Indian Traveler Lost Purse; ലക്ഷങ്ങൾ വിലമതിക്കുന്ന സാധനങ്ങളും പണവുമടങ്ങിയ പഴ്സ് നടുറോഡിൽ മറന്നുവെച്ചാൽ തിരികെ കിട്ടുമെന്ന് ആരെങ്കിലും വിശ്വസിക്കുമോ? എന്നാൽ അത്തരമൊരു അത്ഭുതകരമായ അനുഭവത്തെക്കുറിച്ച് മനസ്സ് തുറക്കുകയാണ് ഇന്ത്യൻ സഞ്ചാരിയായ സോനം മിധ. ജപ്പാനിലെത്തിയ സോനത്തിന് തന്റെ പഴ്സ് നഷ്ടപ്പെട്ടതും മിനിറ്റുകൾക്കകം അത് സുരക്ഷിതമായി തിരികെ ലഭിച്ചതുമായ അനുഭവം ഇപ്പോൾ സോഷ്യൽ മീഡിയയിൽ തരംഗമായിരിക്കുകയാണ്. സുഹൃത്തിനൊപ്പം സൈക്കിൾ വാടകയ്ക്കെടുത്ത് ജപ്പാനിലെ ഒരു റസ്റ്ററന്റിൽ ഭക്ഷണം കഴിക്കാനെത്തിയതായിരുന്നു സോനം. തന്റെ വീടിന്റെ താക്കോൽ, പണം, വിലപിടിപ്പുള്ള മൈക്രോഫോൺ എന്നിവയടങ്ങിയ പഴ്സ് സൈക്കിളിന് മുന്നിലെ ബാസ്കറ്റിലാണ് സോനം വച്ചിരുന്നത്. ഭക്ഷണം കഴിഞ്ഞ് ഏകദേശം ഒരു മണിക്കൂർ കഴിഞ്ഞാണ് താൻ പഴ്സ് പുറത്ത് സൈക്കിളിൽ മറന്നുവെച്ച കാര്യം അവർ ഓർക്കുന്നത്. പരിഭ്രമത്തോടെ ഓടിയെത്തി നോക്കിയെങ്കിലും സൈക്കിൾ ബാസ്കറ്റ് കാലിയായിരുന്നു. പഴ്സ് നഷ്ടപ്പെട്ടെന്ന നിരാശയിൽ പരാതി നൽകാനായി സോനം അടുത്തുള്ള പോലീസ് സ്റ്റേഷനിലെത്തി. എന്നാൽ സോനത്തെ കാത്തിരുന്നത് അവിശ്വസനീയമായ വാർത്തയായിരുന്നു. സ്റ്റേഷനിലെത്തിയ ഉടൻ കാര്യം പറഞ്ഞ സോനത്തോട്, സമാനമായ ഒരു പഴ്സ് ആരോ അവിടെ ഏൽപ്പിച്ചിട്ടുണ്ടെന്ന് പോലീസ് ഉദ്യോഗസ്ഥൻ മറുപടി നൽകി. പരിശോധിച്ചപ്പോൾ പണവും മറ്റു സാധനങ്ങളും ഒന്നും നഷ്ടപ്പെടാതെ തന്നെ സോനത്തിന്റെ പഴ്സ് അവിടെ സുരക്ഷിതമായിരുന്നു. ജപ്പാനിലെ ജനങ്ങളുടെ സത്യസന്ധത കണ്ടു കണ്ണുനിറഞ്ഞു പോയെന്നും മനുഷ്യത്വം ഇന്നും അവിടെ നിലനിൽക്കുന്നുണ്ടെന്നും സോനം തന്റെ ഇൻസ്റ്റഗ്രാം വീഡിയോയിൽ പറഞ്ഞു. പണമടക്കം ഒരു ലക്ഷത്തിലധികം രൂപയുടെ സാധനങ്ങളാണ് പഴ്സിനുള്ളിൽ ഉണ്ടായിരുന്നത്. പഴ്സ് തിരികെ കിട്ടിയ സന്തോഷത്തിൽ സോനം പങ്കുവെച്ച വീഡിയോ ഇതിനോടകം ലക്ഷക്കണക്കിന് ആളുകളാണ് കണ്ടത്. ജപ്പാൻകാരുടെ ഈ മാതൃകാപരമായ പ്രവൃത്തിയെ പ്രകീർത്തിച്ച് നിരവധി പേർ വീഡിയോയ്ക്ക് താഴെ കമന്റുകളുമായും എത്തുന്നുണ്ട്.
