Pravasiinfo

വളരെ കുറഞ്ഞ തുക നിക്ഷേപിച്ച് ഭാവി ലക്ഷ്യങ്ങളിലേക്ക് എത്തിച്ചേരാൻ ആഗ്രഹിക്കുന്നവർ കൂടുതലായി ആശ്രയിക്കുന്ന നിക്ഷേപമാർഗമാണ് ചെറു സമ്പാദ്യ പദ്ധതികൾ. ഒക്‌റ്റോബർ ഒന്നു മുതൽ ഇവയുടെ പലിശ നിരക്ക് വർധിപ്പിച്ചിട്ടുണ്ട്. ജനപ്രിയമായ അഞ്ച് ചെറു സമ്പാദ്യ പദ്ധതികൾ പരിചയപ്പെടാം.

എന്നും മുന്നിൽ പിപിഎഫ്
ഏറ്റവും സുരക്ഷിതവും ജനപ്രിയവുമായൊരു നിക്ഷേപ മാർഗമാണ് പബ്ലിക് പ്രൊവിഡന്റ് ഫണ്ട് അഥവാ പിപിഎഫ്. 15 വർഷം കാലാവധിയുള്ള ഈ നിക്ഷേപത്തിന്റെ പലിശ നിരക്ക് ഓരോ പാദത്തിലും നിശ്ചിയിക്കും.ഒക്ടോബർ ഒന്നു മുതൽ ഡിസംബർ വരെയുള്ള കാലയളവിലെ പലിശ നിരക്ക് 8 ശതമാനമാണ്.കുറഞ്ഞത് അഞ്ഞൂറു രൂപ മുതൽ പരമാവധി 1.5 ലക്ഷം രൂപ വരെ ഇതിൽ നിക്ഷേപിക്കാനാകും. ഏഴു വർഷം പൂർത്തിയാക്കിയാൽ ഭാഗികമായി നിക്ഷേപം പിൻവലിക്കാനാകും. അക്കൗണ്ട് നിലനിർത്താൻ ഓരോ വർഷവും 500 രൂപയെങ്കിലും നിക്ഷേപിച്ചിരിക്കണം.ആദായ നികുതി നിയമത്തിലെ 80 സി വകുപ്പനുസരിച്ച് നികുതി കിഴിവിന് അർഹതയുണ്ട്. പിപിഎഫിലെ നിക്ഷേപം, പലിശ, പിൻവലിക്കുന്ന തുക ഇവയെല്ലാം പൂർണമായും നികുതി മുക്തമാണ്. നിക്ഷേപം തുടങ്ങി മൂന്നു മുതൽ ആറു വർഷം വരെ ഇതിൽ നിന്നു വായ്പ എടുക്കാൻ സൗകര്യമുണ്ട്. മൂന്നു വർഷം വരെയാണ് വായ്പ അനുവദിക്കുന്നത്. ഏഴാം വർഷം മുതൽ നിബന്ധനകൾക്കു വിധേയമായി ഭാഗികമായ പിൻവലിക്കലും സാധ്യമാണ്.പോസ്റ്റ് ഓഫീസ് വഴിയോ എസ്ബിഐ, എച്ച്ഡിഎഫ്‌സി ബാങ്ക്, ഐസിഐസിഐ ബാങ്ക്, പഞ്ചാബ് നാഷണൽ ബാങ്ക്, ആക്‌സിസ് ബാങ്ക് കുടങ്ങിയ ധനകാര്യ സ്ഥാപനങ്ങൾ വഴിയോ പിപിഎഫ് എക്കൗണ്ട് തുറക്കാം. മറ്റൊരു ശാഖയിലേക്ക് പിപിഎഫ് എക്കൗണ്ട് മാറ്റാനുള്ള സൗകര്യവുമുണ്ട്.

