Air India Express New Flights; യുഎഇയിലെ ഇന്ത്യൻ പ്രവാസികൾക്ക് ഏറെ ആശ്വാസകരമായ വാർത്തയുമായി എയർ ഇന്ത്യ എക്സ്പ്രസ്. അബുദാബി സായിദ് രാജ്യാന്തര വിമാനത്താവളത്തിൽ നിന്ന് ഇന്ത്യയിലെ നാല് പ്രധാന നഗരങ്ങളിലേക്ക് കൂടി പുതിയ നേരിട്ടുള്ള സർവീസുകൾ എയർലൈൻ പ്രഖ്യാപിച്ചു. നവി മുംബൈ, ഇൻഡോർ, ലഖ്നൗ എന്നിവിടങ്ങളിലേക്കുള്ള സർവീസുകൾ ഇതിനോടകം ആരംഭിച്ചു കഴിഞ്ഞു. അസമിലെ ഗുവാഹത്തിയിലേക്കുള്ള നേരിട്ടുള്ള വിമാനം ഓഗസ്റ്റ് ഏഴ് മുതലാണ് സർവീസ് തുടങ്ങുകയെന്ന് അബുദാബി എയർപോർട്സ് അധികൃതർ അറിയിച്ചു. യുഎഇക്കും ഇന്ത്യയ്ക്കും ഇടയിൽ യാത്ര ചെയ്യുന്നവരുടെ എണ്ണം വർധിച്ചുവരുന്ന സാഹചര്യത്തിലാണ് സർവീസുകൾ വിപുലീകരിക്കാൻ എയർലൈൻ തീരുമാനിച്ചത്. പുതിയ റൂട്ടുകൾ നിലവിൽ വരുന്നതോടെ യാത്രികർക്ക് കൂടുതൽ സമയക്രമങ്ങളും തിരഞ്ഞെടുക്കാനുള്ള അവസരവും ലഭിക്കുമെന്ന് അബുദാബി എയർപോർട്സ് സിഇഒ അഹമ്മദ് ജുമാ അൽ ഷംസി പറഞ്ഞു. പ്രാദേശിക വിമാനക്കമ്പനികളുമായുള്ള ഈ സഹകരണം അബുദാബിയുടെ ടൂറിസം മേഖലയ്ക്കും സാമ്പത്തിക വളർച്ചയ്ക്കും വലിയ പിന്തുണയാകുമെന്നും അദ്ദേഹം കൂട്ടിച്ചേർത്തു. എയർ ഇന്ത്യ എക്സ്പ്രസിനെ സംബന്ധിച്ചിടത്തോളം ഏറ്റവും പ്രധാനപ്പെട്ട രാജ്യാന്തര വിപണിയാണ് യുഎഇ എന്ന് കമ്പനി ചെയർമാൻ നിപുൺ അഗർവാൾ വ്യക്തമാക്കി. വിമാനക്കമ്പനിയുടെ വളർച്ചയിൽ അബുദാബി നിർണ്ണായക പങ്ക് വഹിക്കുന്നുണ്ട്. സർവീസുകളുടെ എണ്ണവും വിമാനങ്ങളുടെ എണ്ണവും വർദ്ധിപ്പിക്കുന്നതിലൂടെ പ്രവാസികൾക്ക് കുറഞ്ഞ ചെലവിൽ യാത്ര ചെയ്യാനുള്ള സൗകര്യം ഒരുക്കുകയാണ് കമ്പനിയുടെ ലക്ഷ്യമെന്നും അദ്ദേഹം പറഞ്ഞു. നിലവിൽ ഇത്തിഹാദ് എയർവേസ്, ഇൻഡിഗോ, എയർ ഇന്ത്യ എക്സ്പ്രസ് തുടങ്ങിയ കമ്പനികൾ കൊച്ചി, മുംബൈ, ഡൽഹി തുടങ്ങിയ നഗരങ്ങളിലേക്ക് പ്രതിദിന സർവീസുകൾ നടത്തുന്നുണ്ട്. പുതിയ റൂട്ടുകൾ കൂടി യാഥാർത്ഥ്യമാകുന്നതോടെ ഇരുരാജ്യങ്ങളും തമ്മിലുള്ള വ്യോമബന്ധം കൂടുതൽ ശക്തമാകും. പ്രവാസികൾക്കും ബിസിനസ് ആവശ്യങ്ങൾക്കായി യാത്ര ചെയ്യുന്നവർക്കും ടൂറിസ്റ്റുകൾക്കും ഒരേപോലെ പ്രയോജനപ്പെടുന്ന രീതിയിലാണ് പുതിയ സർവീസുകൾ ക്രമീകരിച്ചിരിക്കുന്നത്. ആഴ്ചതോറും നൂറുകണക്കിന് വിമാനങ്ങളാണ് ഇപ്പോൾ ഇന്ത്യയ്ക്കും യുഎഇക്കും ഇടയിൽ സർവീസ് നടത്തുന്നത്.