Lift Safety Tips; ഓഫീസുകളിലും ഫ്ലാറ്റുകളിലും ഷോപ്പിങ് മാളുകളിലുമെല്ലാം ദിവസേന ലിഫ്റ്റ് ഉപയോഗിക്കുന്നവരാണ് നമ്മളിൽ പലരും. എന്നാൽ, അപ്രതീക്ഷിതമായി വൈദ്യുതി തടസ്സപ്പെടുകയോ സാങ്കേതിക തകരാർ സംഭവിക്കുകയോ ചെയ്താൽ ലിഫ്റ്റിനുള്ളിൽ കുടുങ്ങിപ്പോകാൻ സാധ്യതയുണ്ട്. അത്തരമൊരു സാഹചര്യം ഉണ്ടായാൽ പരിഭ്രാന്തരാകാതെ എന്തുചെയ്യണം എന്ന് അറിഞ്ഞിരിക്കേണ്ടത് അത്യാവശ്യമാണ്.
ലിഫ്റ്റിൽ കയറും മുൻപ് ശ്രദ്ധിക്കേണ്ട കാര്യങ്ങൾ
- ഫോൺ കരുതുക: ലിഫ്റ്റിൽ കയറുമ്പോൾ മൊബൈൽ ഫോൺ കൈവശമുണ്ടെന്ന് എപ്പോഴും ഉറപ്പാക്കുക. അടിയന്തര ഘട്ടങ്ങളിൽ പുറത്തുള്ളവരുമായി ബന്ധപ്പെടാൻ ഇത് സഹായിക്കും.
- അലാറം തിരിച്ചറിയുക: ലിഫ്റ്റിലെ എമർജൻസി അലാറം ബട്ടണും സഹായം തേടാനുള്ള സംവിധാനങ്ങളും എവിടെയാണെന്ന് കയറുമ്പോൾ തന്നെ ശ്രദ്ധിക്കുന്നത് നന്നായിരിക്കും.
- ഭാരപരിധി പാലിക്കുക: ലിഫ്റ്റിൽ അനുവദിച്ചിട്ടുള്ള പരമാവധി ഭാരപരിധി ഒരിക്കലും കവിയരുത്.
- വാതിലുകൾ ശ്രദ്ധിക്കുക: വാതിലുകൾ അടയുമ്പോൾ കൈകളോ ബാഗുകളോ മറ്റ് വസ്തുക്കളോ ഇടയിൽ കുടുങ്ങാതിരിക്കാൻ ജാഗ്രത പുലർത്തുക. കുട്ടികൾ ലിഫ്റ്റ് വാതിലുകളിൽ കളിക്കുന്നതും അനാവശ്യമായി ബട്ടണുകൾ അമർത്തുന്നതും കർശനമായി ഒഴിവാക്കണം.
- അപകടസൂചനകൾ: ലിഫ്റ്റിൽ അസാധാരണമായ കുലുക്കമോ ശബ്ദമോ അനുഭവപ്പെട്ടാൽ ഉടൻ തന്നെ കെട്ടിടത്തിലെ അധികൃതരെ വിവരം അറിയിക്കുക.
വൈദ്യുതി നിലച്ചാൽ എന്ത് ചെയ്യണം?
വൈദ്യുതി പോയാൽ ചില ലിഫ്റ്റുകൾ പെട്ടെന്ന് പ്രവർത്തനരഹിതമായേക്കാം. എന്നാൽ ആധുനിക ലിഫ്റ്റുകളിൽ ബാക്കപ്പ് പവറോ ഓട്ടോമാറ്റിക് റെസ്‌ക്യൂ സിസ്റ്റമോ ഉണ്ടായിരിക്കും. ഇത്തരം സംവിധാനങ്ങളുള്ള ലിഫ്റ്റുകൾ അടുത്തുള്ള നിലയിലേക്ക് നീങ്ങി വാതിൽ തുറക്കാൻ സ്വയം പര്യാപ്തമായിരിക്കും. എങ്കിലും എല്ലാ ലിഫ്റ്റുകളിലും ഈ സൗകര്യം ഉണ്ടാകണമെന്നില്ല.
ലിഫ്റ്റിൽ കുടുങ്ങിയാൽ ചെയ്യേണ്ടതും ചെയ്യാൻ പാടല്ലാത്തതുമായ കാര്യങ്ങൾ
- പരിഭ്രാന്തി ഒഴിവാക്കുക: ലിഫ്റ്റ് നിശ്ചലമായാൽ ഏറ്റവും പ്രധാനം മനസ്സ് ശാന്തമായിരിക്കുക എന്നതാണ്.
- സ്വയം രക്ഷാപ്രവർത്തനം വേണ്ട: വാതിലുകൾ ബലമായി തുറക്കാനോ സ്വന്തമായി പുറത്തേക്ക് ചാടാൻ ശ്രമിക്കാനോ ഒരിക്കലും മുതിരരുത്. ഇത് വലിയ അപകടങ്ങൾക്ക് കാരണമാായേക്കാം.
- സഹായം തേടുക: എമർജൻസി അലാറം ഉപയോഗിച്ചോ, ലഭ്യമായ ഇൻ്റർകോം സംവിധാനം വഴിയോ ഉടൻ സഹായം അഭ്യർത്ഥിക്കുക.
- ഫോൺ ഉപയോഗിക്കുക: പെട്ടെന്ന് പ്രതികരണം ലഭിച്ചില്ലെങ്കിൽ അലാറം വീണ്ടും മുഴക്കുക. ഒപ്പം മൊബൈൽ ഫോൺ വഴി കെട്ടിടത്തിലെ സെക്യൂരിറ്റി ജീവനക്കാരെയോ സുഹൃത്തുക്കളെയോ ബന്ധപ്പെടുക.
ലിഫ്റ്റിൽ കുടുങ്ങുന്ന സാഹചര്യം ആരെയും ഭയപ്പെടുത്താം. എന്നാൽ ഈ സുരക്ഷാ മുൻകരുതലുകൾ അറിഞ്ഞിരിക്കുന്നതും, പരിഭ്രാന്തിയില്ലാതെ സംയമനത്തോടെ പെരുമാറുന്നതും വലിയ അപകടങ്ങളിൽ നിന്ന് നമ്മെ രക്ഷിക്കും.
