Malayali woman detained; യുകെയിൽ ഉപരിപഠനത്തിന് പോയ മകൾ സുരക്ഷിതയാണോ എന്നും അവളുടെ നിലവിലെ സ്ഥിതി എന്താണെന്നും അറിയാൻ ഇടപെടണമെന്ന് ആവശ്യപ്പെട്ട് മാതാപിതാക്കൾ നൽകിയ ഹർജിയിൽ, യുവതിയുടെ വിവരങ്ങൾ ശേഖരിച്ച് അറിയിക്കാൻ ഇന്ത്യൻ ഹൈക്കമ്മിഷന് ഹൈക്കോടതി നിർദേശം നൽകി. കോഴിക്കോട് സ്വദേശികളായ മാതാപിതാക്കളാണ് ഇതിനായി കോടതിയെ സമീപിച്ചത്.സാധ്യമെങ്കിൽ യുവതിയുടെ നേരിട്ടുള്ള മൊഴിയെടുത്ത് 15 ദിവസത്തിനകം റിപ്പോർട്ട് നൽകാനാണ് ജസ്റ്റിസ് പി.വി. കുഞ്ഞിക്കൃഷ്ണൻ നിർദേശിച്ചിരിക്കുന്നത്. ഹർജി ഈ മാസം 28-ന് കോടതി വീണ്ടും പരിഗണിക്കും.മകൾ ഉപരിപഠനത്തിനായി ഇന്ത്യയിൽ നിന്ന് പോയതിനുശേഷം അവളുടെ സുരക്ഷയെക്കുറിച്ചോ ക്ഷേമത്തെക്കുറിച്ചോ യാതൊരു വിവരവുമില്ലെന്ന് മാതാപിതാക്കൾ ഹർജിയിൽ വ്യക്തമാക്കുന്നു. അവൾ മറ്റൊരാളോടൊപ്പമാണ് താമസിക്കുന്നതെന്നും എന്നാൽ ഇയാൾ മകളെ നിയമവിരുദ്ധമായി തടഞ്ഞുവച്ചിരിക്കുകയാണെന്നുമാണ് മാതാപിതാക്കളുടെ പ്രധാന ആരോപണം.
ഈ വിഷയം ചൂണ്ടിക്കാട്ടി മാതാപിതാക്കൾ നേരത്തെ ഇന്ത്യൻ ഹൈക്കമ്മിഷനെ സമീപിച്ചിരുന്നു. തുടർന്ന് ഹൈക്കമ്മിഷൻ ഉദ്യോഗസ്ഥർ യുവതിയോടൊപ്പം കഴിയുന്നയാളെ ബന്ധപ്പെട്ടിരുന്നു. എന്നാൽ തങ്ങൾ ഇരുവരും സ്വന്തം ഇഷ്ടപ്രകാരവും സന്തോഷത്തോടെയുമാണ് ഒപ്പമുള്ളതെന്നും ആരുടെയും നിർബന്ധമോ തടഞ്ഞുവയ്ക്കലോ ഇതിനു പിന്നിലില്ലെന്നുമാണ് ഇയാൾ മറുപടി നൽകിയതെന്ന് ഹൈക്കമ്മിഷൻ മാതാപിതാക്കളെ അറിയിക്കുകയായിരുന്നു. എങ്കിലും, മകളെ നിയമവിരുദ്ധമായി തടഞ്ഞുവച്ചിരിക്കാമെന്ന മാതാപിതാക്കളുടെ ആശങ്കയും ഗൗരവവും കണക്കിലെടുത്താണ് ഹൈക്കോടതി ഈ നിർണായക ഉത്തരവ് പുറപ്പെടുവിച്ചത്.