UAE 5-Year Multiple Entry Tourist Visa; യുഎഇയിലേക്ക് ബിസിനസ് ആവശ്യങ്ങൾക്കോ, കുടുംബത്തെ സന്ദർശിക്കാനോ അടിക്കടി യാത്ര ചെയ്യുന്നവരാണോ നിങ്ങൾ? എങ്കിൽ ഓരോ തവണയും വിസയ്ക്കായി ഓടി നടക്കേണ്ട കാലം കഴിഞ്ഞു. യുഎഇ അവതരിപ്പിച്ച 5 വർഷത്തെ മൾട്ടിപ്പിൾ എൻട്രി വിസ ഇപ്പോൾ പ്രവാസികൾക്കിടയിൽ വലിയ തരംഗമാണ്. ഇതിന്റെ ഗുണങ്ങളും മറ്റു വിസകളിൽ നിന്നുള്ള പ്രത്യേകതകളും എന്തൊക്കെയെന്ന് നോക്കാം.
എന്താണ് ഈ വിസയുടെ പ്രത്യേകത?
ഒരിക്കൽ എടുത്താൽ 5 വർഷത്തേക്ക് കാലാവധിയുണ്ട്. ഈ കാലയളവിൽ എത്ര തവണ വേണമെങ്കിലും യുഎഇയിലേക്ക് വരികയും പോകുകയും ചെയ്യാം. ഓരോ തവണയും വിസ പുതുക്കേണ്ട ആവശ്യമില്ല എന്നതാണ് ഏറ്റവും വലിയ ഗുണം.
താമസ പരിധി: ഓരോ തവണ വരുമ്പോഴും 90 ദിവസം വരെ താമസിക്കാം. ഇത് ആവശ്യമെങ്കിൽ മറ്റൊരു 90 ദിവസത്തേക്ക് കൂടി നീട്ടാം. അതായത് ഒരു വർഷം പരമാവധി 180 ദിവസം യുഎഇയിൽ ചിലവഴിക്കാം.
ആർക്കൊക്കെ അപേക്ഷിക്കാം? ലോകത്തെ ഏത് രാജ്യക്കാർക്കും ഈ വിസയ്ക്ക് അപേക്ഷിക്കാൻ അർഹതയുണ്ട്.
ഈ വിസ ലഭിക്കാൻ ചില പ്രധാന കടമ്പകളുണ്ട്, പ്രത്യേകിച്ച് സാമ്പത്തിക കാര്യത്തിൽ:
- ബാങ്ക് ബാലൻസ്: അപേക്ഷിക്കുന്നതിന് തൊട്ടുമുമ്പുള്ള 6 മാസത്തെ ബാങ്ക് സ്റ്റേറ്റ്മെന്റ് വേണം. അക്കൗണ്ടിൽ കുറഞ്ഞത് 4,000 ഡോളർ (ഏകദേശം 3.35 ലക്ഷം രൂപ അല്ലെങ്കിൽ 15,000 ദിർഹം) ബാലൻസ് ഉണ്ടായിരിക്കണം.
- പാസ്പോർട്ട്: 6 മാസമെങ്കിലും കാലാവധിയുള്ള പാസ്പോർട്ട്.
- ഇൻഷുറൻസ്: യുഎഇയിൽ സാധുവായ ഹെൽത്ത് ഇൻഷുറൻസ് നിർബന്ധം.
- മറ്റു രേഖകൾ: പാസ്പോർട്ട് സൈസ് ഫോട്ടോ, മടക്കയാത്രയ്ക്കുള്ള ടിക്കറ്റ്.
എത്ര രൂപ ചെലവ് വരും?
അപേക്ഷിക്കുന്ന പ്ലാറ്റ്ഫോം അനുസരിച്ച് ഫീസിൽ ചെറിയ വ്യത്യാസമുണ്ടാകും:
- ICP വഴി: ഏകദേശം 3,775 ദിർഹം (ഏകദേശം 85,000 രൂപയ്ക്ക് മുകളിൽ).
- GDRFA വഴി: ഏകദേശം 3,713 ദിർഹം.
ഈ തുകയിൽ വലിയൊരു ഭാഗം (3,000 ദിർഹത്തിന് മുകളിൽ) നിങ്ങളുടെ ‘സെക്യൂരിറ്റി ഡിപ്പോസിറ്റ്’ ആണ്.
ഈ വിസയുടെ ഏറ്റവും വലിയ പ്രത്യേകത ഇതിന്റെ റീഫണ്ട് പോളിസിയാണ്.
- ഒരുപക്ഷേ നിങ്ങളുടെ വിസ അപേക്ഷ നിരസിക്കപ്പെട്ടാൽ, നിങ്ങൾ അടച്ച ഇൻഷുറൻസ് തുകയും സെക്യൂരിറ്റി ഡിപ്പോസിറ്റും തിരികെ ലഭിക്കും.
- വിസ ക്യാൻസൽ ചെയ്യുമ്പോഴോ കാലാവധി കഴിയുമ്പോഴോ നിബന്ധനകൾ പാലിച്ചവർക്ക് സെക്യൂരിറ്റി ഡിപ്പോസിറ്റ് തുക തിരികെ വാങ്ങാവുന്നതാണ്.
വിസ കിട്ടിയാൽ മാത്രം പോരാ, ഈ നിയമങ്ങൾ ലംഘിച്ചാൽ പണി കിട്ടും!
- വിസ ലഭിച്ച് 60 ദിവസത്തിനുള്ളിൽ ആദ്യത്തെ യാത്ര നടത്തിയിരിക്കണം.
- ഒരു വർഷം 180 ദിവസത്തിൽ കൂടുതൽ താമസിച്ചാൽ പിഴ ഒടുക്കേണ്ടി വരും, കൂടാതെ നിങ്ങളുടെ സെക്യൂരിറ്റി ഡിപ്പോസിറ്റ് തുക സർക്കാരിലേക്ക് കണ്ടുകെട്ടുകയും ചെയ്യും.
- അപേക്ഷ നൽകി 30 ദിവസത്തിനുള്ളിൽ ആവശ്യമായ രേഖകൾ സമർപ്പിച്ചില്ലെങ്കിൽ അപേക്ഷ തള്ളപ്പെടും.
എങ്ങനെ അപേക്ഷിക്കാം?
നിങ്ങൾക്ക് സ്വന്തമായി ICP അല്ലെങ്കിൽ GDRFA വെബ്സൈറ്റുകൾ വഴിയോ ആപ്പുകൾ വഴിയോ അപേക്ഷിക്കാം. അതല്ലെങ്കിൽ യുഎഇയിലെ അംഗീകൃത ടൈപ്പിംഗ് സെന്ററുകൾ വഴിയും അപേക്ഷ സമർപ്പിക്കാം. സാധാരണയായി 48 മണിക്കൂറിനുള്ളിൽ വിസ നടപടികൾ പൂർത്തിയാകും. കൃത്യമായ ബാങ്ക് ബാലൻസ് രേഖകളുള്ള പ്രവാസികൾക്കും അവരുടെ ബന്ധുക്കൾക്കും യുഎഇയിലേക്ക് തടസ്സമില്ലാതെ യാത്ര ചെയ്യാൻ ലഭിക്കുന്ന സുവർണ്ണാവസരമാണിത്. വിസ നടപടികളിലെ സങ്കീർണ്ണതകൾ ഒഴിവാക്കാൻ ഈ 5 വർഷത്തെ വിസ സഹായിക്കും.
