ദുബായ് ലാൻഡിലെ വില്ലയിലുണ്ടായ തീപിടിത്തത്തെത്തുടർന്ന് വീണ്ടും മുന്നറിയിപ്പ് നല്‍കി അഗ്നി സുരക്ഷാ വിദഗ്ധരും താമസക്കാരും. യുഎഇയിലുടനീളമുള്ള ആളുകൾ അവരുടെ എയർ കണ്ടീഷനിങ് യൂണിറ്റുകൾ പതിവായി പരിശോധിക്കണമെന്നും പുക അലാറങ്ങൾ പ്രവർത്തിക്കുന്നുണ്ടെന്ന് ഉറപ്പാക്കണമെന്നും അവർ ആവശ്യപ്പെട്ടു. സെറീനയിലെ ബെല്ല കാസയിലുള്ള ഒരു ബ്രിട്ടീഷ് കുടുംബത്തിന്റെ വില്ലയിലെ വീട്ടുജോലിക്കാരിയുടെ മുറിയിലാണ് തീപിടിത്തമുണ്ടായത്. ഒരു എസി യൂണിറ്റിലെ ആന്തരിക വൈദ്യുത തകരാറാണ് തീപിടിത്തത്തിന് കാരണമെന്ന് കരുതപ്പെടുന്നു. “മുറിയിൽ ഫയർ അലാറം പ്രവർത്തിക്കുന്നുണ്ടായിരുന്നില്ല… ഫയർ അലാറം അടിച്ചില്ല. അതിനാല്‍ വളരെയധികം നാശനഷ്ടങ്ങൾ വരുത്തി. വീട് ഇപ്പോൾ താമസിക്കാൻ പറ്റാത്ത അവസ്ഥയിലാണ്. ഞങ്ങൾ ഇപ്പോൾ മറ്റൊരു സ്ഥലത്തേക്ക് താമസം മാറുകയാണ്,” വില്ലയിലെ വാടകക്കാരിയായ സാലി മാഡിസൺ പറഞ്ഞു. രാത്രിയിൽ തീപിടിത്തം ഉണ്ടായിരുന്നെങ്കിൽ അതിന്റെ ഫലം വളരെ വിനാശകരമാകുമായിരുന്നെന്ന് കൊച്ചുകുട്ടികൾ ഉൾപ്പെടെ അഞ്ച് പേരടങ്ങുന്ന ബ്രിട്ടീഷ് പ്രവാസി കുടുംബം പറയുന്നു. “ഞങ്ങൾ ഉറങ്ങിക്കിടക്കുമ്പോഴാണ് ഇത് സംഭവിച്ചതെങ്കിൽ, കഥ പറയാൻ ഞങ്ങൾ ഇവിടെ ഉണ്ടാകുമായിരുന്നില്ല. ഏറ്റവും ഭയാനകമായ കാര്യം, പ്രതിരോധത്തിന്റെ ആദ്യ നിരയായിരിക്കേണ്ടിയിരുന്ന സ്മോക്ക് ഡിറ്റക്ടർ പ്രവർത്തിക്കുന്നില്ല എന്നതാണ്,” അവർ കൂട്ടിച്ചേർത്തു. “എയർ കണ്ടീഷനിങ് യൂണിറ്റുകൾ കുറഞ്ഞത് ആറുമാസത്തിലൊരിക്കലെങ്കിലും പരിശോധിച്ച് സർവീസ് ചെയ്യണം; സാധാരണയായി, വേനൽക്കാല മാസങ്ങളിൽ ഒരിക്കൽ അല്ലെങ്കിൽ വേനൽക്കാലത്തിന് ശേഷം ഒരിക്കൽ സര്‍വീസ് ചെയ്യണമെന്ന്,” റിയാക്ടൺ ഫയർ സപ്രഷന്റെ സിഇഒ സാം മാലിൻസ് പറഞ്ഞു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dkr4HqQL4ZcCnF60iKb3SK?mode=ac_t