സോഷ്യൽ മീഡിയയിലെ ഫോളോവേഴ്സ് ഇനി വെറും ജനപ്രീതിയുടെ കണക്കല്ല; പലർക്കും അത് വലിയ വരുമാന മാർഗം കൂടിയാണ്. പരസ്യങ്ങളും ബ്രാൻഡ് പ്രമോഷനുകളും മാത്രമല്ല, ഇൻസ്റാഗ്രാമിന്റെ Paid Subscription സംവിധാനത്തിലൂടെയും ഇന്ത്യൻ കണ്ടന്റ് ക്രിയേറ്റർമാർ വൻതുക നേടുന്നുണ്ട്. പണമടച്ച് സബ്സ്ക്രൈബ് ചെയ്യുന്നവർക്ക് മാത്രം ലഭിക്കുന്ന എക്സ്ക്ലൂസീവ് ഫോട്ടോകൾ, വീഡിയോകൾ, അപ്ഡേറ്റുകൾ തുടങ്ങിയവയാണ് ഈ സംവിധാനത്തിലൂടെ ക്രിയേറ്റർമാർ പങ്കുവയ്ക്കുന്നത്. ഫോളോവേഴ്സിൽ ഒരു വിഭാഗം പ്രതിമാസ ഫീസ് നൽകാൻ തയ്യാറാകുന്നതോടെ സ്ഥിരമായ വരുമാനം സൃഷ്ടിക്കാനാകുന്നു. കേരളത്തിൽ നിന്നുള്ള ഡിജിറ്റൽ ക്രിയേറ്റർ അശ്വിനി എ, ഇൻസ്റ്റഗ്രാമിൽ ‘Purple Halcyon’ എന്ന പേരിലാണ് അറിയപ്പെടുന്നത്. ഇവരുടെ സബ്സ്ക്രിപ്ഷൻ വരുമാനം പ്രതിമാസം ഒരു കോടി രൂപയിലേറെയാണെന്ന റിപ്പോർട്ടുകൾ നേരത്തെ പുറത്തുവന്നിരുന്നു. ഏകദേശം 25,000 സബ്സ്ക്രൈബർമാർ പ്രതിമാസം 400 രൂപ വീതം നൽകുന്നതായാണ് അന്നത്തെ കണക്കുകൾ സൂചിപ്പിച്ചത്. എന്നാൽ, ഒരു കോടി രൂപ പ്രതിമാസ വരുമാനം എന്ന കണക്ക് അശ്വിനി തന്നെ പിന്നീട് നിഷേധിച്ചു. സബ്സ്ക്രിപ്ഷൻ ഫീസിന്റെ മുഴുവൻ തുകയും ക്രിയേറ്റർക്ക് ലഭിക്കില്ലെന്നും Metaയുടെ വിഹിതവും നികുതികളും മറ്റ് ചെലവുകളും കുറയുന്നതിനാൽ യഥാർഥ വരുമാനം വ്യത്യാസപ്പെടുമെന്നും അവർ വ്യക്തമാക്കി.

അശ്വിനിയുടെ അഭിപ്രായത്തിൽ, സബ്സ്ക്രിപ്ഷനിലൂടെ വരുമാനം നേടുന്നത് എളുപ്പത്തിൽ പണം ലഭിക്കുന്ന മാർഗമല്ല. കണ്ടന്റ് തയ്യാറാക്കുന്നതിനും റീലുകൾ ഉൾപ്പെടെയുള്ളവയുടെ നിർമാണത്തിനും സമയവും പണവും ചെലവാകുന്നുണ്ടെന്നും അവർ പറഞ്ഞു. ദിവസവും മണിക്കൂറുകളോളം ജോലി ചെയ്താണ് കണ്ടന്റ് തയ്യാറാക്കുന്നതെന്നും അവർ പ്രതികരിച്ചിട്ടുണ്ട്. സിനിമാ താരങ്ങളും ഈ വരുമാന മാതൃക പരീക്ഷിക്കുന്നുണ്ട്. നടി അന്ന രാജനും ഇൻസ്റ്റഗ്രാം സബ്സ്ക്രിപ്ഷൻ ആരംഭിച്ചിട്ടുണ്ടെന്നും ഇത് തനിക്ക് ഒരു വരുമാന മാർഗമാണെന്നും വ്യക്തമാക്കിയിട്ടുണ്ട്. എന്നാൽ ഇൻസ്റ്റഗ്രാമിന്റെ കർശനമായ ഉള്ളടക്ക നയങ്ങൾ കാരണം അനുവദനീയമല്ലാത്ത കണ്ടന്റ് പങ്കുവയ്ക്കാൻ സാധിക്കില്ലെന്നും താരം പറഞ്ഞു.

ഇതോടെ ഇന്ത്യൻ ക്രിയേറ്റർ ഇക്കോസിസ്റ്റത്തിൽ പെയ്ഡ് സബ്സ്ക്രിപ്ഷൻ പുതിയ വരുമാന മോഡലായി മാറുകയാണ്. പരസ്യദാതാക്കളെ മാത്രം ആശ്രയിക്കാതെ നേരിട്ട് ആരാധകരിൽനിന്നും വരുമാനം നേടാനുള്ള അവസരമാണ് ഇതിലൂടെ ക്രിയേറ്റർമാർക്ക് ലഭിക്കുന്നത്. അതേസമയം, സോഷ്യൽ മീഡിയയിൽ പ്രചരിക്കുന്ന വരുമാന കണക്കുകൾ എല്ലാം ഔദ്യോഗികമായി സ്ഥിരീകരിച്ചവയല്ലെന്ന കാര്യവും ശ്രദ്ധിക്കണം. സബ്സ്ക്രൈബർമാരുടെ എണ്ണം, പ്ലാറ്റ്ഫോം ഫീസ്, നികുതി, കണ്ടന്റ് നിർമാണച്ചെലവ് തുടങ്ങിയ ഘടകങ്ങൾ പരിഗണിച്ച ശേഷമാണ് ഒരു ക്രിയേറ്ററുടെ യഥാർഥ വരുമാനം കണക്കാക്കേണ്ടത്.