യുഎഇ ദേശീയ ദിനം പ്രമാണിച്ച് ഉപയോക്താക്കൾക്ക് സൗജന്യ ഡാറ്റ! പ്രമുഖ ടെലികോം കമ്പനികളുടെ വമ്പൻ ഓഫറുകൾ അറിയാം

ദുബായ്: യുഎഇയുടെ ദേശീയ ദിനാഘോഷങ്ങളോട് (Eid Al Etihad) അനുബന്ധിച്ച് രാജ്യത്തെ പ്രമുഖ ടെലികോം സേവനദാതാക്കളായ e& (മുമ്പ് എത്തിസലാത്ത്), Du എന്നിവർ ഉപയോക്താക്കൾക്കായി വൻ ഓഫറുകൾ പ്രഖ്യാപിച്ചു. ദേശീയ ദിനത്തിന്റെ ആവേശം ഉപയോക്താക്കളിലേക്കും എത്തിക്കുക എന്ന ലക്ഷ്യത്തോടെയാണ് ഈ സൗജന്യ ഡാറ്റാ പാക്കേജുകൾ അവതരിപ്പിച്ചത്. ഇരു കമ്പനികളും തങ്ങളുടെ ഉപയോക്താക്കൾക്ക് 53-ാമത് ദേശീയ ദിനം പ്രമാണിച്ച് 53 GB വരെ സൗജന്യ ലോക്കൽ ഡാറ്റയാണ് നൽകുന്നത്. (വർഷം അനുസരിച്ച് ഈ ഡാറ്റാ അളവിൽ മാറ്റം വരാറുണ്ട്. 53-ാമത് ദേശീയ ദിനത്തിനാണ് 53GB ഡാറ്റ നൽകിയത്). e&വിന്റെ എല്ലാ പോസ്റ്റ്‌പെയ്ഡ് ഉപഭോക്താക്കൾക്കും സ്വദേശികളായ പ്രീ-പെയ്ഡ് ഉപഭോക്താക്കൾക്കും സൗജന്യ ഡാറ്റ ലഭിക്കും. പ്രവാസികളായ പ്രീ-പെയ്ഡ് ഉപഭോക്താക്കൾക്ക് 30 ദിർഹമിനും അതിനു മുകളിലുമുള്ള ഓൺലൈൻ റീചാർജുകൾക്ക് 53% വരെ കിഴിവ് ലഭിക്കും. Duവിന്റെ എല്ലാ പോസ്റ്റ്‌പെയ്ഡ് ഉപഭോക്താക്കൾക്കും സൗജന്യ 53 GB ഡാറ്റ ഓട്ടോമാറ്റിക്കായി ലഭിക്കും. പ്രീ-പെയ്ഡ് ഉപഭോക്താക്കൾ ഫ്ളെക്സി വാർഷിക പ്ലാനുകളിലേക്ക് മാറുന്നവർക്ക് ഒരു വർഷത്തേക്ക് സാധുതയുള്ള 53 GB ഡാറ്റ സൗജന്യമായി നേടാൻ അവസരമുണ്ട്. സൗജന്യ ഡാറ്റാ ഓഫറുകളുടെ മറവിൽ സാമൂഹ്യ മാധ്യമങ്ങളിലൂടെ പ്രചരിക്കുന്ന വ്യാജ സന്ദേശങ്ങളെക്കുറിച്ച് e& അധികൃതർ ഉപയോക്താക്കൾക്ക് മുന്നറിയിപ്പ് നൽകിയിട്ടുണ്ട്. സൗജന്യ ഓഫറുകൾ ക്ലെയിം ചെയ്യുന്നതിനായി ആപ്പുകൾ വഴിയോ ഔദ്യോഗിക വെബ്സൈറ്റ് വഴിയോ മാത്രം ശ്രമിക്കുക. അറിയാത്ത ലിങ്കുകളിൽ ക്ലിക്ക് ചെയ്യുകയോ സ്വകാര്യ വിവരങ്ങൾ (ബാങ്ക് വിവരങ്ങൾ, OTP) കൈമാറുകയോ ചെയ്യരുത്. ഔദ്യോഗികമായി വെരിഫൈ ചെയ്ത (Green Tick) അക്കൗണ്ടുകളിൽ നിന്നുള്ള സന്ദേശങ്ങൾ മാത്രം വിശ്വസിക്കുക. യുഎഇ ദേശീയ ദിനാഘോഷങ്ങളുടെ ഭാഗമായി ടെലികോം രംഗത്ത് മാത്രമല്ല, മറ്റു പല മേഖലകളിലും ആകർഷകമായ നിരവധി ഓഫറുകളും പ്രമോഷനുകളും പ്രഖ്യാപിച്ചിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

