Indian passport; യുഎഇയിലെ ഇന്ത്യൻ പ്രവാസികൾക്കായി ജൂലൈ ഒന്ന് മുതൽ ആരംഭിക്കേണ്ടിയിരുന്ന പുതിയ പാസ്പോർട്ട്, വിസ, കോൺസുലർ സേവന കേന്ദ്രങ്ങളുടെ പ്രവർത്തനം താത്കാലികമായി മാറ്റിവെച്ചു. സേവനങ്ങൾ ഉടൻ ആരംഭിക്കില്ലെന്നും അബുദാബിയിലെ ഇന്ത്യൻ എംബസിയിൽ നിന്നുള്ള നിർദ്ദേശപ്രകാരം ലോഞ്ച് തീയതി നീട്ടിവെച്ചതായും കരാർ ലഭിച്ച അൽഹിന്ദ് ടൂർസ് ആൻഡ് ട്രാവൽസ് ഔദ്യോഗികമായി അറിയിച്ചു. കേന്ദ്രങ്ങൾ തുടങ്ങുന്നതിനായി എല്ലാ സജ്ജീകരണങ്ങളും പൂർത്തിയായെങ്കിലും ഭരണപരമായ കാരണങ്ങളാൽ എംബസിയുടെ അടുത്ത അറിയിപ്പ് വരുന്നത് വരെ കാത്തിരിക്കാനാണ് കമ്പനിക്ക് ലഭിച്ച നിർദ്ദേശം. പാസ്പോർട്ട് സേവനത്തിനായുള്ള ടെണ്ടർ നടപടികളുമായി ബന്ധപ്പെട്ട് ഇന്ത്യയിലെ കോടതികളിൽ നിലനിൽക്കുന്ന നിയമതർക്കമാണ് ഈ അനിശ്ചിതത്വത്തിന് പ്രധാന കാരണം. നേരത്തെ ഈ സേവനങ്ങൾ നൽകിയിരുന്ന കമ്പനികൾ ടെണ്ടർ നടപടികളെ ചോദ്യം ചെയ്ത് കോടതിയെ സമീപിച്ചതോടെ സുപ്രീം കോടതി തൽസ്ഥിതി തുടരാൻ ഉത്തരവിടുകയായിരുന്നു. ഇതിനെത്തുടർന്ന് അൽഹിന്ദിന് കേന്ദ്രങ്ങൾ തുറക്കാനുള്ള അനുമതി ലഭിക്കുന്നതിൽ കാലതാമസമുണ്ടായി. യുഎഇയുടെ വിവിധ ഭാഗങ്ങളിലായി 16 അത്യാധുനിക അപേക്ഷാ കേന്ദ്രങ്ങൾ അൽഹിന്ദ് ഇതിനോടകം സജ്ജീകരിച്ചിട്ടുണ്ട്. എംബസിയുടെ അനുമതി ലഭിച്ചാലുടൻ ഈ കേന്ദ്രങ്ങൾ പ്രവാസികൾക്കായി തുറന്നുനൽകാൻ കമ്പനി പൂർണ്ണ സജ്ജമാണ്. നിലവിൽ പഴയ കരാറുകൾ അവസാനിച്ച സാഹചര്യത്തിൽ, പാസ്പോർട്ട്, വിസ, അറ്റസ്റ്റേഷൻ തുടങ്ങിയ അടിയന്തര സേവനങ്ങൾക്കായി പ്രവാസികൾക്ക് നേരിട്ട് അബുദാബിയിലെ ഇന്ത്യൻ എംബസിയെയോ ദുബായിലെ കോൺസുലേറ്റിനെയോ സമീപിക്കാവുന്നതാണ്. താൽക്കാലികമായി ഈ ഓഫീസുകൾ നേരിട്ടാണ് സേവനങ്ങൾ നൽകിവരുന്നത്. ഈ സാഹചര്യം മൂലം പ്രവാസികൾക്കുണ്ടായ ബുദ്ധിമുട്ടിൽ അൽഹിന്ദ് ഖേദം പ്രകടിപ്പിച്ചു. സേവനങ്ങൾ എന്ന് മുതൽ ആരംഭിക്കുമെന്നത് സംബന്ധിച്ച കൃത്യമായ വിവരങ്ങൾക്കായി എംബസിയുടെ വെബ്സൈറ്റ് ശ്രദ്ധിക്കണമെന്നും കമ്പനി അധികൃതർ അറിയിച്ചു. നൂതനമായ സാങ്കേതിക വിദ്യയോടെ മികച്ച സേവനം പ്രവാസികൾക്ക് ലഭ്യമാക്കാൻ തങ്ങൾ പ്രതിജ്ഞാബദ്ധമാണെന്നും അൽഹിന്ദ് വ്യക്തമാക്കി.
