US Israel Strike on Iran; പശ്ചിമേഷ്യയെ വീണ്ടും വൻ യുദ്ധഭീതിയിലാഴ്ത്തി ഇറാന്റെ ആണവ-സൈനിക താവളങ്ങൾ ലക്ഷ്യമിട്ട് സംയുക്ത നീക്കത്തിനൊരുങ്ങി അമേരിക്കയും ഇസ്രയേലും. നവംബറിൽ നടക്കുന്ന അമേരിക്കൻ തെരഞ്ഞെടുപ്പിന് ശേഷം മേഖലയിൽ അതിശക്തമായ സൈനിക ആക്രമണത്തിന് സാധ്യതയുണ്ടെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ഇറാനെതിരായ മുന്നൊരുക്കത്തിന്റെ ഭാഗമായി ഇസ്രയേൽ വ്യോമസേന (IAF) പശ്ചിമേഷ്യൻ വ്യോമപാതയിൽ വൻ ട്രയൽ ഡ്രിൽ സംഘടിപ്പിച്ചതായി പ്രമുഖ മാധ്യമമായ ‘ആക്സിയോസ്’ വെളിപ്പെടുത്തി. ഡസൻ കണക്കിന് പോർവിമാനങ്ങളും ഇന്ധനം നിറയ്ക്കുന്ന ടാങ്കർ വിമാനങ്ങളും സിറിയൻ, ഇറാഖി വ്യോമപാതയിലൂടെ ഇറാന്റെ റഡാർ പരിധിക്ക് തൊട്ടടുത്തുവരെ എത്തിയാണ് മടങ്ങിയത്. ഇറാന്റെ വ്യോമ പ്രതിരോധ സംവിധാനങ്ങളെ പരീക്ഷിക്കാനും ഇസ്രയേലിലെ പാർലമെന്റ് (നെസ്സെറ്റ്) തെരഞ്ഞെടുപ്പിന് മുന്നോടിയായി ശക്തിപ്രകടനം നടത്താനുമാണ് ഈ അഭ്യാസം നടത്തിയതെന്നാണ് വിവരം. ഇറാന്റെ ആണവ നിലയങ്ങൾ, പ്രധാന ഊർജ്ജ അടിസ്ഥാന സൗകര്യങ്ങൾ, മിസൈൽ–ഡ്രോൺ നിർമ്മാണ ശാലകൾ എന്നിവ തകർക്കാനാണ് ഇസ്രയേലും യുഎസും പദ്ധതിയിട്ടിരിക്കുന്നതെന്ന് ‘ന്യൂയോർക്ക് ടൈംസ്’ റിപ്പോർട്ട് ചെയ്യുന്നു. തെരഞ്ഞെടുപ്പിന് മുൻപ് തന്നെ ആക്രമണം നടത്താൻ ഇസ്രയേൽ പ്രധാനമന്ത്രി ബെന്യാമിൻ നെതന്യാഹു ആഗ്രഹിച്ചിരുന്നെങ്കിലും, അമേരിക്കൻ തെരഞ്ഞെടുപ്പ് കഴിയുന്നത് വരെ കാത്തിരിക്കാൻ യുഎസ് നേതൃത്വം ആവശ്യപ്പെടുകയായിരുന്നുവെന്ന് ‘ഫിനാൻഷ്യൽ ടൈംസ്’ വ്യക്തമാക്കുന്നു. ശത്രുരാജ്യങ്ങളുടെ ആക്രമണം ഏതുനിമിഷവും ഉണ്ടായേക്കാമെന്ന നിഗമനത്തിലാണ് തങ്ങളെന്ന് ഇറാന്റെ റെവല്യൂഷണറി ഗാർഡുമായി (IRGC) ബന്ധപ്പെട്ട ‘ഫാർസ്’ വാർത്താ ഏജൻസി വ്യക്തമാക്കി. ആക്രമണമുണ്ടായാൽ അമേരിക്കൻ രാഷ്ട്രീയക്കാരെയും നിയമപരമായ സൈനിക ലക്ഷ്യങ്ങളായി കണ്ട് നേരിടുമെന്ന് ഇറാന്റെ ഉന്നത സുരക്ഷാ ഉദ്യോഗസ്ഥൻ മുന്നറിയിപ്പ് നൽകി. കൂടാതെ, ഹോർമുസ് കടലിടുക്കിലൂടെ പോകുന്ന കടലിനടിയിലെ സുപ്രധാന ഇന്റർനെറ്റ് കേബിളുകൾ, ഡാറ്റാ സെന്ററുകൾ എന്നിവ ലക്ഷ്യമിട്ട് പ്രത്യാക്രമണം നടത്തുമെന്നും ഇറാൻ ഭീഷണി മുഴക്കിയിട്ടുണ്ട്. സൈനിക നീക്കങ്ങൾ ഒരുവശത്ത് സജീവമായിരിക്കെത്തന്നെ സംഘർഷം ഒഴിവാക്കാനുള്ള നയതന്ത്ര ശ്രമങ്ങളും നടക്കുന്നുണ്ട്. ആണവ പദ്ധതിയിൽ വിട്ടുവീഴ്ച ചെയ്യണമെന്ന് ആവശ്യപ്പെട്ട് പാകിസ്ഥാൻ സൈനിക മേധാവി ജനറൽ അസിം മുനീർ ടെഹ്‌റാനിലെത്തി ചർച്ച നടത്തിയിരുന്നു. എന്നാൽ, ആണവ പദ്ധതികൾ ഉപേക്ഷിക്കണമെന്ന് യുഎസ് ആവശ്യപ്പെടുമ്പോൾ, തങ്ങൾക്കുമേലുള്ള സാമ്പത്തിക ഉപരോധങ്ങൾ പൂർണ്ണമായും പിൻവലിക്കണമെന്നാണ് ഇറാന്റെ നിലപാട്. സമ്പുഷ്ടീകരിച്ച യുറേനിയം അടക്കമുള്ള വസ്തുക്കൾ മറ്റൊരു കേന്ദ്രത്തിലേക്ക് മാറ്റില്ലെന്ന് ടെഹ്‌റാൻ വ്യക്തമാക്കിയതോടെ നയതന്ത്ര ചർച്ചകൾ വഴിമുട്ടി നിൽക്കുകയാണ്. ഇതോടെ മേഖലയിൽ ഏതുസമയത്തും ഒരു വൻ യുദ്ധം പൊട്ടിപ്പുറപ്പെടാമെന്ന ആശങ്ക ശക്തമായി തുടരുന്നു.