Dubai Expat Success Story; അറബിക്കടലിന്റെ തിരമാലകൾക്ക് ഇന്നും എം.വി. കുഞ്ഞുമുഹമ്മദിനോട് പറയാൻ ആയിരം കഥകളുണ്ട്. 1967-ൽ, വെറും 22-ാം വയസ്സിൽ ഒരു പായ്മരക്കപ്പലിന്റെ ഡെക്കിൽ നിന്ന് ദുബായ് തീരത്തേക്ക് നോക്കിയ ആ യുവാവ് ഇന്ന് യുഎഇയിലെ പ്രമുഖ ബിസിനസ് ഗ്രൂപ്പായ ‘ജലീൽ ഹോൾഡിംഗ്‌സിൻ്റെ’ അമരക്കാരനാണ്. 58 വർഷം നീണ്ട അദ്ദേഹത്തിന്റെ പ്രവാസ ജീവിതം കേവലം ഒരു വിജയഗാഥ മാത്രമല്ല, കഠിനാധ്വാനത്തിന്റെയും അചഞ്ചലമായ വിശ്വാസത്തിന്റെയും ഹൃദയസ്പർശിയായ ചരിത്രം കൂടിയാണ്.തൃശ്ശൂർ വടക്കേക്കാട് സ്വദേശിയായ കുഞ്ഞുമുഹമ്മദ് ‘ഖ്വാജ മൊയ്തീൻ’ എന്ന മരക്കപ്പലിലാണ് ദുബായിലേക്ക് തിരിച്ചത്. എൻജിനില്ലാത്ത, കാറ്റിന്റെ ദിശയനുസരിച്ച് നീങ്ങുന്ന ആ കപ്പലിൽ ഒമാനിലെ ദിബ്ബ അൽ ബയയിൽ എത്താൻ 40 ദിവസമെടുത്തു. കൈവശം പാസ്‌പോർട്ടോ പണമോ ഉണ്ടായിരുന്നില്ല. ഒടുവിൽ തീരമണഞ്ഞപ്പോൾ കപ്പലിൽ നിന്ന് കടലിലേക്ക് ചാടുമ്പോൾ തന്റെ പക്കലുണ്ടായിരുന്ന ഏക സമ്പാദ്യം ധരിച്ചിരുന്ന ഒരു ലുങ്കിയും ഷർട്ടും മാത്രമായിരുന്നു. നനഞ്ഞൊട്ടിയ ആ വസ്ത്രങ്ങൾ പിഴിഞ്ഞ് ഉണക്കി ധരിച്ചാണ് അദ്ദേഹം മണലാരണ്യത്തിലേക്ക് ആദ്യ ചുവടുകൾ വെച്ചത്.ദിബ്ബയിൽ നിന്ന് ട്രക്കുകളിലും വാനുകളിലുമായി ഷാർജയിലെത്തുമ്പോൾ ഇന്നത്തെ ആധുനിക യുഎഇയുടെ അടയാളങ്ങളൊന്നും അവിടെയുണ്ടായിരുന്നില്ല. ടാർ ചെയ്ത റോഡുകൾക്ക് പകരം മൺപാതകൾ മാത്രമായിരുന്നു അന്നത്തെ ദുബായിൽ. “മുകളിൽ ഒന്നുമില്ലെങ്കിലും മണലിനടിയിൽ സ്വർണ്ണമുണ്ട്” എന്ന നാട്ടുകാരുടെ വാക്കുകൾ മാത്രമായിരുന്നു ഏക പ്രതീക്ഷ.

ഒരു പ്ലംബറുടെ സഹായിയായാണ് അദ്ദേഹം തന്റെ ജോലി ജീവിതം തുടങ്ങിയത്. ഒരു ദിവസം 5 ഖത്തർ ദുബായ് റിയാലായിരുന്നു അന്നത്തെ ശമ്പളം. കൈകൾ വിയർക്കുന്നതിനാൽ പ്ലംബിംഗ് ഉപകരണങ്ങൾ ശരിയായി പിടിക്കാൻ കഴിയാതിരുന്ന കുഞ്ഞുമുഹമ്മദിനെ ഒരാഴ്ചയ്ക്ക് ശേഷം ഉടമ പിരിച്ചുവിട്ടു. എന്നാൽ തന്റെ സത്യസന്ധത കണ്ട ഉടമ 20 ദിവസത്തെ ശമ്പളമായി 100 റിയാൽ നൽകിയത് അദ്ദേഹത്തിന് വലിയ ആശ്വാസമായി. പിന്നീട് മീൻപിടിത്ത കൂടകൾ നെയ്യുന്നതും പശുക്കളെ കറക്കുന്നതും പാത്രങ്ങൾ കഴുകുന്നതുമായ ജോലികൾ അദ്ദേഹം ചെയ്തു.