യുഎഇയിലെ ദേശീയ ദിനാഘോഷം; ട്രാഫിക് നിർദേശങ്ങൾ അറിഞ്ഞിരിക്കാം

യുഎഇ ദേശീയ ദിനാഘോഷങ്ങളോടനുബന്ധിച്ച് ട്രാഫിക് സുരക്ഷ ഉറപ്പാക്കുന്നതിനായി ദുബായ് പോലീസ് പ്രത്യേക മാർഗനിർദ്ദേശങ്ങൾ പുറപ്പെടുവിച്ചു. ജനങ്ങളുടെ സുരക്ഷയും ഗതാഗതത്തിന്റെ സുഗമതയും ലക്ഷ്യമിട്ടാണ് നിർദ്ദേശങ്ങൾ നൽകിയിരിക്കുന്നത്. ആഘോഷവേളകളിൽ ഗതാഗതക്കുരുക്കും അപകടങ്ങളും പരമാവധി കുറയ്ക്കാനാണ് നടപടിയെന്ന് ജനറൽ ഡിപ്പാർട്ട്‌മെന്റ് ഓഫ് ട്രാഫിക് ഡയറക്ടർ ബ്രിഗേഡിയർ ജുമാ സലിം ബിൻ സുവൈദാൻ അറിയിച്ചു.

വാഹനങ്ങളുടെ മുന്നിലോ പിന്നിലോ നമ്പർ പ്ലേറ്റുകൾ മറയ്ക്കുന്ന രീതിയിൽ അലങ്കാരങ്ങൾ ചെയ്യരുതെന്നും വാഹനങ്ങളുടെ നിറത്തിലും വിൻഡോ ടിന്റിംഗിലും മാറ്റം വരുത്താൻ പാടില്ലെന്നും പോലീസ് മുന്നറിയിപ്പ് നൽകി. ഔദ്യോഗിക ഈദ് അൽ ഇത്തിഹാദ് ലോഗോ ഒഴികെ മറ്റ് സ്റ്റിക്കറുകൾ വാഹനങ്ങളിൽ ഒട്ടിക്കുന്നത് വിലക്കിയിട്ടുണ്ട്. റോഡുകളിൽ ഗതാഗതത്തെ തടസ്സപ്പെടുത്തുന്ന സംഭാഷണങ്ങളും വാഹനങ്ങളിൽ അഭ്യാസ പ്രകടനങ്ങളും കർശനമായി നിരോധിച്ചു. സൺറൂഫിലൂടെയോ വിൻഡോയിലൂടെയോ പുറത്തേക്ക് ചായുന്ന വിധത്തിലുള്ള അപകടകരമായ പെരുമാറ്റങ്ങൾക്കും വിലക്കുണ്ട്. അമിതശബ്ദത്തിന് ഇടയാക്കുന്ന രീതിയിലുള്ള വാഹനമാറ്റങ്ങൾക്കും അനുമതിയില്ലെന്നാണ് മുന്നറിയിപ്പ്.

നിയമലംഘനങ്ങൾ കണ്ടാൽ പോലീസ് ഐ-സർവീസിലോ 901 എന്ന നമ്പറിലോ വിവരം അറിയിക്കണമെന്ന് ദുബായ് പോലീസ് അഭ്യർത്ഥിച്ചു. അവധി ദിനങ്ങളിൽ നഗരത്തിലെ പ്രധാന റോഡുകളിൽ പട്രോളിംഗ് ശക്തിപ്പെടുത്തുമെന്നും അധികൃതർ വ്യക്തമാക്കി. ബർദുബായിലെ സെക്കൻഡ് ഡിസംബർ സ്ട്രീറ്റ്, ജുമൈറ, അൽ റാഷിദിയ, അൽ ഖലീജ് സ്ട്രീറ്റ്, അൽ ഇത്തിഹാദ് സ്ട്രീറ്റ്, അമ്മാൻ സ്ട്രീറ്റ്, യൂണിവേഴ്സിറ്റി സിറ്റി തുടങ്ങിയ പ്രധാന വഴികളിൽ പ്രത്യേക പട്രോളിങ് സംഘത്തെ വിന്യസിച്ചിരിക്കുമെന്നും അവർ അറിയിച്ചു. ഡ്രൈവർമാർ ട്രാഫിക് നിയമങ്ങൾ കൃത്യമായി പാലിക്കുന്നുണ്ടെന്ന് ഉറപ്പാക്കുന്നതിന് ഈ സംഘങ്ങൾ ദുരിത പ്രതികരണ യൂണിറ്റുകളോടൊപ്പം പ്രവർത്തിക്കും.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

