വർഷത്തിൽ ഭൂരിഭാഗം ദിവസങ്ങളിലും സമൃദ്ധമായി സൂര്യപ്രകാശം ലഭിക്കുന്ന രാജ്യമാണ് ഇന്ത്യ. എന്നിട്ടും ഏകദേശം 90 ശതമാനം ആളുകൾ വൈറ്റമിൻ ഡിയുടെ കുറവ് അനുഭവിക്കുന്നുണ്ടെന്നാണ് ആരോഗ്യവിദഗ്ധരുടെ വിലയിരുത്തൽ. സൂര്യപ്രകാശം ചർമത്തിൽ പതിക്കുമ്പോൾ ശരീരം സ്വാഭാവികമായി ഉൽപാദിപ്പിക്കുന്നതിനാലാണ് വൈറ്റമിൻ ഡിയെ ‘സൺഷൈൻ വൈറ്റമിൻ’ എന്ന് വിളിക്കുന്നത്. എന്നാൽ ജീവിതശൈലിയിലെ മാറ്റങ്ങൾ ഈ പോഷകത്തിന്റെ കുറവിലേക്ക് നയിക്കുന്ന പ്രധാന കാരണങ്ങളിലൊന്നായി മാറിയിരിക്കുകയാണ്. അസ്ഥികളുടെ ആരോഗ്യം, പേശികളുടെ ബലം, പ്രതിരോധശേഷി, മാനസികാരോഗ്യം എന്നിവ നിലനിർത്തുന്നതിൽ വൈറ്റമിൻ ഡി നിർണായക പങ്കുവഹിക്കുന്നു. അതിനാൽ ഇതിന്റെ അപര്യാപ്തത വിവിധ ആരോഗ്യപ്രശ്നങ്ങൾക്ക് വഴിവെക്കാം.
എന്തുകൊണ്ടാണ് കുറവ് സംഭവിക്കുന്നത്?
ഇന്ന് പലരും സമയം ചെലവഴിക്കുന്നത് ഓഫീസുകളിലും എയർ കണ്ടീഷൻ ചെയ്ത ഇടങ്ങളിലുമാണ്. പുറത്തിറങ്ങുമ്പോഴും സൺസ്ക്രീൻ, കുട, ശരീരം മുഴുവൻ മൂടുന്ന വസ്ത്രങ്ങൾ, വായുമലിനീകരണം എന്നിവ ചർമത്തിലേക്ക് എത്തുന്ന UVB കിരണങ്ങളുടെ അളവ് കുറയ്ക്കുന്നു. ഇതോടെ ആവശ്യത്തിന് സൂര്യപ്രകാശം ലഭിച്ചാലും ശരീരത്തിന് വൈറ്റമിൻ ഡി ഉൽപാദിപ്പിക്കാൻ കഴിയാതെ വരും.
ഇന്ത്യക്കാരിൽ പൊതുവെ കാണപ്പെടുന്ന ഇരുണ്ട ചർമനിറവും ഒരു കാരണമാണ്. ചർമത്തിലെ മെലാനിൻ അൾട്രാവയലറ്റ് കിരണങ്ങളിൽ നിന്ന് സംരക്ഷണം നൽകുന്നുവെങ്കിലും, അതേ സമയം വൈറ്റമിൻ ഡി രൂപപ്പെടാൻ കൂടുതൽ സമയം സൂര്യപ്രകാശത്തിൽ ചെലവഴിക്കേണ്ട സാഹചര്യം സൃഷ്ടിക്കും.
ശ്രദ്ധിക്കേണ്ട ലക്ഷണങ്ങൾ
വൈറ്റമിൻ ഡിയുടെ കുറവ് പലപ്പോഴും വ്യക്തമായ ലക്ഷണങ്ങൾ കാണിക്കാറില്ല. എന്നാൽ ചിലരിൽ താഴെ പറയുന്ന പ്രശ്നങ്ങൾ ഉണ്ടാകാം:
-സ്ഥിരമായ ക്ഷീണം
-പേശി ബലഹീനത
-ശരീരവേദനയും നടുവേദനയും
-ഊർജക്കുറവ്
-ഇടയ്ക്കിടെയുള്ള അണുബാധകൾ
ഈ ലക്ഷണങ്ങൾ മറ്റ് പല ആരോഗ്യപ്രശ്നങ്ങളുമായും സാമ്യമുള്ളതിനാൽ പലരും അവഗണിക്കാറുണ്ട്. എന്നാൽ ചികിത്സ വൈകുമ്പോൾ പ്രശ്നം ഗുരുതരമാകാൻ സാധ്യതയുണ്ട്.
ഭക്ഷണം മാത്രം മതിയോ?
മുട്ടയുടെ മഞ്ഞക്കരു, കൊഴുപ്പുള്ള മത്സ്യം, പോഷകസമൃദ്ധമായ പാൽ, കൂൺ എന്നിവയിൽ വൈറ്റമിൻ ഡി അടങ്ങിയിട്ടുണ്ടെങ്കിലും, ഭക്ഷണത്തിലൂടെ മാത്രം ശരീരത്തിന് ആവശ്യമായ അളവ് ലഭിക്കണമെന്നില്ലെന്നാണ് വിദഗ്ധരുടെ അഭിപ്രായം. അതേസമയം, ഡോക്ടറുടെ നിർദേശമില്ലാതെ വൈറ്റമിൻ ഡി സപ്ലിമെന്റുകൾ കഴിക്കുന്നത് ഒഴിവാക്കണം. രക്തപരിശോധനയിലൂടെ കുറവുണ്ടെന്ന് സ്ഥിരീകരിച്ച ശേഷം മാത്രമേ എത്ര അളവിൽ സപ്ലിമെന്റുകൾ ആവശ്യമാണെന്ന് തീരുമാനിക്കാവൂ. ശരിയായ മെഡിക്കൽ നിർദേശപ്രകാരമുള്ള ചികിത്സയിലൂടെയാണ് വൈറ്റമിൻ ഡി കുറവ് സുരക്ഷിതമായി പരിഹരിക്കേണ്ടത്.
