Qatar weather warning; ഖത്തറിൽ ഈ വാരാന്ത്യത്തിൽ ശക്തമായ കാറ്റിനും കടൽക്ഷോഭത്തിനും സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകി. ജൂൺ 25 വ്യാഴാഴ്ച മുതൽ രാജ്യത്തിന്റെ വിവിധ ഭാഗങ്ങളിൽ ശക്തമായ കാറ്റ് വീശാൻ സാധ്യതയുണ്ടെന്നും പകൽ സമയങ്ങളിൽ ചിലയിടങ്ങളിൽ പൊടിക്കാറ്റ് അനുഭവപ്പെട്ടേക്കാമെന്നും അധികൃതർ അറിയിച്ചു. ശക്തമായ കാറ്റും കടൽക്ഷോഭവും വെള്ളിയാഴ്ച പുലർച്ചെ വരെ തുടരാൻ സാധ്യതയുണ്ട്. കടൽ അതീവ പ്രക്ഷുബ്ധമാകാൻ സാധ്യതയുള്ളതിനാൽ തീരപ്രദേശങ്ങളിൽ ഉള്ളവർ ജാഗ്രത പാലിക്കണം. വരും ദിവസങ്ങളിൽ കടുത്ത ചൂട് അനുഭവപ്പെടുമെന്നാണ് പ്രവചനം. കുറഞ്ഞ താപനില 31 ഡിഗ്രി സെൽഷ്യസും പരമാവധി താപനില 44 ഡിഗ്രി സെൽഷ്യസും വരെ രേഖപ്പെടുത്തിയേക്കാം.

വ്യാഴാഴ്ച: വടക്കുപടിഞ്ഞാറൻ കാറ്റ് മണിക്കൂറിൽ 12 മുതൽ 22 നോട്ട്സ് വേഗതയിൽ വീശും. ചില സമയങ്ങളിൽ ഇത് 32 നോട്ട്സ് വരെ ഉയരാൻ സാധ്യതയുണ്ട്. തിരമാലകൾ 3 മുതൽ 6 അടി വരെയും, ഉൾക്കടലിൽ 10 അടി വരെയും ഉയർന്നേക്കാം.

വെള്ളിയാഴ്ച: കാറ്റിന്റെ വേഗത 4 മുതൽ 14 നോട്ട്സ് വരെയായിരിക്കുമെങ്കിലും ചിലയിടങ്ങളിൽ 24 നോട്ട്സ് വരെ ഉയർന്നേക്കാം. തിരമാലകൾ 8 അടി വരെ ഉയരാൻ സാധ്യതയുള്ളതിനാൽ കടലിൽ പോകുന്നവർ ശ്രദ്ധിക്കണം.

ശനിയാഴ്ച: കാറ്റിന്റെ വേഗത കുറയുമെന്നാണ് പ്രതീക്ഷിക്കുന്നത് (3 മുതൽ 13 നോട്ട്സ് വരെ). എങ്കിലും ചിലയിടങ്ങളിൽ 21 നോട്ട്സ് വേഗതയിൽ കാറ്റ് വീശാൻ സാധ്യതയുണ്ട്.

മോശം കാലാവസ്ഥ നിലനിൽക്കുന്ന സാഹചര്യത്തിൽ ഔദ്യോഗിക അറിയിപ്പുകൾ ശ്രദ്ധിക്കണമെന്നും സുരക്ഷാ മുൻകരുതലുകൾ സ്വീകരിക്കണമെന്നും കാലാവസ്ഥാ വകുപ്പ് ജനങ്ങളോട് അഭ്യർത്ഥിച്ചു.