ദുബായ്: സ്കൂൾ മേഖലകളിലെ കനത്ത ട്രാഫിക് തിരക്ക് കുറയ്ക്കുന്നതിനായി വിപ്ലവകരമായ പുതിയ പരീക്ഷണവുമായി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA). സ്വകാര്യ കാറുകളിൽ കുട്ടികളെ സ്കൂളുകളിൽ എത്തിക്കുന്നതിന് പകരമായി ‘സ്കൂൾ ട്രാൻസ്പോർട്ട് പൂളിംഗ്’ (School Transport Pooling) എന്ന പദ്ധതി 2026-ന്റെ ആദ്യ പാദത്തിൽ ദുബായ് നടപ്പിലാക്കും. യാംഗോ ഗ്രൂപ്പ് (Yango Group), അർബൻ എക്സ്പ്രസ് ട്രാൻസ്പോർട്ട് എന്നിവയുമായി സഹകരിച്ചാണ് ഈ പദ്ധതി ആരംഭിക്കുന്നത്.
എന്താണ് സ്കൂൾ ബസ് പൂളിംഗ്?
ഒരു പ്രത്യേക പ്രദേശത്തുള്ള വിവിധ സ്കൂളുകളിലെ വിദ്യാർത്ഥികളെ ഒരേ ബസ്സിൽ യാത്ര ചെയ്യാൻ അനുവദിക്കുന്ന രീതിയാണിത്. നിലവിൽ ഓരോ സ്കൂളും പ്രത്യേകം ബസ്സുകൾ ഓടിക്കുമ്പോൾ റോഡുകളിൽ വാഹനങ്ങളുടെ എണ്ണം കൂടുന്നു. എന്നാൽ പുതിയ പദ്ധതി പ്രകാരം, ഒരേ റൂട്ടിലുള്ള ഒന്നിലധികം സ്കൂളുകളിലെ കുട്ടികൾക്ക് ഒരുമിച്ച് യാത്ര ചെയ്യാം. ഇത് റോഡിലെ സ്കൂൾ ബസ്സുകളുടെയും സ്വകാര്യ കാറുകളുടെയും എണ്ണം ഗണ്യമായി കുറയ്ക്കാൻ സഹായിക്കും.
സാങ്കേതിക വിദ്യയും സുരക്ഷയും: യാത്രകൾ നിയന്ത്രിക്കുന്നതിനും വാഹനങ്ങൾ ട്രാക്ക് ചെയ്യുന്നതിനും അത്യാധുനിക സാങ്കേതിക വിദ്യകൾ ഉപയോഗിക്കും. കുട്ടികളുടെ സുരക്ഷ ഉറപ്പാക്കുന്നതിനായി ദുബായ് സ്കൂൾ ട്രാൻസ്പോർട്ട് നിയമങ്ങൾ അനുശാസിക്കുന്ന എല്ലാ സുരക്ഷാ മാനദണ്ഡങ്ങളും ഈ ബസ്സുകളിൽ പാലിക്കുമെന്ന് ആർ.ടി.എ വ്യക്തമാക്കി. രക്ഷിതാക്കൾക്ക് ആപ്പ് വഴി ബസ്സുകളുടെ സഞ്ചാരം നിരീക്ഷിക്കാനും സാധിക്കും.
സ്കൂൾ സമയങ്ങളിലെ ഗതാഗതക്കുരുക്ക് കുറയ്ക്കുന്നതിനൊപ്പം പരിസ്ഥിതി സൗഹൃദമായ ഒരു യാത്രാ സംവിധാനം ഒരുക്കുകയുമാണ് ദുബായ് ഇതിലൂടെ ലക്ഷ്യമിടുന്നത്. ആദ്യ ഘട്ടത്തിൽ തിരഞ്ഞെടുത്ത മേഖലകളിലായിരിക്കും ഈ പരീക്ഷണം നടപ്പിലാക്കുക.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt
തീകൊണ്ടുള്ള കളി വേണ്ട; സോഷ്യൽ മീഡിയയിലെ ഫയർ ചലഞ്ചിനെതിരെ മുന്നറിയിപ്പ്
ഇൻസ്റ്റാഗ്രാം, ടിക് ടോക് പോലുള്ള സോഷ്യൽ മീഡിയ പ്ലാറ്റ്ഫോമുകളിൽ കുട്ടികളുടെയും കൗമാരക്കാരുടെയും ഇടയിൽ വൈറലാകുന്ന “ബോണ്ടഡ് ബൈ ഫയർ” (Bonded by Fire) എന്ന ട്രെൻഡ് ഗുരുതരമായ അപകടസാധ്യതകൾ ഉണ്ടാക്കുന്നതാണെന്ന് ആരോഗ്യ–സുരക്ഷാ വിദഗ്ധർ മുന്നറിയിപ്പ് നൽകി. തീ ഉപയോഗിച്ച് ചെറിയ ‘കളികൾ’ നടത്തുന്നതും അത് കൈമാറുന്നതുമാണ് ഈ ട്രെൻഡിന്റെ ഉള്ളടക്കം. ഇത് നിരുപദ്രവകരമായ വിനോദമെന്ന രീതിയിലാണ് വീഡിയോകൾ അവതരിപ്പിക്കുന്നത്. എന്നാൽ, നിമിഷങ്ങൾക്കുള്ളിൽ തന്നെ ഇത് ജീവൻ പോലും അപകടത്തിലാക്കുന്ന സാഹചര്യങ്ങളിലേക്ക് മാറാനിടയുണ്ടെന്ന് വിദഗ്ധർ പറയുന്നു. കുട്ടികൾക്ക് മുതിർന്നവരേക്കാൾ നേർത്ത ചർമ്മമാണുള്ളത്. അതിനാൽ ചെറിയൊരു തീസ്പർശം പോലും ആഴമുള്ള പൊള്ളലുകളിലേക്ക് നയിക്കാമെന്ന് അസ്റ്റർ ക്ലിനിക്കിലെ പീഡിയാട്രിക്സ് സ്പെഷ്യലിസ്റ്റ് ഡോ. സമിത് അൽവ വ്യക്തമാക്കി. തീ മുടിയിലേക്കോ വസ്ത്രങ്ങളിലേക്കോ പടരാൻ അധിക സമയം വേണ്ടതില്ലെന്നും അദ്ദേഹം മുന്നറിയിപ്പ് നൽകി.
തീയുമായി ബന്ധപ്പെട്ട് ‘സുരക്ഷിതമായ കളി’ എന്നൊന്നില്ലെന്ന് നാഷണൽ ഫയർ പ്രൊട്ടക്ഷൻ അസോസിയേഷൻ (NFPA) വൈസ് പ്രസിഡന്റ് ലോറെയ്ൻ കാർലി പറഞ്ഞു. ഇത്തരം ട്രെൻഡുകൾ കുട്ടികളിൽ അപകടകരമായ പെരുമാറ്റങ്ങളെ സാധാരണ സംഭവമായി അംഗീകരിക്കാൻ ഇടയാക്കുന്നുവെന്നും അവർ ചൂണ്ടിക്കാട്ടി. മുൻകാലങ്ങളിൽ സോഷ്യൽ മീഡിയയിൽ പ്രചരിച്ച ‘ഫയർ ചലഞ്ച്’ പോലുള്ള പ്രവണതകൾ ലോകത്തിന്റെ വിവിധ ഭാഗങ്ങളിൽ മരണങ്ങൾക്കും ഗുരുതര പരിക്കുകൾക്കും കാരണമായിട്ടുണ്ട്. ഇത്തരത്തിലുള്ള ഓൺലൈൻ ട്രെൻഡുകളെക്കുറിച്ച് കുട്ടികളുമായി തുറന്ന സംഭാഷണം നടത്തേണ്ടത് അനിവാര്യമാണെന്ന് ഡോക്ടർമാർ നിർദേശിക്കുന്നു. സോഷ്യൽ മീഡിയയിൽ കാണുന്ന കാര്യങ്ങൾ അനുകരിക്കുന്നതിന് മുമ്പ് മുതിർന്നവരോട് ചോദിക്കുന്ന ശീലം കുട്ടികളിൽ വളർത്തണമെന്നും അവർ ഓർമ്മിപ്പിച്ചു. കുട്ടികൾക്ക് ലൈറ്ററുകൾ, തീപ്പെട്ടികൾ തുടങ്ങിയവ ലഭിക്കാതിരിക്കാനും മെഴുകുതിരികളിൽ നിന്നും അടുപ്പുകളിൽ നിന്നും അകറ്റി നിർത്താനും രക്ഷിതാക്കൾ പ്രത്യേകം ശ്രദ്ധിക്കണമെന്നും ആരോഗ്യ വിദഗ്ധർ മുന്നറിയിപ്പ് നൽകി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt
യുഎഇയിലെ വാഹന ഉടമകൾ ശ്രദ്ധിക്കുക! വെള്ളപ്പൊക്കമുള്ള റോഡിലൂടെയുള്ള ഡ്രൈവിംഗ് ഇനി ‘അശ്രദ്ധ’; ഇൻഷുറൻസ് ക്ലെയിം വരുമ്പോൾ പണിയാകും
ദുബായ്: യുഎഇയിൽ മഴക്കെടുതികൾ വർധിച്ചുവരുന്ന സാഹചര്യത്തിൽ വാഹന ഇൻഷുറൻസ് ക്ലെയിമുകൾ നൽകുന്ന കാര്യത്തിൽ ഇൻഷുറൻസ് കമ്പനികൾ നിബന്ധനകൾ കടുപ്പിക്കുന്നു. വെള്ളപ്പൊക്കമുള്ള റോഡുകളിലൂടെയോ വാദികളിലൂടെയോ (Wadis) അറിഞ്ഞുകൊണ്ട് വാഹനം ഓടിച്ച് കേടുപാടുകൾ സംഭവിച്ചാൽ അത് ഡ്രൈവറുടെ ‘അശ്രദ്ധ’ (Negligence) ആയി കണക്കാക്കി ക്ലെയിമുകൾ തള്ളാനാണ് കമ്പനികളുടെ തീരുമാനം.