സ്ഥിരവരുമാനത്തിന് പോസ്റ്റ് ഓഫീസ് മന്ത്‌ലി സേവിംഗ്‌സ് സ്‌കീം
മൂലധനം സംരക്ഷിച്ചുകൊണ്ട് സ്ഥിര വരുമാനം നേടണമെന്ന് ആഗ്രഹിക്കുന്നവർക്ക് അനുയോജ്യമായ നിക്ഷേപമാർഗമാണിത്. നിലവിൽ പോസ്റ്റ് ഓഫീസ് മന്ത്‌ലി സേവിംഗ്‌സ് സ്‌കീമിന്റെ (പിഒഎംഎസ്എസ്) പലിശ നിരക്ക് 7.7 ശതമാനമാണ്. രാജ്യത്തെ എല്ലാ പോസ്റ്റ് ഓഫീസുകൾ വഴിയും പദ്ധതിയിൽ നിക്ഷേപിക്കാം. അഞ്ചു വർഷമാണ് കാലാവധി. മാസാമാസം പലിശ ലഭിക്കും. വ്യക്തികൾക്കോ ജോയിന്റായോ എക്കൗണ്ട് തുറക്കാം. ഏറ്റവും കുറഞ്ഞ നിക്ഷേപ തുക 1500 രൂപയാണ്. പരമാവധി തുക സിംഗിൾ എക്കൗണ്ടുകൾക്ക് നാലു ലക്ഷം രൂപയും ജോയ്ന്റ് എക്കൗണ്ടുകൾക്ക് ഒൻപത് ലക്ഷം രൂപയുമാണ്. നികുതി ദായകന്റെ നികുതി ബ്രാക്കറ്റ് അനുസരിച്ച് പലിശയ്ക്ക് നികുതി നൽകണം. എന്നാൽ പലിശയ്ക്ക് സ്രോതസിൽ നികുതി കിഴിക്കില്ല. നിക്ഷേപ തുകയ്ക്ക് 80 സി വകുപ്പ് പ്രകാരമുള്ള ഇളവ് ലഭിക്കും. ഒരു വർഷത്തിനു ശേഷം കാലവധിക്കു മുൻപുള്ള പിൻവലിക്കൽ അനുവദിക്കുന്നതാണ്. എന്നാൽ അതിന് പെനാൽറ്റി നൽകേണ്ടി വരും.

സുരക്ഷിതം എൻഎസ്‌സി
അടുത്തിടെ ചെറുകിട നിക്ഷേപങ്ങളുടെ പലിശ നിരക്ക് വർധിപ്പിച്ചതോടെ നാഷണൽ സേവിംഗ്‌സ് സർട്ടിഫിക്കറ്റിന്റെ (എൻഎസ്‌സി) പലിശ നിരക്ക് എട്ടു ശതമാനമായി.പദ്ധതിയിൽ ചേരാനുള്ള മിനിമം തുക 100 രൂപയാണ്. പിന്നെ നൂറിന്റെ ഗുണിതങ്ങളായി എത്ര വേണമെങ്കിലും നിക്ഷേപിക്കാം. അഞ്ചു വർഷമാണ് ലോക്ക് ഇൻ പീരിയഡ്. നിക്ഷേപത്തിന്റെ പലിശ കണക്കാക്കുന്നത് വാർഷിക അടിസ്ഥാനത്തിലാണെങ്കിലും കാലാവധി പൂർത്തിയാക്കുമ്പോൾ മാത്രമാണ് തുക ലഭിക്കുക.

എൻഎസ്‌സിയിൽ 1.50 ലക്ഷം രൂപ വരെയുള്ള നിക്ഷേപത്തിന് നികുതി നിയമത്തിന്റെ 80 സി വകുപ്പ് പ്രകാരം കിഴിവ് ലഭിക്കും. എൻഎസ്‌സിയിലൂടെ ലഭിക്കുന്ന പലിശ പുനർനിക്ഷേപിക്കുന്നതായി കണക്കാക്കി അതിനും നികുതി കിഴിവ് നൽകുന്നുണ്ട്. ഉറവിടത്തിലുള്ള നികുതി കിഴിവ് എൻഎസ്‌സിക്ക് ബാധകമല്ല. എന്നിരുന്നാലും അവസാന വർഷത്തെ പലിശ തിരിച്ചു നിക്ഷേപിക്കാതെ കാലാവധി പൂർത്തിയാകുമ്പോൾ നൽകുന്നതാണ്. ആ തുകയ്ക്ക് നികുതി നൽകേണ്ടതുണ്ട്.

രാജ്യത്തെവിടെയുമുള്ള പോസ്റ്റ് ഓഫീസുകൾ വഴി നിക്ഷേപിക്കാം. പലതരത്തിലുള്ള സർട്ടിഫിക്കറ്റുകൾ ഇതിൽ വരുന്നുണ്ട്. സിംഗിൾ ഹോൾഡർ സർട്ടിഫിക്കറ്റ്- സ്വന്തമായോ അല്ലെങ്കിൽ മൈനർക്കു വേണ്ടിയോ നടത്തുന്നത്, ജോയ്ന്റ് എ ടൈപ്പ് സർട്ടിഫിക്കറ്റ്- രണ്ട് പേർ ചേർന്ന് തുല്യമായി മച്യുരിറ്റി തുക പങ്കിടുന്നത്, പിന്നെ ജോയ്ന്റ് ബി ടൈപ്പ് സർഫിക്കറ്റ്- നിക്ഷേപകരിൽ ആർക്കെങ്കിലും ഒരാൾക്ക് മാത്രം മച്യുരിറ്റി തുക നൽകുന്നത് എന്നിവയാണത്.

