Warning to Job Seekers; ദുബായിലെ മസാജ് സെന്ററുകൾ (സ്പാ) കേന്ദ്രീകരിച്ച് നടന്ന ലഹരിമരുന്ന് വിൽപനയുമായി ബന്ധപ്പെട്ട് മലയാളികളടക്കം ഇരുപത്തഞ്ചോളം യുവതികൾ ദുബായ് പൊലീസിന്റെ പിടിയിലായി. സ്പാകളുടെ മറവിൽ മയക്കുമരുന്ന് വ്യാപാരം നടത്തിയ വൻ സംഘത്തെയാണ് പൊലീസ് മിന്നൽ റെയ്ഡിലൂടെ തകർത്തത്. ശിക്ഷിക്കപ്പെട്ടവരിൽ ഭൂരിഭാഗവും സന്ദർശക വീസയിലെത്തി തൊഴിൽ തട്ടിപ്പിനിരയായവരും സാഹചര്യങ്ങളുടെ സമ്മർദ്ദം മൂലം വഴിതെറ്റിയവരുമാണ്. റെയ്ഡ് സമയത്ത് മസാജിനായി എത്തിയവരും ലഹരി ഉപയോഗിച്ചതായി കണ്ടെത്തിയ കസ്റ്റമേഴ്സും നിലവിൽ നിയമനടപടികൾ നേരിടുകയാണ്.

തൃശൂർ, കോഴിക്കോട്, എറണാകുളം, ഇടുക്കി ഉൾപ്പെടെയുള്ള കേരളത്തിലെ വിവിധ ജില്ലകളിൽ നിന്നുള്ളവരാണ് പിടിയിലായ യുവതികളിൽ അധികവും. ഇവർക്ക് പുറമെ നേപ്പാൾ, ഫിലിപ്പീൻസ്, പാക്കിസ്ഥാൻ, ശ്രീലങ്ക എന്നിവിടങ്ങളിൽ നിന്നുള്ളവരും സംഘത്തിലുണ്ട്. കുറ്റക്കാരെന്ന് കണ്ടെത്തിയവർക്ക് ആറ് മാസം തടവും 20,000 ദിർഹം പിഴയുമാണ് കോടതി വിധിച്ചിരിക്കുന്നത്. ശിക്ഷാ കാലാവധി പൂർത്തിയായാൽ ഇവരെ നാടുകടത്തും. പിഴയൊടുക്കാൻ കഴിയാത്തവർ കൂടുതൽ കാലം തടവ് അനുഭവിക്കേണ്ടി വരും. കേന്ദ്രം നടത്തിപ്പുകാർക്കെതിരെയുള്ള വിചാരണ നടപടികൾ പുരോഗമിക്കുകയാണ്.

ചതിക്കുഴികളൊരുക്കി ഏജന്റുമാർ

ദുബായിലെ പ്രധാന വാണിജ്യ കേന്ദ്രങ്ങളായ ദെയ്റ, സത്‍വ എന്നിവിടങ്ങളിലെ മസാജ് സെന്ററുകൾ കേന്ദ്രീകരിച്ചായിരുന്നു ഈ അധോലോക ഇടപാടുകൾ നടന്നിരുന്നത്. യുവതികളുടെ ബാച്‍ലർ താമസയിടങ്ങളിൽ നിന്നും മാളുകൾ, ഹൈപ്പർമാർക്കറ്റുകൾ എന്നിവിടങ്ങളിൽ നിന്നുമാണ് ഇവർ ഇരകളെ കണ്ടെത്തുന്നത്. മാളുകൾക്കും മറ്റും മുന്നിൽ ലഘുലേഖകളുമായി നിൽക്കുന്ന സ്ത്രീകളായ ഏജന്റുമാരാണ് പലപ്പോഴും ഇരകളെ കണ്ടെത്തുന്നത്. വീസ തട്ടിപ്പിനിരയായി യുഎഇയിൽ ജോലിയില്ലാതെ അലയുന്ന സ്ത്രീകളെ സമീപിച്ച്, ഉയർന്ന ശമ്പളവും മികച്ച താമസസൗകര്യവും വാഗ്ദാനം ചെയ്താണ് ഇവർ മസാജ് സെന്ററുകളിലേക്ക് ആകർഷിക്കുന്നത്. ആദ്യം സാധാരണ ജോലിക്കായി ഇവിടെയെത്തുന്ന യുവതികളെ പിന്നീട് ഭീഷണിപ്പെടുത്തിയും പ്രലോഭിപ്പിച്ചും ലഹരിമരുന്ന് വിൽപനയ്ക്ക് ഉപയോഗിക്കുകയായിരുന്നു. തുടക്കത്തിൽ ഇവിടുത്തെ സാഹചര്യങ്ങളിൽ നിന്ന് രക്ഷപ്പെടാൻ ആഗ്രഹിച്ചവർ പോലും പിന്നീട് ക്രൂരമായ പീഡന മുറകൾക്കും ലഹരിമരുന്ന് ഉപയോഗത്തിനും ഇരയായി ഒടുവിൽ ഈ മാഫിയയുടെ ഭാഗമായി മാറുന്ന കാഴ്ചയാണ് പൊലീസ് അന്വേഷണത്തിൽ വ്യക്തമായത്. ഇതിന് വിസമ്മതിക്കുന്ന ചെറിയൊരു ശതമാനം സ്ത്രീകൾക്ക് കടുത്ത ശാരീരിക-മാനസിക പീഡനങ്ങൾ ഏൽക്കേണ്ടി വന്നിട്ടുണ്ട്.

