finding lost footwear with AI; ദൈനംദിന ജീവിതത്തിലെ വലിയ പ്രശ്നങ്ങൾക്ക് പരിഹാരം കാണാൻ നമ്മൾ ഇന്ന് എഐ ഉപയോഗിക്കാറുണ്ട്. എന്നാൽ കാണാതായ തന്റെ ചെരുപ്പ് കണ്ടെത്താൻ ഒരാൾ ചാറ്റ് ജിപിടിയെ (ChatGPT) ഉപയോഗിച്ച വാർത്തയാണ് ഇപ്പോൾ സോഷ്യൽ മീഡിയയിൽ ചിരി പടർത്തുന്നത്. ആയിരത്തിലധികം ചെരുപ്പുകൾക്കിടയിൽ നിന്ന് തന്റെ ഒരൊറ്റ ചെരുപ്പ് കണ്ടെത്താൻ യുവാവ് കാണിച്ച ബുദ്ധി ‘അതിഗംഭീരം’ എന്നാണ് ഇന്റർനെറ്റ് വിശേഷിപ്പിക്കുന്നത്. ശുഭംഗ് ബോർക്കർ എന്ന ഇൻസ്റ്റാഗ്രാം ഉപയോക്താവ് പങ്കുവെച്ച വീഡിയോയാണ് ഇപ്പോൾ വൈറലായിരിക്കുന്നത്. ഒരു പൊതുസ്ഥലത്തിന് പുറത്ത് നൂറുകണക്കിന് ചെരുപ്പുകൾ കൂട്ടിയിട്ടിരിക്കുന്നത് വീഡിയോയിൽ കാണാം. ഇതിനിടയിൽ തന്റെ ഒരു ചെരുപ്പ് നഷ്ടപ്പെട്ട യുവാവ്, അത് നേരിട്ട് തിരയുന്നതിന് പകരം ആ സ്ഥലത്തിന്റെ ഒരു ഫോട്ടോ എടുത്ത് ചാറ്റ് ജിപിടിയിൽ അപ്ലോഡ് ചെയ്യുകയായിരുന്നു. ഫോട്ടോ വിശകലനം ചെയ്ത ചാറ്റ് ജിപിടി, ചെരുപ്പ് എവിടെയായിരിക്കാം എന്നതിനെക്കുറിച്ച് ഏകദേശ ധാരണ നൽകുകയും യുവാവ് അത് കണ്ടെത്തുകയും ചെയ്തു. രണ്ട് ദശലക്ഷത്തിലധികം ആളുകളാണ് ഈ വീഡിയോ ഇതിനോടകം കണ്ടത്. വളരെ ലളിതമായ കാര്യത്തിന് എഐ ഉപയോഗിച്ച യുവാവിനെ പരിഹസിച്ചും പ്രശംസിച്ചും നിരവധി കമന്റുകളാണ് വരുന്നത്. “ആധുനിക പ്രശ്നങ്ങൾക്ക് ആധുനിക പരിഹാരങ്ങൾ” എന്നാണ് ഒരാൾ കമന്റ് ചെയ്തത്. “ചാറ്റ് ജിപിടി ഇങ്ങനെയൊക്കെ ഉപയോഗിക്കാമെന്ന് ഇപ്പോഴാണ് അറിഞ്ഞത്” എന്ന് മറ്റൊരാൾ കുറിച്ചു. ഗൂഗിളിന്റെ ‘ജെമിനി എഐ’ ഉപയോഗിക്കാമായിരുന്നു എന്ന് ചിലർ അഭിപ്രായപ്പെട്ടപ്പോൾ, “എഐ ഒരു മൂലയിലിരുന്ന് കരയുകയാകും” എന്ന് മറ്റുചിലർ തമാശയായി പറഞ്ഞു. “ഏറ്റവും നല്ല മറ്റൊരു ജോഡി എടുത്ത് സ്ഥലം വിടാമായിരുന്നു” എന്നായിരുന്നു മറ്റൊരു രസകരമായ കമന്റ്.
സമാനമായ മറ്റൊരു അനുഭവവും ഒരു യുവതി പങ്കുവെച്ചു. തന്റെ ഭർത്താവ് ഒരു ബുക്ക് സെയിലിനിടെ ഒരു പ്രത്യേക പുസ്തകം കണ്ടെത്താൻ ഇതേ രീതിയിൽ ഷെൽഫുകളുടെ ഫോട്ടോ എടുത്ത് ചാറ്റ് ജിപിടിയുടെ സഹായം തേടിയതായും അത് വിജയിച്ചതായും അവർ പറഞ്ഞു. സാങ്കേതികവിദ്യ ദൈനംദിന ജീവിതത്തിലെ എത്ര ചെറിയ കാര്യങ്ങളെ വരെ സ്വാധീനിക്കുന്നു എന്നതിന്റെ ഉദാഹരണമായി ഈ സംഭവത്തെ പലരും കാണുന്നു.
