പ്രവാസലോകത്തെ നൊമ്പരമായി സൽമാൻ; നിക്കാഹ് കഴിഞ്ഞത് മൂന്ന് മാസം മുൻപ്, വിവാഹ സ്വപ്നങ്ങൾ ബാക്കിയാക്കി മരണം കവർന്നത് പ്രവാസി മലയാളി യുവാവിനെ

റാസൽഖൈമ: യുഎഇയിൽ പെയ്ത കനത്ത മഴയിലും കാറ്റിലും റാസൽഖൈമയിൽ കെട്ടിടത്തിന്റെ ചുമർ തകർന്ന് വീണ് മലയാളി യുവാവിന് ദാരുണാന്ത്യം. മലപ്പുറം കൊടിഞ്ഞി നന്നമ്പ്ര സ്വദേശി തലക്കോട്ട് തൊടികയിൽ സൽമാൻ ഫാരിസ് (27) ആണ് മരിച്ചത്. സുലൈമാന്റെയും അസ്മാബിയുടെയും മകനാണ് സൽമാൻ.

കഴിഞ്ഞ നാല് വർഷമായി റാസൽഖൈമ അൽ നഖീലിലെ ‘ഇസ്താംബൂൾ ഷവർമ’ കടയിൽ ഡെലിവറി ജീവനക്കാരനായി ജോലി ചെയ്തു വരികയായിരുന്നു. അഞ്ച് മാസം മുൻപ് നാട്ടിൽ പോയപ്പോൾ സൽമാന്റെ നിക്കാഹ് കഴിഞ്ഞിരുന്നു. മൂന്ന് മാസം മുൻപാണ് തിരികെ ജോലിയിൽ പ്രവേശിച്ചത്. അടുത്ത അവധിക്ക് നാട്ടിലെത്തി വലിയ രീതിയിൽ വിവാഹ ആഘോഷം നടത്താനിരിക്കെയാണ് മരണം വില്ലനായെത്തിയത്.

വ്യാഴാഴ്ച പുലർച്ചെ രണ്ടരയോടെ ഡെലിവറിക്കായി മോട്ടർ ബൈക്കിൽ പോയതായിരുന്നു സൽമാൻ. മഴയും കാറ്റും ശക്തമായതോടെ, സുരക്ഷിതമായ ഒരിടത്ത് നിൽക്കാൻ കടയിൽ നിന്ന് വാട്സാപ്പ് സന്ദേശം അയച്ചിരുന്നു. അൽ റംസ് റോഡിലെ എമിറേറ്റ്സ് ഗാലറിക്ക് മുൻവശം നിർമ്മാണത്തിലിരുന്ന കെട്ടിടത്തിന്റെ ചുമരിന് സമീപം മഴ നനയാതെ നിൽക്കുമ്പോഴാണ് ശക്തമായ കാറ്റിൽ സിമന്റ് ഇഷ്ടികകൾ സൽമാന്റെ മേൽ തകർന്ന് വീണത്.

രാവിലെ ജോലിക്കെത്തിയ നിർമ്മാണത്തൊഴിലാളികളാണ് സൽമാനെ മരിച്ച നിലയിൽ കണ്ടെത്തിയത്. മഴ മാറിയിട്ടും സൽമാൻ തിരിച്ചെത്താത്തതിനെ തുടർന്ന് സുഹൃത്തുക്കളുടെ കൂടെ കാണുമെന്ന് കരുതിയിരിക്കുകയായിരുന്നു കൂടെ ജോലി ചെയ്യുന്നവർ. പൊലീസ് റിപ്പോർട്ട് ലഭിച്ചാലേ അപകടത്തിന്റെ കൂടുതൽ വിവരങ്ങൾ വ്യക്തമാകൂ എന്ന് കടയുടമ മുഹമ്മദ് അറിയിച്ചു. സാമൂഹിക പ്രവർത്തകൻ നാസർ അൽ ദാനയുടെ നേതൃത്വത്തിൽ മൃതദേഹം എത്രയും വേഗം നാട്ടിലെത്തിക്കാനുള്ള നടപടികൾ പൂർത്തിയായി വരുന്നു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

ആപ്പുകളുടെ കൂടുതൽ റേറ്റിന്റെ വലയിൽ വീണാൽ? പ്രോസസിങ് ഫീ മുതൽ കസ്റ്റംസ് ചാർജ് വരെ; ഒടുവിൽ സംഭവിക്കുന്നത്

ഡിജിറ്റൽ റിമിറ്റൻസ് സംവിധാനങ്ങൾ പ്രവാസികൾക്ക് വലിയ സൗകര്യമൊരുക്കുന്നുണ്ടെങ്കിലും, ഒരു നിമിഷത്തെ അശ്രദ്ധ വലിയ നഷ്ടത്തിലേക്ക് നയിക്കാമെന്നതിന് വീണ്ടും ഉദാഹരണം. മൊബൈൽ ആപ്പ് വഴി നാട്ടിലേക്ക് പണമയച്ച ഇന്ത്യൻ പ്രവാസി യുവാവിന് 4,600 ദിർഹം (ഒരു ലക്ഷത്തിലധികം ഇന്ത്യൻ രൂപ) നഷ്ടമായി. അക്കൗണ്ടിൽ നിന്ന് പണം ഡെബിറ്റ് ചെയ്തെങ്കിലും ആഴ്ചകൾ കഴിഞ്ഞിട്ടും ലക്ഷ്യസ്ഥാനത്ത് തുക എത്താതിരുന്നതോടെയാണ് തട്ടിപ്പ് പുറത്തറിയുന്നത്. നവംബർ അവസാനത്തോടെ പ്രമുഖമെന്ന് കരുതിയ ഒരു റിമിറ്റൻസ് ആപ്പ് വഴിയാണ് യുവാവ് പണം അയച്ചത്. ഇടപാട് നടത്തിയ ഉടൻ ബാങ്ക് അക്കൗണ്ടിൽ നിന്ന് തുക കുറയുകയും ചെയ്തു. എന്നാൽ ദിവസങ്ങൾ പിന്നിട്ടിട്ടും പണം ലഭിക്കാത്തതിനെ തുടർന്ന് കസ്റ്റമർ കെയറുമായി ബന്ധപ്പെട്ടെങ്കിലും വ്യക്തമായ മറുപടി ലഭിച്ചില്ല. റീഫണ്ടോ ഇടപാടിന്റെ നിലവിവരങ്ങളോ നൽകാൻ അധികൃതർ തയ്യാറാകാത്തത് പ്രവാസി സമൂഹത്തിൽ ആശങ്ക വർധിപ്പിച്ചിട്ടുണ്ട്. വിദേശ പണമിടപാടുകൾക്കായി യുഎഇ സെൻട്രൽ ബാങ്കിന്റെ ലൈസൻസ് ഇല്ലാതെ പ്രവർത്തിക്കുന്ന നിരവധി ആപ്പുകൾ, ആകർഷകമായ എക്സ്ചേഞ്ച് നിരക്കുകൾ വാഗ്ദാനം ചെയ്ത് ഉപയോക്താക്കളെ വലയിലാക്കുന്നുവെന്ന് വിദഗ്ധർ മുന്നറിയിപ്പ് നൽകുന്നു. ബാങ്കുകളോ അംഗീകൃത എക്സ്ചേഞ്ച് ഹൗസുകളോ നൽകുന്നതിലും ഉയർന്ന ‘സൂപ്പർ റേറ്റുകൾ’ വാഗ്ദാനം ചെയ്യുന്നത് തട്ടിപ്പിന്റെ ആദ്യ സൂചനയായിരിക്കാമെന്നാണ് വിലയിരുത്തൽ. ഇടപാട് പൂർത്തിയായതിന് ശേഷം ‘പ്രോസസിങ് ഫീ’, ‘കസ്റ്റംസ് ചാർജ്’ തുടങ്ങിയ പേരുകളിൽ അധിക തുക ആവശ്യപ്പെടുന്നതും സാധാരണ രീതിയാണ്.

ഇത്തരം തട്ടിപ്പുകളിൽപ്പെട്ടാൽ ഉടൻ നടപടികൾ സ്വീകരിക്കണമെന്ന് അധികൃതർ നിർദേശിക്കുന്നു. ആദ്യം ബാങ്കിനെ വിവരം അറിയിച്ച് ഇടപാട് തടയാൻ ശ്രമിക്കണം; രാജ്യാന്തര ട്രാൻസ്ഫറുകളാണെങ്കിൽ ‘SWIFT Recall’ ആവശ്യപ്പെടാം. റെസീപ്റ്റുകൾ, സ്ക്രീൻഷോട്ടുകൾ, ഇമെയിലുകൾ എന്നിവ തെളിവായി സൂക്ഷിക്കേണ്ടതും അത്യാവശ്യമാണ്. ദുബായിൽ eCrime.ae വഴിയോ അബുദാബിയിൽ അമൻ സർവീസ് വഴിയോ, ഫെഡറൽ തലത്തിൽ ആഭ്യന്തര മന്ത്രാലയത്തിന്റെ ആപ്പ് വഴിയോ പരാതികൾ നൽകാം. ബാങ്ക് തലത്തിൽ പരിഹാരം ലഭിക്കാത്ത പക്ഷം 30 ദിവസത്തിന് ശേഷം സാമ്പത്തിക ഒംബുഡ്‌സ്മാനായ ‘സനദക്’ (Sanadak) നെ സമീപിക്കാനും സാധിക്കും. യുഎഇയിലെ ഒരു ബാങ്കോ ഔദ്യോഗിക സ്ഥാപനമോ പാസ്‌വേഡ്, പിൻ, ഒടിപി എന്നിവ ഫോണിലൂടെയോ ഇമെയിലിലൂടെയോ ആവശ്യപ്പെടില്ലെന്നും, അപരിചിത ലിങ്കുകൾ ക്ലിക്ക് ചെയ്യുന്നതും സ്ക്രീൻ ഷെയറിങ് ആപ്പുകൾ വഴി പണമിടപാട് നടത്തുന്നതും ഒഴിവാക്കണമെന്നും സെൻട്രൽ ബാങ്ക് വീണ്ടും ഓർമിപ്പിച്ചു. സുരക്ഷയുടെ ചാവി ഉപയോക്താവിന്റെ കൈകളിലാണെന്നതാണ് അധികൃതരുടെ മുന്നറിയിപ്പ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