ജെസ്സിയുടെ കഥ

ഭർത്താവ് ഉപേക്ഷിച്ചതിനെ തുടർന്ന് പ്രായപൂർത്തിയാകാത്ത രണ്ട് മക്കളുടെ പട്ടിണിയകറ്റാനും അവരുടെ വിദ്യാഭ്യാസത്തിനുമായി ഇടുക്കിയുടെ ഒരു ഉൾഗ്രാമത്തിൽ നിന്ന് ദുബായിലേക്ക് വണ്ടി കയറിയതാണ് ജെസ്സി (യഥാർഥ പേരല്ല). തന്റെയും വയോധികയായ അമ്മയുടെയും കഴുത്തിലുണ്ടായിരുന്ന ഏക സമ്പാദ്യമായ സ്വർണമാല പണയം വച്ചാണ് ജെസ്സി സന്ദർശക വീസയ്ക്കും യാത്രയ്ക്കുമുള്ള പണം കണ്ടെത്തിയത്. പ്ലസ് ടു വിദ്യാഭ്യാസം മാത്രമുള്ള ജെസ്സിക്ക് ദുബായിലെത്തി നാളുകൾ കഴിഞ്ഞിട്ടും ജോലി ഒന്നും കണ്ടെത്താനായില്ല. കയ്യിലെ പണം തീർന്നതോടെ വെറുംകയ്യോടെ നാട്ടിലേക്ക് മടങ്ങാനും സാധിക്കാത്ത അവസ്ഥയായി. കരാമയിലെ ഒരു ബാച്ചിലർ ഫ്ലാറ്റിൽ പ്രതിമാസം 500 ദിർഹം ബെഡ് സ്പേസ് വാടക നൽകിയാണ് ജെസ്സി താമസിച്ചിരുന്നത്. അവിടെ പരിചയപ്പെട്ട മറ്റൊരു യുവതിയാണ് ദെയ്റയിലെ ഒരു മലയാളി ഉടമസ്ഥതയിലുള്ള മസാജ് സെന്ററിലെ ജോലിയെക്കുറിച്ച് പറയുന്നത്. മസാജ് ചെയ്യാൻ അറിയില്ലെന്ന് ജെസ്സി വ്യക്തമാക്കിയപ്പോൾ റിസപ്ഷനിസ്റ്റ് തസ്തികയിൽ ജോലി നൽകാമെന്ന് ഇവർ വാഗ്ദാനം ചെയ്തു. തുടക്കത്തിൽ 2000 ദിർഹം ശമ്പളത്തിൽ റിസപ്ഷനിൽ തന്നെയായിരുന്നു ജോലി. എന്നാൽ ദിവസങ്ങൾക്കകം കാര്യങ്ങൾ മാറിമറിഞ്ഞു. മാനേജ്മെന്റ് ജെസ്സിയെ റിസപ്ഷനിൽ നിന്ന് മാറ്റി മസാജ് കാബിനിലേക്ക് പ്രവേശിക്കാൻ നിർബന്ധിച്ചു. ആളുകൾ വരുന്നത് മസാജ് ചെയ്യാനല്ലെന്നും അവരെ ‘സന്തോഷിപ്പിച്ചാൽ’ വൻതുക ടിപ്പായി ലഭിക്കുമെന്നുമുള്ള പ്രലോഭനങ്ങൾ നൽകി അവരെ അനാശാസ്യത്തിലേക്ക് തള്ളിവിട്ടു. ഇതിനു പിന്നാലെയാണ് ലഹരി വിൽക്കാൻ ഉടമകൾ ഭീഷണിപ്പെടുത്തിയതും ഒടുവിൽ പൊലീസ് റെയ്ഡിൽ ജെസ്സി കുടുങ്ങുന്നതും.

