Pravasiinfo

മ്യൂചൽ ഫണ്ടുകൾക്കും പിഎംഎസിനും ഇടയിൽ പുതിയൊരു നിക്ഷേപ മേഖലയാണ് സ്‌പെഷലൈസ്ഡ് ഇൻവെസ്റ്റ്‌മെന്റ് ഫണ്ട് എന്ന എസ്‌ഐഎഫ് നിക്ഷേപകർക്കു തുറന്നു കൊടുക്കുന്നത്. മ്യൂചൽ ഫണ്ടുകളിൽ വൻ തോതിൽ നിക്ഷേപിക്കുകയും അതേ സമയം പോർട്ട്‌ഫോളിയോ മാനേജ്മെന്റ് സർവീസസുകളുടെ (പിഎംഎസ്) കുറഞ്ഞ നിക്ഷേപമായ 50 ലക്ഷം രൂപയിലേക്ക് എത്താൻ സാഹചര്യമില്ലാത്തതുമായവർക്ക് ഏറെ സാധ്യതകളാണ് എസ്‌ഐഎഫ് തുറന്നു കൊടുക്കുന്നത്. കൂടുതൽ നഷ്ടസാധ്യതകൾ വഹിക്കുവാൻ കഴിവുള്ളവരും ഗണ്യമായ നിക്ഷേപ തുകയുള്ളവരും കൂടുതൽ സാധ്യതകൾ തേടി ഇതിലേക്കു തിരിയാനും ഇടയുണ്ട്. സെബി കഴിഞ്ഞയിടെ അവതരിപ്പിച്ച എസ്‌ഐഎഫ് നിക്ഷേപത്തിന്റെ കാര്യത്തിൽ കൂടുതൽ സ്വാതന്ത്ര്യമാണു നൽകുന്നത്. അതേ സമയം നിയന്ത്രണ സംവിധാനങ്ങൾ നിലനിർത്തുകയും ചെയ്തിട്ടുണ്ട്. നിക്ഷേപ സംരക്ഷണ സംവിധാനങ്ങളും ഉണ്ടാകും. കുറഞ്ഞത് പത്തു ലക്ഷം രൂപ നിക്ഷേപിച്ചാൽ മതി എന്നതാണ് എസ്‌ഐഎഫിന്റെ ഏറ്റവും വലിയ ആകർഷണം. പിഎംഎസിൽ 50 ലക്ഷം രൂപ നിക്ഷേപിക്കാനില്ലാത്തവരും അതേ സമയം മ്യൂചൽ ഫണ്ടുകളേക്കാൾ സാധ്യതകൾ തേടുന്നവരും ഇതിനെ താൽപര്യത്തോടെ കാണും. ഇതുവരെ പിഎംഎസിലൂടെ സാധ്യമായിരുന്ന രീതിയോട് ഏതാണ്ട് അടുത്തു നിൽക്കുന്ന വ്യക്തിഗതമായ നിക്ഷേപ പദ്ധതികൾ പത്തു ലക്ഷം രൂപയുടെ കുറഞ്ഞ നിക്ഷേപവുമായി ഇവിടെ സാധിക്കും. കൃത്യമായി നിർവ്വചിക്കപ്പെട്ടിട്ടുള്ള നിക്ഷേപ തന്ത്ര ചട്ടക്കൂടുകൾ, നഷ്ട സാധ്യതകൾ കൈകാര്യം ചെയ്യുന്നതിനുള്ള സംവിധാനങ്ങൾ, നിക്ഷേപം സംബന്ധിച്ച വെളിപ്പെടുത്തലുകൾ തുടങ്ങിയവയെല്ലാം ഇതിലുണ്ടാകും.

സിസ്റ്റമാറ്റിക് ഇൻവെസ്റ്റ്‌മെന്റ് പ്ലാൻ, സിസ്റ്റമാറ്റിക് വിത്ത്ഡ്രോവൽ പ്ലാൻ, സിസ്റ്റമാറ്റിക് ട്രാൻസ്ഫർ പ്ലാൻ തുടങ്ങിയവയും എസ്‌ഐഎഫിനു കീഴിൽ ലഭ്യമാകും എന്നതാണ് മറ്റൊരു സവിശേഷത.മികച്ച പ്രവർത്തന പാരമ്പര്യമുള്ള മ്യൂചൽ ഫണ്ടുകൾക്കും റജിസ്‌ട്രേഡ് ഫണ്ട് മാനേജ്മെന്റ് ടീമുകൾക്കുമാണ് എസ്‌ഐഎഫിന് അർഹതയുണ്ടാകുക. കുറഞ്ഞത് മൂന്നു വർഷമെങ്കിലും പ്രവർത്തിച്ചിട്ടുള്ള പതിനായിരം കോടി രൂപയുടെയെങ്കിലും ആസ്തികൾ കൈകാര്യം ചെയ്യുന്ന എഎംസികൾക്ക് ഇതിന് അർഹതയുണ്ടാകും. കുറഞ്ഞത് പത്തു വർഷമെങ്കിലും അനുഭവ സമ്പത്തുള്ള അയ്യായിരം കോടി രൂപയുടെയെങ്കിലും ആസ്തികൾ കൈകാര്യം ചെയ്തിട്ടുള്ള ചീഫ് ഇൻവെസ്റ്റ്‌മെന്റ് ഓഫിസറും മൂന്നു വർഷത്തെ അനുഭവ സമ്പത്തുള്ള 500 കോടി രൂപയുടെ ആസ്തികൾ കൈകാര്യം ചെയ്തിട്ടുള്ള അഡീഷണൽ ഫണ്ട് മാനേജർക്കും അർഹതയുണ്ടാകും.

വിവിധയിനം പദ്ധതികൾ അവതരിപ്പിക്കാം

ഇക്വിറ്റി അധിഷ്ഠിത പദ്ധതികൾ. ഡെറ്റ് പദ്ധതികൾ, ഹൈബ്രിഡ് പദ്ധതികൾ തുടങ്ങിയവയെല്ലാം എസ്‌ഐഎഫ് വഴി അവതരിപ്പിക്കാനാവും. എല്ലാ വിഭാഗങ്ങളിലുമായി കുറഞ്ഞത് പത്തു ലക്ഷം രൂപയുടെയെങ്കിലും നിക്ഷേപം ഉണ്ടായിരിക്കണം എന്നതാണ് വ്യക്തിഗത നിക്ഷേപകർക്ക് ഇതിൽ തുടക്കം കുറിക്കാനുള്ള നിബന്ധന. വിവിധ വിഭാഗങ്ങളിലെ നിക്ഷേപം അതാതു മേഖലകളിലെ റേറ്റിങിന്റെ അടിസ്ഥാനത്തിൽ ഉള്ളവയിൽ മാത്രമായി നിയന്ത്രിക്കുകയും ചെയ്യും.

ഉയർന്ന തോതിൽ നഷ്ട സാധ്യത വഹിക്കാൻ കഴിവുള്ളവർക്ക് അനുയോജ്യം

ഉയർന്ന തോതിൽ നഷ്ടസാധ്യതകൾ നേരിടാൻ ഒരുക്കമുള്ളവർക്കും അതിലൂടെ കൂടുതൽ നേട്ടം കൈവരിക്കാൻ ആഗ്രഹിക്കുന്നവർക്കുമാകും എസ്‌ഐഎഫ് അനുയോജ്യം. ആകെ നിക്ഷേപത്തിന്റെ പത്തു മുതൽ 20 ശതമാനം വരെ ഇതിൽ വകയിരുത്തുന്നതാവും അനുയോജ്യം.