മനുഷ്യാവകാശ സംരക്ഷണത്തിന് അതീവ മുൻഗണന ഉറപ്പാക്കുമെന്ന് ഖത്തർ ഷൂറാ കൗൺസിൽ. ജൂൺ 30-ന് ആചരിച്ച അന്താരാഷ്ട്ര പാർലമെന്ററി ദിനത്തോടനുബന്ധിച്ച് പുറത്തിറക്കിയ പ്രസ്താവനയിലാണ് കൗൺസിൽ ഇക്കാര്യം ഊന്നിപ്പറഞ്ഞത്. അമീർ ശൈഖ് തമീം ബിൻ ഹമദ് അൽതാനിയുടെ മാർഗ്ഗനിർദ്ദേശപ്രകാരം, മനുഷ്യാവകാശങ്ങൾ സംരക്ഷിക്കാനും പ്രോത്സാഹിപ്പിക്കാനുമുള്ള ഖത്തറിന്റെ ഉറച്ച പ്രതിബദ്ധതയുടെ ഭാഗമാണിതെന്ന് കൗൺസിൽ അറിയിച്ചു. നിയമങ്ങൾ നിർമ്മിക്കുക, സർക്കാർ നയങ്ങൾ നിരീക്ഷിക്കുക, പൊതുജന പങ്കാളിത്തം ഉറപ്പാക്കുക എന്നിവയിലൂടെ നിയമവാഴ്ച ശക്തിപ്പെടുത്താനാണ് ഷൂറാ കൗൺസിൽ ലക്ഷ്യമിടുന്നത്. രാജ്യത്തെ നിയമനിർമ്മാണ പ്രക്രിയയിൽ മനുഷ്യാവകാശങ്ങൾ അടിസ്ഥാന തൂണായി പ്രവർത്തിക്കുന്നു. സ്ത്രീകൾ, യുവാക്കൾ എന്നിവരുടെ അവകാശങ്ങൾ സംരക്ഷിക്കുന്നതിനും അവർക്കായി പുതിയ നയങ്ങൾ രൂപീകരിക്കുന്നതിനും പ്രത്യേക പരിഗണന നൽകുന്നു. മികച്ച ആരോഗ്യ സേവനം ഒരു മനുഷ്യാവകാശമായി കണ്ട് അതിന്റെ ഗുണനിലവാരം മെച്ചപ്പെടുത്താനുള്ള ശ്രമങ്ങൾ തുടരുന്നു. അന്താരാഷ്ട്ര തലത്തിൽ മറ്റു രാജ്യങ്ങളിലെ പാർലമെന്റുകളുമായി സഹകരിക്കുകയും സംവാദങ്ങളിലൂടെ മനുഷ്യാവകാശങ്ങൾക്കായി നിലകൊള്ളുകയും ചെയ്യുന്നു. ഷൂറാ കൗൺസിൽ സ്പീക്കർ ഹസ്സൻ ബിൻ അബ്ദുല്ല അൽ ഗാനിം ചർച്ചയിൽ അധ്യക്ഷത വഹിച്ചു. ഇസ്ലാമിക ശരീഅത്ത് തത്വങ്ങളും ഖത്തറിന്റെ പാരമ്പര്യവും സംസ്കാരവും മനുഷ്യാവകാശങ്ങൾ ഉയർത്തിപ്പിടിക്കുന്നതിൽ പ്രധാന പങ്കുവഹിക്കുന്നുവെന്ന് അദ്ദേഹം പറഞ്ഞു. ഖത്തറിലെ വാർത്തകൾ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ
https://chat.whatsapp.com/DYPO80C5nNo3Qv0FLcH5EY?mode=gi_t കൗൺസിൽ അംഗങ്ങളായ ഡോ. മുന ബിൻത് അബ്ദുറഹ്മാൻ അൽ മുസ്ലമാനി, ഈസ ബിൻ അഹമ്മദ് അൽ നാസർ എന്നിവർ വിവിധ വിഷയങ്ങളിൽ പ്രബന്ധങ്ങൾ അവതരിപ്പിച്ചു. 1889-ൽ ഇന്റർ പാർലമെന്ററി യൂണിയൻ (IPU) സ്ഥാപിതമായതിന്റെ സ്മരണയ്ക്കായാണ് എല്ലാ വർഷവും ജൂൺ 30-ന് അന്താരാഷ്ട്ര പാർലമെന്ററി ദിനം ആചരിക്കുന്നത്. ജനങ്ങളുടെ പ്രാതിനിധ്യം ഉറപ്പാക്കുന്നതിലും സുസ്ഥിര വികസനം കൈവരിക്കുന്നതിലും പാർലമെന്റുകൾ വഹിക്കുന്ന പങ്ക് ഈ ദിനം ഓർമ്മിപ്പിക്കുന്നു.