ജോലിയോടുള്ള ആത്മാർത്ഥതയാണ് അദ്ദേഹത്തിന്റെ ജീവിതം മാറ്റിയത്. ഒരു വീട്ടിൽ പാത്രം കഴുകുന്ന ജോലിക്കിടെ ഉടമയുടെ ചെളിപുരണ്ട കാർ അദ്ദേഹം സ്വയം കഴുകി വൃത്തിയാക്കി, അതിനുള്ളിൽ സുഗന്ധം പുകച്ചു. ഈ സമർപ്പണത്തിൽ ആകൃഷ്ടനായ ഉടമ അദ്ദേഹത്തിന്റെ ശമ്പളം വർദ്ധിപ്പിച്ചു. പിന്നീട് അന്നത്തെ റാസ് അൽ ഖൈമ ഭരണാധികാരി ഷെയ്ഖ് സഖർ ബിൻ മുഹമ്മദ് അൽ ഖാസിമിയുടെ വീട്ടിൽ ഡ്രൈവറായി ജോലി ലഭിച്ചതാണ് കുഞ്ഞുമുഹമ്മദിന്റെ ജീവിതത്തിലെ വലിയ വഴിത്തിരിവായത്. ഷെയ്ഖിന്റെ ഫാമിലെ പച്ചക്കറികൾ മാർക്കറ്റിൽ വിൽക്കാൻ തുടങ്ങിയതോടെ അദ്ദേഹത്തിനുള്ളിലെ ബിസിനസ്സുകാരൻ ഉണർന്നു.

1972-ൽ തന്റെ പ്രിയപ്പെട്ട അനിയന്റെ പേരിൽ ‘ജലീൽ ട്രേഡേഴ്സ്’ എന്ന സ്ഥാപനം അദ്ദേഹം രജിസ്റ്റർ ചെയ്തു. അൽ റാസിലെ ചെറിയൊരു കടയിൽ നിന്ന് തുടങ്ങിയ ആ ബിസിനസ് ഇന്ന് 1,700-ലധികം ജീവനക്കാരുള്ള ജലീൽ ഹോൾഡിംഗ്‌സ് എന്ന വൻകിട സാമ്രാജ്യമായി വളർന്നിരിക്കുന്നു. വഴിയിൽ സാമ്പത്തിക തകർച്ചകളും പരാജയങ്ങളും ഉണ്ടായെങ്കിലും തളരാതെ അദ്ദേഹം മുന്നോട്ട് നീങ്ങി. തന്റെ ജീവനക്കാരെ കുടുംബാംഗങ്ങളെപ്പോലെ കരുതുന്ന കുഞ്ഞുമുഹമ്മദ്, “തൊഴിലാളിയുടെ വിയർപ്പ് ഉണങ്ങുന്നതിന് മുമ്പ് അവന്റെ കൂലി നൽകുക” എന്ന തത്വം ഇന്നും കർശനമായി പാലിക്കുന്നു. 79-ാം വയസ്സിലും അദ്ദേഹം ദിവസവും ഓഫീസിൽ എത്തുന്നുണ്ട്; ജോലി ചെയ്യാനല്ല, മറിച്ച് തന്റെ കൂടെയുള്ള ആളുകളെ കാണാനും അവരുടെ ക്ഷേമം അന്വേഷിക്കാനും. സമീർ, ഡോ. സക്കീർ, അബ്ദുൾ ഗഫൂർ എന്നീ മൂന്ന് മക്കളും ഇന്ന് അദ്ദേഹത്തിന്റെ ബിസിനസ്സിലും ജീവിതത്തിലും വലിയ തണലായി കൂടെയുണ്ട്. ഇന്നും അറബിക്കടലിന്റെ തീരത്ത് നിൽക്കുമ്പോൾ, 58 വർഷം മുമ്പ് നനഞ്ഞ വസ്ത്രങ്ങളുമായി കരയ്ക്കിറങ്ങിയ ആ 22-കാരനെ കുഞ്ഞുമുഹമ്മദ് ഓർക്കുന്നു. ശൂന്യതയിൽ നിന്ന് ഒരു സാമ്രാജ്യം പടുത്തുയർത്തിയ ആ വലിയ മനുഷ്യൻ വിനയത്തോടെ പറയുന്നു: “ഇതെല്ലാം ദൈവത്തിന്റെ നിശ്ചയമായിരുന്നു, എന്റേത് വെറും വിശ്വാസം മാത്രമായിരുന്നു.”