Dubai long term visa; ദുബായിലേക്ക് പതിവായി യാത്ര ചെയ്യുന്നവർക്കും കുടുംബാംഗങ്ങളെ ഇടയ്ക്കിടെ അടുത്തേക്ക് കൊണ്ടുവരാൻ ആഗ്രഹിക്കുന്ന പ്രവാസികൾക്കും ഒരുപോലെ അനുഗ്രഹമാണ് യുഎഇയുടെ അഞ്ച് വർഷ മൾട്ടിപ്പിൾ എൻട്രി ടൂറിസ്റ്റ് വീസ. ഓരോ തവണയും പുതിയ ടൂറിസ്റ്റ് വീസ എടുക്കുന്നതിനുള്ള പണച്ചെലവും സമയനഷ്ടവും ഒഴിവാക്കാമെന്നതാണ് ഇതിന്റെ പ്രധാന നേട്ടം. യുഎഇയിലെ സ്പോൺസറോ മറ്റ് ഹോസ്റ്റോ ഇല്ലാതെ തന്നെ യോഗ്യതയുള്ള ആർക്കും ഈ ദീർഘകാല വീസയ്ക്ക് അപേക്ഷിക്കാം. ദുബായ് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (GDRFA Dubai) ആണ് ഈ സേവനം ലഭ്യമാക്കുന്നത്. ബിസിനസ് ആവശ്യങ്ങൾക്കും വിനോദസഞ്ചാരത്തിനും കുടുംബാംഗങ്ങളെ സന്ദർശിക്കാനുമെല്ലാം ഒരുപോലെ പ്രയോജനപ്പെടുന്നതാണ് ഈ സംവിധാനം.

താമസപരിധിയും പ്രധാന നിബന്ധനകളും

• 5 വർഷ കാലാവധി: വീസ അനുവദിച്ച് കഴിഞ്ഞാൽ അഞ്ച് വർഷത്തേക്ക് യുഎഇയിലേക്ക് എത്ര തവണ വേണമെങ്കിലും വന്നുപോകാം.
• താമസ കാലാവധി: ഒരു സന്ദർശനത്തിൽ തുടർച്ചയായി 90 ദിവസം വരെ താമസിക്കാം. ആവശ്യമായ മാനദണ്ഡങ്ങൾ പാലിച്ച് ഇത് 90 ദിവസത്തേക്ക് കൂടി (ആകെ 180 ദിവസം) നീട്ടാനാകും.
• പരമാവധി പരിധി: എന്നാൽ ഒരു കലണ്ടർ വർഷത്തിൽ ആകെ താമസിക്കാവുന്ന ദിവസങ്ങൾ 180-ൽ കൂടാൻ പാടില്ല.
• ദിവസങ്ങൾ മാറ്റിവെക്കാനാകില്ല: ഒരു സന്ദർശനത്തിൽ അനുവദിച്ച 90 ദിവസത്തിൽ ബാക്കിയുള്ളവ അടുത്ത വർഷത്തെ പരിധിയിലേക്ക് കൂട്ടിച്ചേർക്കാനാവില്ല.
• ആദ്യ പ്രവേശനം: വീസ അനുവദിച്ച തീയതി മുതൽ 60 ദിവസത്തിനകം യുഎഇയിൽ ആദ്യ സന്ദർശനം നടത്തിയിരിക്കണം (ആവശ്യമെങ്കിൽ ഇത് രണ്ട് മാസത്തേക്ക് കൂടി നീട്ടാം). ആദ്യമായി യുഎഇയിൽ പ്രവേശിക്കുന്ന ദിവസം മുതലാണ് ഒരു വർഷത്തെ കാലയളവ് കണക്കാക്കുന്നത്.

ആവശ്യമായ രേഖകളും യോഗ്യതകളും

• കുറഞ്ഞത് 6 മാസത്തെ കാലാവധിയുള്ള പാസ്‌പോർട്ട്.
• പുതിയ പാസ്‌പോർട്ട് സൈസ് ഫോട്ടോ.
• താമസകാലയളവ് പൂർണ്ണമായും കവർ ചെയ്യുന്ന യുഎഇ അംഗീകൃത ആരോഗ്യ ഇൻഷുറൻസ് (Health Insurance).
• മടക്കയാത്ര ഉൾപ്പെടെയുള്ള വിമാന ടിക്കറ്റ്.
• കഴിഞ്ഞ ആറ് മാസത്തെ ഔദ്യോഗിക ബാങ്ക് സ്റ്റേറ്റ്‌മെന്റ്.
• അപേക്ഷകന്റെ അക്കൗണ്ടിൽ കുറഞ്ഞത് 4,000 യുഎസ് ഡോളർ (ഏകദേശം 14,690 യുഎഇ ദിർഹം അല്ലെങ്കിൽ തത്തുല്യമായ തുക) ബാലൻസ് ഉണ്ടായിരിക്കണം.

അപേക്ഷിക്കേണ്ട വിധം

ജിഡിആർഎഫ്എ (GDRFA) ഔദ്യോഗിക വെബ്സൈറ്റ്, ആമർ (Amer) സർവീസ് സെന്ററുകൾ, കസ്റ്റമർ ഹാപ്പിനസ് സെന്ററുകൾ എന്നിവ വഴി വീസയ്ക്ക് അപേക്ഷിക്കാം.

• GDRFA വെബ്‌സൈറ്റ് സന്ദർശിച്ച് ‘യുഎഇ പാസ്’ (UAE PASS) വഴിയോ വ്യക്തിഗത അക്കൗണ്ട് വഴിയോ ലോഗിൻ ചെയ്യുക.
• സേവനങ്ങളുടെ പട്ടികയിൽ നിന്ന് ‘5-Year Tourist Entry Permit’ തിരഞ്ഞെടുക്കുക.
• ആവശ്യമായ വ്യക്തിഗത വിവരങ്ങളും പാസ്‌പോർട്ട് വിവരങ്ങളും കൃത്യമായി രേഖപ്പെടുത്തുക.
• പാസ്‌പോർട്ട് കോപ്പി, ഫോട്ടോ, ഇൻഷുറൻസ്, ബാങ്ക് സ്റ്റേറ്റ്‌മെന്റ്, റിട്ടേൺ ടിക്കറ്റ് തുടങ്ങിയ രേഖകൾ അപ്‌ലോഡ് ചെയ്യുക.
• തുടർന്ന് നിശ്ചിത ഫീസ് അടച്ച് അപേക്ഷ സമർപ്പിക്കാം.

പരിശോധനകൾക്ക് ശേഷം അപേക്ഷ അംഗീകരിക്കപ്പെട്ടാൽ രജിസ്റ്റർ ചെയ്ത മൊബൈൽ നമ്പറിലേക്ക് എസ്.എം.എസ് അറിയിപ്പും ഇമെയിൽ വിലാസത്തിലേക്ക് വീസയുടെ ഡിജിറ്റൽ കോപ്പിയും ലഭിക്കും.