ബീച്ചിൽ വെച്ച് യുവതിയോട് അപമര്യാദയായി പെരുമാറി; യുവാവിനെതിരെ കൈയ്യോടെ നടപടിയുമായി ദുബായ് പോലീസ്

ബീച്ചിൽ യുവതിയോട് അപമര്യാദയായി പെരുമാറിയ സംഭവത്തിൽ ദുബായ് പോലീസ് അതിവേഗം ഇടപെട്ട് പ്രതിക്കെതിരെ നിയമനടപടി സ്വീകരിച്ചു. പൊതുസ്ഥലത്ത് അനൗചിതമായ പെരുമാറ്റം നടന്നതായി യുവതി പരാതി നൽകിയതിനെ തുടർന്നാണ് നടപടി ഉണ്ടായത്. പരാതിക്ക് പിന്നാലെ തന്നെ പോലീസ് സ്വീകരിച്ച ദ്രുതപ്രതികരണം അഭിനന്ദനാർഹമാണെന്ന് യുവതി വ്യക്തമാക്കി. ഇടപെടലിന് ദുബായ് പോലീസിനോട് അവർ നന്ദിയും രേഖപ്പെടുത്തി. ദുബായ് പോലീസ് ആപ്പിലെ ‘ഐ’ (Eye) ഫീച്ചർ ഉപയോഗിച്ചാണ് യുവതി പരാതി നൽകിയത്. ബീച്ച് പാർക്കിംഗ് ഏരിയയിൽ ഒരാൾ പരസ്യമായി വസ്ത്രം അഴിക്കുന്നതായി കണ്ടതോടെയാണ് പരാതി നൽകിയതെന്ന് പോലീസ് അറിയിച്ചു. ഈ പ്രവൃത്തി രാജ്യത്തിന്റെ സാംസ്കാരിക മൂല്യങ്ങൾക്കും പൊതു മര്യാദാ നിയമങ്ങൾക്കും വിരുദ്ധമാണെന്ന് ചൂണ്ടിക്കാട്ടി യുവതി സമൂഹമാധ്യമങ്ങളിലൂടെയും വിഷയം പങ്കുവച്ചിരുന്നു.

യുഎഇ സർക്കാരിന്റെ ഔദ്യോഗിക മാർഗനിർദേശങ്ങൾ പ്രകാരം, പൊതുസ്ഥലങ്ങളിൽ എല്ലാവരും മാന്യമായ വേഷം പാലിക്കേണ്ടതും പ്രാദേശിക ആചാരങ്ങളെയും പൊതുമര്യാദയെയും ലംഘിക്കുന്ന വസ്ത്രങ്ങൾ ഒഴിവാക്കേണ്ടതുമാണ്. ബീച്ചുകളിലും സ്വിമ്മിങ് പൂളുകളിലും മാത്രമേ നീന്തൽ വസ്ത്രങ്ങൾ അനുവദിക്കൂ. ബീച്ച് പരിധിക്ക് പുറത്തുള്ള പ്രൊമനേഡുകൾ, കഫേകൾ, കടകൾ തുടങ്ങിയ പൊതുഇടങ്ങളിൽ ഇത്തരം വസ്ത്രങ്ങൾ ധരിക്കുന്നത് അനുവദനീയമല്ല. ബീച്ചിൽ നിന്ന് പുറത്തേക്കു പോകുമ്പോൾ ശരീരമാകെ മൂടുന്ന അനുയോജ്യമായ വസ്ത്രങ്ങൾ ധരിക്കണമെന്നും നിർദേശമുണ്ട്.

അതേസമയം, ടോപ്ലെസ് സൺബാത്തിംഗും ഏതുവിധത്തിലുള്ള നഗ്നതയും യുഎഇയിൽ കർശനമായി നിരോധിച്ചിട്ടുണ്ടെന്നും ഇത്തരം പ്രവൃത്തികൾ പൊതു മര്യാദ നിയമലംഘനമായി കണക്കാക്കി നിയമനടപടികൾക്ക് വിധേയമാക്കുമെന്നും അധികൃതർ വ്യക്തമാക്കി. കുടുംബ സൗഹൃദ അന്തരീക്ഷവും സാംസ്കാരിക മൂല്യങ്ങളും സംരക്ഷിക്കുന്നതിൽ യുഎഇ കാട്ടുന്ന പ്രതിബദ്ധതയുടെ ഭാഗമായാണ് ഈ ചട്ടങ്ങളും നടപടികളും നടപ്പാക്കുന്നതെന്ന് പോലീസ് അറിയിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt