കടലിൽ വീണുപോയ മൊബൈൽ ഫോണുകൾ കണ്ടെത്തി തിരികെ നൽകുന്ന വേറിട്ട ദൗത്യവുമായി ശ്രദ്ധേയനാകുകയാണ് ബഹ്റൈനിലെ ഡൈവിങ് പരിശീലകൻ അബ്ദുൽ അസീസ് അൽ ഹമദ്. കഴിഞ്ഞ ഏഴ് വർഷത്തിനിടെ കടലിൽ നഷ്ടപ്പെട്ട 200ലേറെ മൊബൈൽ ഫോണുകളാണ് അദ്ദേഹം വെള്ളത്തിനടിയിൽ നടത്തിയ തിരച്ചിലിലൂടെ വീണ്ടെടുത്തത്. അതിശയകരമായി, തിരിച്ചുകിട്ടിയ ഫോണുകളിൽ ഏകദേശം 70 ശതമാനവും യാതൊരു തകരാറുമില്ലാതെ പ്രവർത്തിച്ചിരുന്നു. സർട്ടിഫൈഡ് ഡൈവിങ്, ഫസ്റ്റ് എയ്ഡ് പരിശീലകനായ അൽ ഹമദ്, മൊബൈൽ ഫോണുകൾക്ക് പുറമെ കടലിൽ വീണുപോയ ബാഗുകളും മറ്റ് വിലപിടിപ്പുള്ള വസ്തുക്കളും കണ്ടെത്തി ഉടമകൾക്ക് തിരികെ നൽകാറുണ്ട്. ബോട്ടുകളിൽ യാത്ര ചെയ്യുന്നതിനിടെയോ ബീച്ചിൽ സമയം ചെലവഴിക്കുന്നതിനിടെയോ സാധനങ്ങൾ കടലിൽ നഷ്ടപ്പെടുന്നവരാണ് പലപ്പോഴും സഹായം തേടുന്നത്.

ചില തിരച്ചിലുകൾക്ക് മൂന്ന് മണിക്കൂർ വരെ

വസ്തു വീണ സ്ഥലം കൃത്യമായി തിരിച്ചറിയുന്നതാണ് തിരച്ചിലിന്റെ വിജയത്തിൽ ഏറ്റവും പ്രധാനമെന്ന് അൽ ഹമദ് പറഞ്ഞു. ചില തിരച്ചിലുകൾ 10 മിനിറ്റിനുള്ളിൽ പൂർത്തിയാകുമ്പോൾ, കൂടുതൽ സങ്കീർണമായ സാഹചര്യങ്ങളിൽ വെള്ളത്തിനടിയിൽ മൂന്ന് മണിക്കൂർ വരെ തിരച്ചിൽ നടത്തേണ്ടിവരും.

മറക്കാനാകാത്തത് പാസ്‌പോർട്ടുകൾ അടങ്ങിയ ബാഗ്

തന്റെ ഡൈവിങ് ജീവിതത്തിലെ ഏറ്റവും ഓർമിക്കപ്പെടുന്ന സംഭവങ്ങളിലൊന്നായി അദ്ദേഹം പറയുന്നത് ഒരു സൗദി കുടുംബത്തിന്റെ പാസ്‌പോർട്ടുകൾ അടങ്ങിയ ബാഗ് കടലിന്റെ അടിത്തട്ടിൽ നിന്ന് കണ്ടെത്തിയ അനുഭവമാണ്. നഷ്ടപ്പെട്ടുവെന്ന് കരുതിയ വിലപ്പെട്ട സാധനങ്ങൾ തിരികെ ലഭിക്കുമ്പോൾ ഉടമകളുടെ മുഖത്ത് കാണുന്ന സന്തോഷമാണ് ഈ പ്രവർത്തനത്തിലെ ഏറ്റവും വലിയ പ്രതിഫലമെന്നും അദ്ദേഹം പറഞ്ഞു. ഉടമകളെ കണ്ടെത്താൻ കഴിയാത്ത വസ്തുക്കൾ ബന്ധപ്പെട്ട അധികൃതർക്ക് കൈമാറാറുണ്ടെന്നും അൽ ഹമദ് വ്യക്തമാക്കി.

14-ാം വയസ്സിൽ തുടങ്ങിയ ഡൈവിങ് പ്രണയം

14-ാം വയസ്സിൽ കുടുംബത്തോടൊപ്പം നടത്തിയ യാത്രയ്ക്കിടെയാണ് അൽ ഹമദ് ആദ്യമായി ഡൈവിങ് പരീക്ഷിച്ചത്. ആ അനുഭവമാണ് പിന്നീട് അദ്ദേഹത്തെ ഡൈവിങ് പരിശീലകനാകാൻ പ്രേരിപ്പിച്ചത്. നിലവിൽ 14 വർഷത്തെ ഡൈവിങ് പരിചയസമ്പത്തുള്ള അദ്ദേഹത്തിന് കടൽ ഇപ്പോൾ ഒരു ഹോബിയല്ല, ജീവിതത്തിന്റെ തന്നെ ഭാഗമാണ്. വെള്ളത്തിനടിയിലെ തിരച്ചിലിന് ശാന്തതയും ക്ഷമയും അത്യാവശ്യമാണെന്നും പരിഭ്രാന്തി അപകടസാധ്യത വർധിപ്പിക്കുമെന്നും അദ്ദേഹം മുന്നറിയിപ്പ് നൽകി. സമുദ്രജീവികളെ ഭയത്തോടെയല്ല, ബഹുമാനത്തോടെയാണ് സമീപിക്കേണ്ടതെന്നും അദ്ദേഹം കൂട്ടിച്ചേർത്തു.

കപ്പൽ അവശിഷ്ടങ്ങൾക്കിടയിലെ ഡൈവിങ് ഇഷ്ടം

മുങ്ങിപ്പോയ കപ്പലുകളുടെ അവശിഷ്ടങ്ങൾക്കിടയിൽ ഡൈവിങ് നടത്തുന്നതാണ് അൽ ഹമദിന് ഏറ്റവും ഇഷ്ടം. 1991ൽ ചെങ്കടലിൽ മുങ്ങിയ ‘സലേം എക്സ്പ്രസ്’ കപ്പലിന്റെ അവശിഷ്ടങ്ങൾക്കിടയിൽ നടത്തിയ ഡൈവിങ് ഒരിക്കലും മറക്കാനാകില്ലെന്നും അദ്ദേഹം പറഞ്ഞു. കപ്പൽ അവശിഷ്ടങ്ങൾ മനുഷ്യചരിത്രത്തിന്റെ അടയാളങ്ങൾ മാത്രമല്ല, നിരവധി സമുദ്രജീവികളുടെ ആവാസകേന്ദ്രങ്ങൾ കൂടിയാണെന്ന് അൽ ഹമദ് പറഞ്ഞു. സാഹസികതയും അത്ഭുതങ്ങളും നിറഞ്ഞ ഒരു രഹസ്യലോകമാണ് കടൽ എന്നാണ് അദ്ദേഹത്തിന്റെ വാക്കുകൾ.