UAE Travel Insurance Guide; അവധിക്കാലം ആഘോഷിക്കാൻ വിദേശയാത്രകൾക്ക് തയ്യാറെടുക്കുന്ന പ്രവാസികൾ ട്രാവൽ ഇൻഷുറൻസ് തിരഞ്ഞെടുക്കുന്നതിൽ അതീവ ജാഗ്രത പാലിക്കണമെന്ന് ഈ രംഗത്തെ വിദഗ്ധർ മുന്നറിയിപ്പ് നൽകുന്നു. പലപ്പോഴും വിസ നടപടികൾക്ക് വേണ്ടിയുള്ള ഒരു ഔദ്യോഗിക രേഖയായി മാത്രം ഇൻഷുറൻസിനെ കാണുന്നതാണ് പലരും വരുത്തുന്ന വലിയ തെറ്റ്. വിമാന ടിക്കറ്റും ഹോട്ടലും ബുക്ക് ചെയ്യുന്നതിൽ കാണിക്കുന്ന താല്പര്യം ഇൻഷുറൻസ് പോളിസിയിലെ നിബന്ധനകൾ വായിച്ചു മനസ്സിലാക്കുന്നതിൽ മിക്കവാറും യാത്രക്കാർ കാണിക്കാറില്ല. കേവലം കുറഞ്ഞ നിരക്കിലുള്ള പോളിസികൾ തിരഞ്ഞെടുക്കുന്നത് അടിയന്തര സാഹചര്യങ്ങളിൽ വലിയ സാമ്പത്തിക ബാധ്യതയ്ക്ക് കാരണമായേക്കാമെന്ന് ഇൻഷുറൻസ് വിദഗ്ധർ ചൂണ്ടിക്കാട്ടുന്നു. അടിയന്തര വൈദ്യസഹായം, ശസ്ത്രക്രിയകൾ, അല്ലെങ്കിൽ അപ്രതീക്ഷിതമായി യാത്രക്കാരനെ നാട്ടിലെത്തിക്കേണ്ടി വരുന്ന സാഹചര്യം എന്നിവയുണ്ടായാൽ അത് വലിയ തുകയുടെ നഷ്ടമുണ്ടാക്കും. സാധാരണഗതിയിൽ ഏതൊരു വിദേശയാത്രയ്ക്കും കുറഞ്ഞത് ഒരു ലക്ഷം ഡോളറിന്റെ മെഡിക്കൽ കവറേജ് എങ്കിലും ഉറപ്പാക്കണം. എന്നാൽ അമേരിക്കയോ കാനഡയോ പോലെ ചികിത്സാ ചിലവ് കൂടുതലുള്ള രാജ്യങ്ങളിലേക്കാണ് പോകുന്നതെങ്കിൽ രണ്ടര ലക്ഷം മുതൽ അഞ്ച് ലക്ഷം ഡോളർ വരെയുള്ള കവറേജ് തിരഞ്ഞെടുക്കുന്നതാണ് സുരക്ഷിതം. മെഡിക്കൽ പരിരക്ഷയ്ക്ക് പുറമെ യാത്ര റദ്ദാക്കൽ, ലഗേജുകൾ നഷ്ടപ്പെടൽ, സാഹസിക വിനോദങ്ങൾക്കിടയിലുണ്ടാകുന്ന അപകടങ്ങൾ എന്നിവയ്ക്കും ഇൻഷുറൻസ് പരിരക്ഷയുണ്ടോ എന്ന് പ്രത്യേകം പരിശോധിക്കണം.
പലപ്പോഴും ഇൻഷുറൻസ് ക്ലെയിമുകൾ നിരസിക്കപ്പെടാൻ പ്രധാന കാരണം നിലവിലുള്ള രോഗവിവരങ്ങൾ അപേക്ഷാ സമയത്ത് മറച്ചുവെക്കുന്നതാണ്. കൂടാതെ മദ്യപിച്ചുള്ള അപകടങ്ങൾ, നിയമവിരുദ്ധ പ്രവർത്തനങ്ങൾ എന്നിവയ്ക്കും ഇൻഷുറൻസ് ആനുകൂല്യം ലഭിക്കില്ല. വിദേശത്ത് വെച്ച് അസുഖം ബാധിക്കുകയോ ആശുപത്രിയിൽ പ്രവേശിപ്പിക്കപ്പെടുകയോ ചെയ്താൽ യുഎഇയിലേക്ക് മടങ്ങിയെത്തുന്നത് വരെ കാത്തിരിക്കാതെ ഉടൻ തന്നെ ഇൻഷുറൻസ് കമ്പനിയുടെ ഹെൽപ്പ് ലൈനിൽ വിവരം അറിയിക്കണം. ഇത് ബില്ലുകൾ നേരിട്ട് കമ്പനി അടയ്ക്കുന്ന നടപടികൾ എളുപ്പമാക്കും. ലഗേജുകൾ നഷ്ടപ്പെടുകയാണെങ്കിൽ എയർലൈനിൽ നിന്നും മോഷണം നടന്നാൽ പോലീസിൽ നിന്നും ആവശ്യമായ റിപ്പോർട്ടുകൾ വാങ്ങി സൂക്ഷിക്കേണ്ടത് ക്ലെയിം ലഭിക്കാൻ അത്യന്താപേക്ഷിതമാണ്. യുഎഇയിൽ നിന്ന് ഒരാഴ്ചത്തെ യാത്രയ്ക്കായി സമഗ്രമായ ഇൻഷുറൻസ് എടുക്കുന്നതിന് സാധാരണഗതിയിൽ 75 ദിനാർ മുതൽ 200 ദിനാർ വരെ മാത്രമേ ചിലവ് വരുന്നുള്ളൂ. കുറഞ്ഞ തുക ലാഭിക്കാൻ വേണ്ടി പോളിസിയിലെ സുപ്രധാന കവറേജുകൾ ഒഴിവാക്കുന്നത് പ്രവാസികൾക്ക് പിന്നീട് വലിയ നഷ്ടങ്ങൾ വരുത്തിവെക്കാം. അവധിക്കാലം സുരക്ഷിതമാക്കാൻ ഏതാനും മിനിറ്റുകൾ ചിലവാക്കി കൃത്യമായ ഇൻഷുറൻസ് പോളിസി തിരഞ്ഞെടുക്കണമെന്ന് ട്രാവൽ വിദഗ്ധർ പ്രവാസികളെ ഉപദേശിക്കുന്നു.