യുഎഇ ദേശീയ ദിനാഘോഷം: മലയാളികൾ ഉൾപ്പെടെ, 6093 തടവുകാർക്ക് മോചനം

ദേശീയ ദിനാഘോഷമായ ‘ഈദ് അൽ ഇത്തിഹാദ്’ മുന്നോടിയായി യുഎഇയിലെ വിവിധ എമിറേറ്റുകളിലെ ഭരണാധികാരികൾ ചേർന്ന് 6,093 തടവുകാർക്ക് മാപ്പുനൽകി മോചിപ്പിക്കാൻ ഉത്തരവിട്ടു. അബുദാബി ജയിലുകളിൽ നിന്ന് 2,937 തടവുകാർക്ക് പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ മോചന ഉത്തരവിറക്കിയപ്പോൾ, ദുബായിൽ നിന്ന് 2,025 പേരെ മോചിപ്പിക്കാൻ ഷെയ്ഖ് മുഹമ്മദ് ബിൻ റാഷിദ് അൽ മക്തൂം നിർദേശിച്ചു. ഷാർജയിൽ 366 പേരെയും, അജ്മാനിൽ 225 പേരെയും, ഫുജൈറയിൽ 129 പേരെയും, റാസൽഖൈമയിൽ 411 പേരെയും മോചിപ്പിക്കാൻ ഭരണാധികാരികൾ തീരുമാനിച്ചു. ഉമ്മുൽഖുവൈൻ ഭരണാധികാരി ഷെയ്ഖ് സൗദ് ബിൻ റാഷിദ് അൽ മുഅല്ലയും മോചന ഉത്തരവ് നൽകിയെങ്കിലും എണ്ണം വെളിപ്പെടുത്തിയിട്ടില്ല.

തടവുകാലത്ത് നല്ല പെരുമാറ്റം കാട്ടിയ മലയാളികൾ ഉൾപ്പെടെയുള്ള വിവിധ രാജ്യക്കാരെയാണ് മോചനം ലഭിക്കുന്നതിനു തിരഞ്ഞെടുക്കുന്നത്. പുതുജീവിതത്തിനുള്ള അവസരമാണിതെന്ന് എമിറേറ്റ് ഭരണാധികാരികൾ വ്യക്തമാക്കി. മോചനത്തിനു വേണ്ടിയുള്ള നിയമനടപടികൾ ഉടൻ ആരംഭിക്കാൻ ജയിൽ അധികാരികൾക്ക് നിർദേശം നൽകിയിട്ടുണ്ട്. സാധാരണയായി മോചിതരുടെ പിഴയടക്കമുള്ള സാമ്പത്തിക ബാധ്യതകൾ ഭരണാധികാരികൾ ഏറ്റെടുക്കുന്ന പതിവും ഈ വർഷവും തുടരും.

കസ്റ്റമർ ഹാപ്പിനസ് സെന്ററുകൾക്കും സേവന കേന്ദ്രങ്ങൾക്കും തിങ്കൾ, ചൊവ്വ അവധി

ദേശീയ ദിനാഘോഷത്തിന്റെ ഭാഗമായി ആർടിഎയുടെ കസ്റ്റമർ ഹാപ്പിനസ് സെന്ററുകളും ബന്ധപ്പെട്ട സേവന കേന്ദ്രങ്ങളും തിങ്കളാഴ്ചയും ചൊവ്വാഴ്ചയും അവധിയായിരിക്കും. എന്നാൽ ഉം റമൂൽ, അൽ ബർഷ, അൽ തവാർ, ആർടിഎ ഹെഡ്ക്വാർട്ടേഴ്സ് എന്നിവിടങ്ങളിലെ സ്മാർട്ട് കസ്റ്റമർ ഹാപ്പിനസ് സെന്ററുകൾ 24 മണിക്കൂറും പ്രവർത്തിക്കും.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt