airport drone sighting; ജർമ്മനിയിലെ ബെർലിൻ ബ്രാൻഡൻബർഗ് വിമാനത്താവളത്തിൽ അജ്ഞാത ഡ്രോണുകൾ പ്രത്യക്ഷപ്പെട്ടതിനെത്തുടർന്ന് വ്യോമഗതാഗതം പൂർണ്ണമായി തടസ്സപ്പെട്ടു. ലാൻഡിംഗിന് തൊട്ടടുത്ത യാത്രാവിമാനം തലനാരിഴയ്ക്ക് അപകടത്തിൽ നിന്ന് ഒഴിവായ സംഭവത്തിൽ 45 മിനിറ്റിലധികം സമയം വിമാനത്താവളത്തിന്റെ പ്രവർത്തനം സ്തംഭിച്ചു. കൊളോണിൽ നിന്നെത്തിയ യൂറോവിങ്സ് വിമാനമാണ് വൻ ദുരന്തത്തിൽ നിന്ന് അത്ഭുതകരമായി രക്ഷപ്പെട്ടത്. വിമാനം നിലംതൊടാൻ സെക്കൻഡുകൾ മാത്രം ബാക്കിനിൽക്കെ റൺവേയ്ക്ക് സമീപം ഡ്രോൺ ശ്രദ്ധയിൽപ്പെട്ടതോടെ, പൈലറ്റ് അടിയന്തരമായി ലാൻഡിംഗ് ഉപേക്ഷിച്ച് വിമാനം വീണ്ടും മുകളിലേക്ക് ഉയർത്തുകയായിരുന്നു. പിന്നീട് മറ്റൊരു റൺവേയിലൂടെയാണ് ഈ വിമാനം സുരക്ഷിതമായി താഴെയിറക്കിയത്. ബുധനാഴ്ച രാത്രി എട്ടുമണിയോടെ വിമാനത്താവളത്തിന്റെ വടക്കൻ റൺവേയ്ക്ക് സമീപമാണ് ആദ്യം അജ്ഞാത ഡ്രോൺ പറക്കുന്നത് കണ്ടത്. തുടർന്ന് സുരക്ഷ മുൻനിർത്തി രാത്രി 8:20 മുതൽ വിമാനത്താവളത്തിലെ റൺവേകൾ പൂർണ്ണമായി അടച്ചു. ഇതോടെ ബെർലിനിലേക്ക് എത്തേണ്ടിയിരുന്ന നിരവധി സർവീസുകൾ സമീപത്തെ മറ്റ് വിമാനത്താവളങ്ങളിലേക്ക് വഴിതിരിച്ചുവിട്ടു. സ്റ്റുട്ട്ഗാർട്ടിൽ നിന്നുള്ള യൂറോവിങ്സ് (EW 008), ബുഡാപെസ്റ്റിൽ നിന്നുള്ള വിസ് എയർ (Wizz Air) എന്നിവ ഡ്രെസ്ഡൻ വിമാനത്താവളത്തിലേക്ക് തിരിച്ചുവിട്ടു. ഡ്യൂസൽഡോർഫിൽ നിന്നുള്ള യൂറോവിങ്സ് (EW 8047), മ്യൂണിക്കിൽ നിന്നുള്ള ലുഫ്താൻസ (LH 202), ഹെരാക്ലിയോണിൽ നിന്നുള്ള ഫ്രീബേർഡ് എയർലൈൻസ് എന്നിവ ലെയ്പ്സിഗ് വിമാനത്താവളത്തിലാണ് ഇറക്കിയത്. ഒന്നല്ല, മൂന്ന് ഡ്രോണുകൾ വരെ ആകാശത്ത് കണ്ടതായി ലെയ്പ്സിഗിലേക്ക് വഴിതിരിച്ചുവിട്ട വിമാനത്തിലെ പൈലറ്റ് അറിയിച്ചതായി യാത്രക്കാർ വെളിപ്പെടുത്തി. ഡ്രോണുകളുടെ സാന്നിധ്യം ജർമ്മൻ ഫെഡറൽ പോലീസും സ്ഥിരീകരിച്ചിട്ടുണ്ട്. രാത്രി 9:05-ഓടെ വ്യോമപാത വീണ്ടും തുറന്നുകൊടുത്തെങ്കിലും, തുടർന്നുണ്ടായ ടേക്ക് ഓഫുകളും ലാൻഡിംഗുകളും മണിക്കൂറുകളോളം വൈകിയാണ് സർവീസ് നടത്തിയത്. സംഭവത്തിൽ ഫെഡറൽ പോലീസ് സമഗ്രാന്വേഷണം ആരംഭിച്ചിട്ടുണ്ട്. വിമാനത്താവളങ്ങൾക്ക് സമീപം നിയമവിരുദ്ധമായി ഡ്രോൺ പറത്തുന്നത് ആയിരക്കണക്കിന് യാത്രക്കാരുടെ ജീവന് ഗുരുതരമായ ഭീഷണിയാണെന്ന് അധികൃതർ മുന്നറിയിപ്പ് നൽകി.