു. മാനുഷിക നയതന്ത്രരംഗത്ത് ഖത്തർ ലോകത്തിന് ഒരു മാതൃകയാണെന്നും ഡോ. അൽ അമീൻ കൂട്ടിച്ചേർത്തു.