യുഎഇ നിയമപ്രകാരമുള്ള കടുത്ത ശിക്ഷകൾ

ലഹരിമരുന്ന് കേസുകളിൽ യുഎഇ നിയമം അത്യാധുനിക സാങ്കേതികവിദ്യകളുടെ സഹായത്തോടെ കടുത്ത നിലപാടാണ് സ്വീകരിക്കുന്നതെന്ന് നിയമവിദഗ്ധർ പറയുന്നു. യുഎഇ ഫെഡറൽ നിയമപ്രകാരം ലഹരിമരുന്ന് കൈവശം വയ്ക്കുന്നതും വിൽപന നടത്തുന്നതും അതീവ ഗുരുതരമായ കുറ്റകൃത്യമാണ്. വിൽപനയ്ക്കായി ലഹരി സൂക്ഷിക്കുന്നവർക്ക് കുറഞ്ഞത് 10 വർഷം മുതൽ ജീവപര്യന്തം വരെ തടവും, ഒരു ലക്ഷം ദിർഹം മുതൽ അഞ്ച് ലക്ഷം ദിർഹം വരെ പിഴയും ലഭിക്കാം. ലഹരിമരുന്ന് കേസുകളിൽ ഉൾപ്പെടുന്ന ഏതൊരു വിദേശിയെയും ശിക്ഷാ കാലാവധിക്ക് ശേഷം യുഎഇയിൽ നിന്ന് നിർബന്ധമായും നാടുകടത്തും. ഇവർക്ക് പിന്നീട് യുഎഇയിലേക്കോ മറ്റ് ജിസിസി രാജ്യങ്ങളിലേക്കോ പ്രവേശിക്കാൻ സാധിക്കാത്ത വണ്ണം ആജീവനാന്ത വിലക്കും ഏർപ്പെടുത്തും.

തൊഴിൽ തേടുന്നവർ ഇക്കാര്യങ്ങൾ ശ്രദ്ധിക്കുക

• സന്ദർശക വീസയിൽ വന്ന് ജോലി ചെയ്യുന്നത് യുഎഇ നിയമപ്രകാരം കുറ്റകരമാണ്. കൃത്യമായ തൊഴിൽ വീസ നൽകുന്ന സ്ഥാപനങ്ങളിൽ മാത്രം ജോലിക്ക് പ്രവേശിക്കുക.

• സമൂഹമാധ്യമം വഴിയോ അനധികൃത ഏജന്റുമാർ വഴിയോ വരുന്ന ആകർഷകമായ പരസ്യങ്ങളിൽ വീഴരുത്. മസാജ് സെന്ററുകൾ, സ്പാകൾ എന്നിവ ലൈസൻസുള്ള അംഗീകൃത സ്ഥാപനങ്ങളാണോ എന്ന് ഉറപ്പുവരുത്തുക.

• നിയമവിരുദ്ധമായി ഒരു തൊഴിലുടമയ്ക്കും ജീവനക്കാരുടെ പാസ്പോർട്ട് കൈവശം വയ്ക്കാൻ അവകാശമില്ല. ഭീഷണിക്ക് വഴങ്ങി രേഖകൾ കൈമാറരുത്.

• ചതിക്കപ്പെടുകയോ നിയമവിരുദ്ധ പ്രവർത്തനങ്ങൾക്ക് നിർബന്ധിതരാകുകയോ ചെയ്താൽ ദുബായ് പൊലീസിന്റെ ‘അൽ അമീൻ’ സർവീസ് (8004888) വഴിയോ ലേബർ ഡിപാർട്ട്മെന്റ് വഴിയോ ഇന്ത്യൻ കോൺസുലേറ്റിന്റെ സഹായത്തോടെയോ ഉടനടി പരാതിപ്പെടുക.