മാറുന്ന നിയമങ്ങളും കർശന നിലപാടുകളും: 2024 ഏപ്രിലിലെയും 2025 ഡിസംബറിലെയും കനത്ത മഴയെത്തുടർന്ന് ഇൻഷുറൻസ് വിപണിയിൽ വലിയ മാറ്റങ്ങളാണ് ഉണ്ടായിരിക്കുന്നത്. വെള്ളം കെട്ടിക്കിടക്കുന്നതും അപകടസാധ്യതയുള്ളതുമായ മേഖലകളിലേക്ക് മനഃപൂർവ്വം വാഹനം ഓടിച്ചു കയറ്റുന്നത് ഇൻഷുറൻസ് പരിരക്ഷയുടെ പരിധിയിൽ വരില്ലെന്ന് ഇൻഷുറൻസ് വിദഗ്ധർ മുന്നറിയിപ്പ് നൽകുന്നു. സർക്കാർ മുൻകൂട്ടി ജാഗ്രതാ നിർദ്ദേശങ്ങൾ നൽകിയിട്ടും അത് അവഗണിച്ചു യാത്ര ചെയ്യുന്നവർക്ക് ഇൻഷുറൻസ് ആനുകൂല്യം ലഭിക്കാൻ പ്രയാസമായിരിക്കും.
വാഹന ഇൻഷുറൻസ് തുക വർധിച്ചേക്കും: വാഹനങ്ങളിലെ അത്യാധുനിക സാങ്കേതികവിദ്യകളും ഇലക്ട്രിക് വാഹനങ്ങളുടെ വർധനവും അറ്റകുറ്റപ്പണി ചിലവ് വർധിപ്പിച്ചിട്ടുണ്ട്. ഇത് ഇൻഷുറൻസ് പ്രീമിയം തുക വർധിക്കാൻ കാരണമാകുന്നു. നിലവിൽ പല പ്രവാസികളും കുറഞ്ഞ ചിലവിലുള്ള തേർഡ് പാർട്ടി ഇൻഷുറൻസിന് പകരം പ്രകൃതിക്ഷോഭങ്ങൾ കൂടി ഉൾപ്പെടുന്ന കോംപ്രിഹെൻസീവ് (Comprehensive) ഇൻഷുറൻസിലേക്ക് മാറുന്നതായും റിപ്പോർട്ടുകൾ സൂചിപ്പിക്കുന്നു.
അറിഞ്ഞിരിക്കേണ്ട പ്രധാന കാര്യങ്ങൾ:
അറിഞ്ഞുകൊണ്ടുള്ള റിസ്ക് ഒഴിവാക്കുക: വെള്ളം കെട്ടിക്കിടക്കുന്ന റോഡുകളിലൂടെയോ വെള്ളപ്പൊക്ക ഭീഷണിയുള്ള വാദികളിലൂടെയോ വാഹനം ഓടിക്കുന്നത് ഒഴിവാക്കുക.
ജാഗ്രതാ നിർദ്ദേശങ്ങൾ പാലിക്കുക: പോലീസ്, കാലാവസ്ഥാ വകുപ്പ് എന്നിവർ ഫോണിലൂടെയും മറ്റും നൽകുന്ന മുന്നറിയിപ്പുകൾ അവഗണിക്കരുത്.
പോളിസി പരിശോധിക്കുക: നിങ്ങളുടെ ഇൻഷുറൻസ് പോളിസിയിൽ ‘നാച്ചുറൽ കലാമിറ്റി’ (Natural Calamity) കവറേജ് ഉണ്ടെന്ന് ഉറപ്പുവരുത്തുക.
മഴ സമയത്തെ അശ്രദ്ധമായ ഡ്രൈവിംഗ് വലിയ സാമ്പത്തിക നഷ്ടമുണ്ടാക്കാൻ സാധ്യതയുണ്ടെന്ന് യുണൈറ്റഡ് ഇൻഷുറൻസ് ബ്രോക്കേഴ്സ് ഉൾപ്പെടെയുള്ള പ്രമുഖ കമ്പനികൾ മുന്നറിയിപ്പ് നൽകുന്നു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt
