ലോകത്തിന്റെ ഏതു കോണിലായാലും മലയാളികൾക്ക് ഓണം ആഘോഷിക്കാനുള്ള ആവേശം ഒട്ടും കുറയാറില്ല. ഒരുകാലത്ത് ഓണസദ്യയും പൂക്കളവും ബന്ധുക്കളുടെ സ്നേഹവും ആസ്വദിക്കാൻ നാട്ടിലേക്ക് പറന്നെത്തിയിരുന്ന പ്രവാസികൾ, ഓണം കഴിഞ്ഞശേഷം മാത്രമായിരുന്നു ഗൾഫിലേക്ക് മടങ്ങിയിരുന്നത്. എന്നാൽ കാലം മാറിയതോടെ ഈ പതിവിനും മാറ്റം വന്നിരിക്കുകയാണ്. തിരുവോണത്തിന്റെ തലേന്നുപോലും നാട്ടിലെ ആഘോഷങ്ങൾ പാതിവഴിയിൽ ഉപേക്ഷിച്ച് ഗൾഫിലേക്ക് മടങ്ങുന്ന പ്രവാസി കുടുംബങ്ങളുടെ എണ്ണം വർധിക്കുകയാണ്. കാരണം മറ്റൊന്നുമല്ല—കുത്തനെ ഉയർന്ന വിമാന ടിക്കറ്റ് നിരക്ക്.
വേനലവധിയും ഓണവും ഒരുമിച്ചെത്തുന്ന സമയമായതിനാൽ നാട്ടിലെത്തിയ പ്രവാസികൾക്ക് മടക്കയാത്രയാണ് ഇപ്പോൾ വലിയ തലവേദന. നാട്ടിലെത്താൻ ചെലവഴിച്ച തുകയേക്കാൾ കൂടുതലാണ് പല റൂട്ടുകളിലും മടക്ക ടിക്കറ്റിനായി നൽകേണ്ടിവരുന്നത്. കുടുംബസമേതമാണ് യാത്രയെങ്കിൽ ചെലവ് വീണ്ടും കുതിക്കും. നാല് പേരടങ്ങുന്ന കുടുംബത്തിന് മടക്കയാത്രയ്ക്കായി മാത്രം വലിയ തുക കണ്ടെത്തേണ്ടിവരുന്നത് പലരെയും യാത്രാ തീരുമാനങ്ങൾ പുനഃപരിശോധിക്കാൻ നിർബന്ധിതരാക്കുന്നു.
ഓണം ആഘോഷിക്കാനുള്ള ആഗ്രഹത്തിനും കുടുംബ ബജറ്റിനുമിടയിൽ കടുത്ത പ്രതിസന്ധിയിലാണ് പ്രവാസികൾ. യുഎഇ ഉൾപ്പെടെയുള്ള ഗൾഫ് രാജ്യങ്ങളിലേക്കുള്ള നിരവധി റൂട്ടുകളിൽ അവധിക്കാല തിരക്ക് വർധിച്ചതോടെയാണ് വിമാന നിരക്കും കുത്തനെ ഉയർന്നത്. ഓഗസ്റ്റ് രണ്ടാം പകുതിയിലേക്ക് കടക്കുമ്പോൾ നിരക്ക് ഇനിയും ഉയരുന്ന സാഹചര്യമാണ്. ഈ മാസം രണ്ടാം ആഴ്ചയിലെയും അവസാന ആഴ്ചയിലെയും നിരക്കുകളിൽ ചില റൂട്ടുകളിൽ വലിയ വ്യത്യാസമുണ്ട്. ചില സർവീസുകളിൽ സാധാരണ നിരക്കിന്റെ ഇരട്ടിയോളം വരെ ടിക്കറ്റ് നിരക്ക് ഉയർന്നതും യാത്രക്കാരെ ഞെട്ടിക്കുന്നു.
ഇതോടെ ഓണം കഴിഞ്ഞ് മടങ്ങാമെന്ന തീരുമാനത്തിൽ നിന്ന് പലരും പിന്നോട്ടുപോകുകയാണ്. തിരക്ക് കൂടുന്നതിന് മുമ്പേ ഗൾഫിലേക്ക് മടങ്ങാനാണ് വലിയൊരു വിഭാഗം പ്രവാസികളും ശ്രമിക്കുന്നത്. നാട്ടിലെ ഓണാഘോഷത്തിനായി മാറ്റിവച്ച അവധിയുടെ അവസാന ദിവസങ്ങൾ പോലും വിമാനത്താവളത്തിലേക്കുള്ള യാത്രയ്ക്കായി മാറ്റിവയ്ക്കേണ്ട സ്ഥിതിയാണ്. ചെലവ് കുറയ്ക്കാൻ യാത്രാ തീയതി മാറ്റുന്നവരും ഏറെയാണ്. നേരത്തെയോ വൈകിയോ യാത്ര ചെയ്യാൻ കഴിയുന്നവർ പീക്ക് ദിവസങ്ങൾ ഒഴിവാക്കി കുറഞ്ഞ നിരക്കിലുള്ള ടിക്കറ്റുകൾ തേടുന്നു. ലക്ഷ്യസ്ഥാനത്തിന് സമീപമുള്ള മറ്റൊരു വിമാനത്താവളം പരിഗണിക്കുന്നവരുമുണ്ട്. നേരിട്ടുള്ള സർവീസുകൾക്ക് പകരം കണക്റ്റിങ് വിമാനങ്ങൾ തിരഞ്ഞെടുക്കുന്നതും ചെലവ് കുറയ്ക്കാനുള്ള മറ്റൊരു മാർഗമായി മാറിയിട്ടുണ്ട്.
കുടുംബത്തിലെ ഒരാൾ നേരത്തെ മടങ്ങുകയും മറ്റുള്ളവർ പിന്നീട് എത്തുകയും ചെയ്യുന്ന രീതിയും ഇപ്പോൾ വ്യാപകമാകുന്നു. കുറഞ്ഞ നിരക്കുള്ള ദിവസം കണ്ടെത്തി ഗൃഹനാഥൻ നേരത്തെ ഗൾഫിലേക്ക് മടങ്ങുകയും ഭാര്യയും കുട്ടികളും പിന്നീട് എത്തുകയും ചെയ്യുന്ന കുടുംബങ്ങളുണ്ട്. ഭർത്താവിനെയും മക്കളെയും പിന്നീട് അയച്ച് ഉദ്യോഗസ്ഥയായ ഭാര്യമാർ നേരത്തെ മടങ്ങുന്ന സാഹചര്യങ്ങളും കാണാം. കുടുംബം ഒന്നിച്ച് മടങ്ങുമ്പോൾ ഉണ്ടാകുന്ന ഭീമമായ ചെലവ് ഒഴിവാക്കുകയാണ് ലക്ഷ്യം. അതേസമയം, ഓണത്തിന് നാട്ടിലെത്തണമെന്ന ആഗ്രഹം തന്നെ ഉപേക്ഷിക്കുന്ന പ്രവാസികളും കുറവല്ല. വേനലവധിക്കാലത്ത് നാട്ടിൽ പോകാതെ യുഎഇയിലും മറ്റ് ഗൾഫ് രാജ്യങ്ങളിലും തന്നെ തുടരുന്ന ഇന്ത്യൻ കുടുംബങ്ങളുടെ എണ്ണവും വർധിക്കുകയാണ്. അവധിക്കാലം നാട്ടിൽ ചെലവഴിക്കാനുള്ള ആഗ്രഹമുണ്ടെങ്കിലും വിമാന ടിക്കറ്റ് നിരക്ക് താങ്ങാനാകാത്തതായതോടെയാണ് പലരും യാത്ര മാറ്റിവയ്ക്കുന്നത്.
