Indian Embassy Advisory; ഫ്രാൻസിൽ ആഴ്ചകളായി തുടരുന്ന ജനകീയ പ്രക്ഷോഭം വൻ കലാപത്തിലേക്കും കൊള്ളയിലേക്കും വഴിമാറിയതോടെ സ്ഥിതിഗതികൾ നിയന്ത്രിക്കാൻ കടുത്ത നടപടികളുമായി സർക്കാർ. സാഹചര്യത്തിനനുസരിച്ച് പ്രമുഖ നഗരങ്ങളിൽ കർഫ്യൂ ഏർപ്പെടുത്താൻ പ്രാദേശിക ഭരണകൂടങ്ങൾക്ക് പ്രധാനമന്ത്രി സെബാസ്റ്റ്യൻ ലെകോർനു നിർദേശം നൽകി. അക്രമങ്ങളുമായി ബന്ധപ്പെട്ട് ഇതുവരെ 2,400-ഓളം പേരെ കസ്റ്റഡിയിലെടുത്തു. രാജ്യവ്യാപക അടിയന്തരാവസ്ഥയോ കർഫ്യൂവോ നിലവിൽ പ്രഖ്യാപിച്ചിട്ടില്ലെങ്കിലും രാജ്യം അതിലേക്ക് നീങ്ങുകയാണെന്നാണ് സൂചനകൾ. അതേസമയം, സർക്കാരിന്റെ അടിച്ചമർത്തൽ നടപടികൾക്കെതിരെ തൊഴിലാളി യൂണിയനുകൾ നവംബർ 5-ന് രാജ്യവ്യാപക പണിമുടക്കിന് ആഹ്വാനം ചെയ്തു. കലാപം തടയുന്നതിൽ പരാജയപ്പെട്ടതിന്റെ ഉത്തരവാദിത്തമേറ്റ് ആഭ്യന്തരമന്ത്രി ലൊറന്റ് നൂനെസ് രാജിക്കത്ത് നൽകിയെങ്കിലും പ്രസിഡന്റ് ഇമ്മാനുവൽ മക്രോ അത് നിരസിച്ചു. ഇന്റലിജൻസ് വിഭാഗത്തിനുണ്ടായ വീഴ്ചയാണ് സ്ഥിതി വഷളാക്കിയതെന്ന് പ്രസിഡന്റ് കുറ്റപ്പെടുത്തി. തെരുവുകളിൽ അറുപതിനായിരത്തോളം പോലീസുകാരെ വിന്യസിച്ചിട്ടും അക്രമങ്ങൾ നിയന്ത്രണവിധേയമാക്കാൻ സാധിച്ചിട്ടില്ല. സുരക്ഷാ സന്നാഹങ്ങളിലെ വീഴ്ച ചൂണ്ടിക്കാട്ടി വിവിധ നഗരങ്ങളിലെ മേയർമാരും സർക്കാരിനെതിരെ രംഗത്തെത്തിയിട്ടുണ്ട്.

ജീവിതച്ചെലവിലെ ക്രമാതീതമായ വർധന, പൊതുസേവന മേഖലയിലെ തകർച്ച, വിദ്യാലയങ്ങളിലെ അടിസ്ഥാന സൗകര്യങ്ങളുടെ പോരായ്മ എന്നിവയ്ക്കെതിരെയാണ് യുവജനങ്ങളും വിദ്യാർഥികളും തെരുവിലിറങ്ങിയത്. തലസ്ഥാനമായ പാരിസിൽ മാത്രം നാനൂറോളം വ്യാപാരസ്ഥാപനങ്ങൾ ആക്രമിക്കപ്പെടുകയോ കൊള്ളയടിക്കപ്പെടുകയോ ചെയ്തു. മുൻകരുതലിന്റെ ഭാഗമായി സ്കൂളുകൾ അടച്ചെങ്കിലും വിഖ്യാതമായ ലൂവ്ര് മ്യൂസിയം, സയൻസസ് പോ സർവകലാശാല എന്നിവിടങ്ങളിൽ വിദ്യാർഥി പ്രതിഷേധം ശക്തമാണ്. ഒളിംപിക് ഡെ മാർസെയിൽ, ലിലെ എന്നീ പ്രമുഖ സ്പോർട്സ് ക്ലബുകളുടെ ഔദ്യോഗിക ഷോപ്പുകളും കൊള്ളയടിക്കപ്പെട്ടു. ഇതിനിടെ, ഇന്ധനക്ഷാമം പരിഹരിക്കുന്നതിനും വില കുറയ്ക്കുന്നതിനുമായി പ്രസിഡന്റ് മക്രോ കുവൈത്തിലേക്ക് തിരിച്ചു. പൊതുമേഖലാ തകർച്ചയ്ക്കെതിരെയുള്ള ജനരോഷം അയൽരാജ്യമായ ഇറ്റലിയിലേക്കും വ്യാപിച്ചിട്ടുണ്ട്. വ്യാവസായിക നഗരമായ മിലാനിൽ വൻ പ്രതിഷേധങ്ങളാണ് അരങ്ങേറിയത്. ഈ സാഹചര്യത്തിൽ ഇറ്റലിയിലുള്ള ഇന്ത്യൻ പൗരന്മാർ അതീവ ജാഗ്രത പാലിക്കണമെന്ന് റോമിലെ ഇന്ത്യൻ എംബസി നിർദേശം നൽകി. ആൾക്കൂട്ടങ്ങൾ ഒഴിവാക്കണമെന്നും, അടിയന്തര സാഹചര്യങ്ങളിൽ റോമിലെ എംബസിയുമായോ മിലാനിലെ കോൺസുലേറ്റ് ജനറലുമായോ ബന്ധപ്പെടണമെന്നും ഔദ്യോഗിക കുറിപ്പിൽ വ്യക്തമാക്കി.

കലാപാന്തരീക്ഷം നിലനിൽക്കുന്നുണ്ടെങ്കിലും പാരിസിൽ ഇന്ത്യൻ സമയം നാളെ രാത്രി 12.30-ന് നടക്കുന്ന യുവേഫ ചാംപ്യൻസ് ലീഗ് ഫുട്ബോൾ മത്സരത്തിന് മാറ്റമുണ്ടാകില്ലെന്ന് അധികൃതർ അറിയിച്ചു. പിഎസ്ജിയുടെ ഹോം ഗ്രൗണ്ടായ പാർക് ദെ പ്രിൻസസിൽ നടക്കുന്ന മത്സരത്തിൽ സ്പാനിഷ് വമ്പന്മാരായ ബാഴ്സലോണയാണ് നിലവിലെ ജേതാക്കളായ ഫ്രഞ്ച് ക്ലബ്ബിന്റെ എതിരാളികൾ. മത്സരം സുഗമമായി നടത്തുന്നതിന് സ്റ്റേഡിയത്തിലും പരിസരത്തും കനത്ത സുരക്ഷയാണ് ഏർപ്പെടുത്തിയിരിക്കുന്നത്.