മകൾക്കായി സുകന്യ സമൃദ്ധി യോജന
പെൺകുട്ടികൾക്കായി കേന്ദ്ര സർക്കാർ ആരംഭിച്ച ലഘുസമ്പാദ്യ പദ്ധതിയാണ് സുകന്യ സമൃദ്ധി യോജന (SSY). പെൺകുട്ടിയുടെ രക്ഷിതാവിനോ മാതാപിതാക്കൾക്കോ എസ്.എസ്.വൈ എക്കൗണ്ട് തുടങ്ങാം. കുട്ടിയുടെ ജനന സർട്ടിഫിക്കറ്റ് ഹാജരാക്കിയാൽ മതി. 10 വയസ് പൂർത്തിയാകുന്നതിന് മുൻപേ പദ്ധതിയിൽ ചേരണം.എസ്.എസ്.വൈ എക്കൗണ്ട് ആരംഭിക്കുന്നതിനുള്ള കുറഞ്ഞ നിക്ഷേപം 250 രൂപയാണ് (മുൻപ് ഇത് 1,000 രൂപയായിരുന്നു). നൂറി ന്റെ ഗുണിതങ്ങളായി നിക്ഷേപം നടത്താവുന്നതാണ്. പരമാവധി വാർഷിക നിക്ഷേപം 1.50 ലക്ഷം രൂപയാണ്. 14 വർഷം വരെ നിക്ഷേപം നടത്താം.ഒരു കുട്ടിക്ക് ഒരു എക്കൗണ്ട് മാത്രമേ തുറക്കാൻ സാധിക്കുകയുള്ളൂ. പെൺകുട്ടിക്ക് 21 വയസ്സ് ആകുമ്പോൾ പണം തിരിച്ചെടുക്കാം. 18 വയസ് കഴിഞ്ഞാൽ 50 ശതമാനം പണം പിൻവലിക്കാൻ സാധിക്കും. പെൺകുട്ടിക്ക് 21 വയസ് പൂർത്തിയായിട്ടും എക്കൗണ്ടിൽ നിന്ന് പണം പിൻവലിച്ചിട്ടില്ലെങ്കിൽ അതിനുശേഷമുള്ള കാലയളവിലെ പലിശ നിക്ഷേപിക്കുന്നതല്ല.ഈ പദ്ധതിയിൽ നിക്ഷേപിക്കുമ്പോൾ 1.50 ലക്ഷം രൂപയ്ക്കു വരെ ആദായനികുതി ഇളവ് ലഭിക്കും. 21 വയസിനു ശേഷം പിൻവലിക്കുന്ന തുകയ്ക്ക് നികുതി നൽകേണ്ടതില്ല. പോസ്റ്റ് ഓഫീസിലോ ബാങ്കിലോ എക്കൗണ്ട് തുടങ്ങാം.

മുതിർന്ന പൗരന്മാർക്ക് സീനിയർ സിറ്റിസൺസ് സേവിംഗ്‌സ് സ്‌കീം
അറുപതു വയസോ അതിൽ കൂടുതലോ പ്രായമുള്ള നിക്ഷേപ പദ്ധതിയാണ് സീനിയർ സിറ്റിസൺ സേവിംഗ്‌സ് സ്‌കീം (എസ്‌സിഎസ്എസ്). നിലവിൽ 8.7 ശതമാനമാണ് പലിശ നിരക്ക്. 15 ലക്ഷം രൂപ വരെ ഈ പദ്ധതി പ്രകാരം നിക്ഷേപിക്കാം. നഷ്ടസാധ്യത കുറവാണെന്നതും ഓരോ പാദത്തിലും പലിശ ലഭിക്കുമെന്നതും പദ്ധതിയെ ആകർഷകമാക്കുന്ന ഘടകങ്ങളാണ്. 1.50 ലക്ഷം രൂപ വരെയുള്ള നിക്ഷേപത്തിന് നികുതി നൽകേണ്ടതില്ല. അഞ്ചുവർഷം വരെ പണം പിൻവലിക്കാൻ സാധിക്കില്ല.അറുപതു വയസോ അതിൽ കൂടുതലോ പ്രായമുള്ള വ്യക്തികൾക്ക് വിവിധ കാലായളവുകളിലായി ഒന്നിലധികം എസ്‌സിഎസ്എസ് എക്കൗണ്ടുകൾ തുറക്കാവുന്നതാണ്. എന്നാൽ മൊത്തം നിക്ഷേപ തുക 15 ലക്ഷത്തിൽ കവിയാൻ പാടില്ല. അഞ്ചു വർഷം പൂർത്തിയാക്കിയാൽ മൂന്നു വർഷത്തേക്കു കൂടി നിക്ഷേപം ദീർഘിപ്പിക്കുവാനും സാധിക്കും. പോസ്റ്റ് ഓഫീസ്, പൊതുമേഖലാ ബാങ്കുകൾ, ഐസിഐസിഐ ബാങ്ക് തുടങ്ങിയ പ്രൈവറ്റ് ബാങ്കുകൾ വഴിയും നിക്ഷേപം നടത്താം.