Indian passport services UAE tender; യുഎഇയിലെ ഇന്ത്യൻ മിഷനുകളിൽ പാസ്‌പോർട്ട്, വിസ, മറ്റ് കോൺസുലർ സേവനങ്ങൾ എന്നിവ നൽകുന്നതിനുള്ള ഔട്ട്‌സോഴ്‌സിംഗ് ടെണ്ടർ നടപടികൾ റദ്ദാക്കിയ ഡൽഹി ഹൈക്കോടതി വിധി സുപ്രീം കോടതി ശരിവെച്ചു. കേന്ദ്ര വിദേശകാര്യ മന്ത്രാലയം നൽകിയ അപ്പീൽ ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് തള്ളി. എന്നാൽ, പുതിയ ടെണ്ടർ നടപടികൾ പൂർത്തിയാക്കുന്നതുവരെ യുഎഇയിലെ പ്രവാസികൾക്ക് സേവനങ്ങൾ തടസ്സമില്ലാതെ ലഭിക്കാൻ താൽക്കാലിക ക്രമീകരണങ്ങൾ ചെയ്യാമെന്നും കോടതി വ്യക്തമാക്കിയിട്ടുണ്ട്. ടെണ്ടർ നടപടികളിലെ സുതാര്യതയില്ലായ്മയും സാങ്കേതിക മൂല്യനിർണ്ണയത്തിലെ അപാകതകളും ചൂണ്ടിക്കാട്ടിയാണ് ജൂലൈ 15-ന് ഡൽഹി ഹൈക്കോടതി വിദേശകാര്യ മന്ത്രാലയത്തിന്റെ ടെണ്ടർ നടപടികൾ റദ്ദാക്കിയത്. ഈ വിധി ഭരണഘടനയുടെ 14-ാം അനുച്ഛേദം ഉറപ്പുനൽകുന്ന തുല്യനീതിയുടെ ലംഘനമാണെന്നും ഹൈക്കോടതി നിരീക്ഷിച്ചിരുന്നു. സർക്കാരിന്റെ അപ്പീൽ പരിഗണിക്കവെ, ടെണ്ടർ നടപടികൾ ആരംഭിച്ച ശേഷം അതിലെ നിബന്ധനകളിൽ മാറ്റം വരുത്താൻ കഴിയില്ലെന്ന് സുപ്രീം കോടതിയും വ്യക്തമാക്കി. നിയമനടപടികൾ കാരണം യുഎഇയിലെ പ്രവാസികൾക്ക് പാസ്‌പോർട്ട്, വിസ സേവനങ്ങളിൽ തടസ്സമുണ്ടാകരുതെന്ന് സുപ്രീം കോടതിക്ക് പ്രത്യേക നിർബന്ധമുണ്ടായിരുന്നു. അതിനാൽ, ഹൈക്കോടതി വിധിയിൽ സുപ്രീം കോടതി ചില ഭേദഗതികൾ വരുത്തി. പുതിയ ടെണ്ടർ നടപടികൾ പൂർത്തിയാക്കാൻ മന്ത്രാലയത്തിന് മൂന്ന് മാസത്തെ സമയം അനുവദിച്ചു. ഈ കാലയളവിൽ നിലവിലുള്ള സേവന ദാതാക്കളെയോ അല്ലെങ്കിൽ നേരത്തെ തിരഞ്ഞെടുക്കപ്പെട്ട കമ്പനികളെയോ താൽക്കാലികമായി ഉപയോഗപ്പെടുത്തി സേവനങ്ങൾ തുടരാം. നേരത്തെ ബി.എൽ.എസ് ഇന്റർനാഷണൽ, എസ്.ജി.ഐ.വി.എസ് ഗ്ലോബൽ എന്നീ കമ്പനികളായിരുന്നു യുഎഇയിൽ ഈ സേവനങ്ങൾ നൽകിയിരുന്നത്. എന്നാൽ പുതിയ ടെണ്ടറിൽ അൽഹിന്ദ് ടൂർസ് ആൻഡ് ട്രാവൽസിനെയാണ് മന്ത്രാലയം തിരഞ്ഞെടുത്തത്. ഇതിനെതിരെ മറ്റു കമ്പനികൾ കോടതിയെ സമീപിക്കുകയായിരുന്നു. നിലവിൽ നിയമതടസ്സങ്ങൾ നിലനിൽക്കുന്നതിനാൽ അബുദാബിയിലെ ഇന്ത്യൻ എംബസിയിലും ദുബായിലെ കോൺസുലേറ്റിലും നേരിട്ടാണ് പാസ്‌പോർട്ട്, കോൺസുലർ സേവനങ്ങൾ നൽകുന്നത്. കോടതി വിധി വന്ന സാഹചര്യത്തിൽ മൂന്ന് മാസത്തിനുള്ളിൽ പുതിയ ടെണ്ടർ നടപടികൾ പൂർത്തിയാക്കി സേവനം പൂർവ്വസ്ഥിതിയിലാക്കാൻ വിദേശകാര്യ മന്ത്രാലയത്തിന് സാധിക്കും.