മലയാളി സംഘത്തിന്റെ 10 വർഷത്തെ കാത്തിരിപ്പ്:’ഗ്രാൻഡ് പ്രൈസ് പ്രതീക്ഷിച്ചു, എങ്കിലും സന്തോഷം’: ലക്ഷങ്ങളുടെ സമ്മാന തിളക്കത്തിൽ പ്രവാസി മലയാളികൾ

അബുദാബി ∙ പ്രവാസികളുടെ സ്വപ്‌നങ്ങൾ യാഥാർഥ്യമാക്കുന്ന ബിഗ് ടിക്കറ്റ് നറുക്കെടുപ്പിൽ ഇത്തവണ നാല് പേർക്ക് ആശ്വാസ സമ്മാനം ലഭിച്ചു. ബിഗ് ടിക്കറ്റ് സീരീസ് 279 ലൈവ് ഡ്രോയിൽ ഇന്ത്യ, പാക്കിസ്ഥാൻ, ബംഗ്ലദേശ് സ്വദേശികളായ നാല് പേരാണ് 50,000 ദിർഹം (ഏകദേശം 11 ലക്ഷം രൂപ) വീതം സ്വന്തമാക്കിയത്. മൊത്തം 2 ലക്ഷം ദിർഹമാണ് (ഏകദേശം 44 ലക്ഷം രൂപ) ആശ്വാസ സമ്മാനമായി വിതരണം ചെയ്തത്.

സമ്മാനം നേടിയവരിൽ ഒരാൾ മലയാളിയായ സിദ്ദീഖ് പാമ്പ്ലാത്ത് (42) ആണ്. കഴിഞ്ഞ 17 വർഷമായി ദുബായിൽ ധനകാര്യ സ്ഥാപനത്തിൽ ജോലി ചെയ്യുന്ന സിദ്ദീഖ്, 10 വർഷമായി 10 മുതൽ 15 പേർ അടങ്ങുന്ന ഒരു ഗ്രൂപ്പുമായി ചേർന്നാണ് എല്ലാ മാസവും ടിക്കറ്റുകൾ എടുക്കുന്നത്. വിജയിച്ച വിവരം അറിയിച്ചുകൊണ്ട് ഫോൺകോൾ വന്നപ്പോൾ ഗ്രാൻഡ് പ്രൈസ് പ്രതീക്ഷിച്ചു എന്നാണ് അദ്ദേഹം പ്രതികരിച്ചത്. “എങ്കിലും ഈ വിജയം വലിയ സന്തോഷം നൽകുന്നു,” അദ്ദേഹം കൂട്ടിച്ചേർത്തു.

സമ്മാനത്തുക ഗ്രൂപ്പ് അംഗങ്ങൾക്കായി പങ്കുവെക്കും. അടുത്ത തവണ ഗ്രാൻഡ് പ്രൈസ് നേടാനാവുമെന്നാണ് തങ്ങളുടെ പ്രതീക്ഷയെന്നും സിദ്ദീഖ് പറഞ്ഞു. ടിക്കറ്റ് നമ്പർ 279-233157 എടുത്ത ഷിഹാബ് ഉമ്മർ എന്ന ഇന്ത്യക്കാരനും വിജയികളിൽ ഉൾപ്പെടുന്നു.

ബംഗ്ലദേശ് സ്വദേശിക്കും വിജയം:

അബുദാബിയിൽ 20 വർഷമായി തൊഴിലാളിയായി ജോലി ചെയ്യുന്ന ബംഗ്ലദേശ് സ്വദേശി അലി ഹുസൈൻ മോസൺ അലി (35) 31 പേർ അടങ്ങുന്ന വലിയ ഗ്രൂപ്പുമായി ചേർന്നാണ് 12 വർഷമായി ബിഗ് ടിക്കറ്റിൽ പങ്കാളിയാകുന്നത്. ഇതൊരു ചെറിയ വിജയമാണെങ്കിലും തൻ്റെ കുടുംബത്തിനും ഗ്രൂപ്പ് അംഗങ്ങൾക്കും ഇത് വലിയ ആഘോഷമാണെന്ന് അദ്ദേഹം പറഞ്ഞു. പാക്കിസ്ഥാൻ സ്വദേശിയായ ആദിൽ മുഹമ്മദ് ആണ് സമ്മാനം നേടിയ മറ്റൊരു പ്രവാസി.

ഗ്രാൻഡ് പ്രൈസ് 55 കോടി രൂപ:

ബിഗ് ടിക്കറ്റിന്റെ ഒക്ടോബർ പ്രമോഷൻ ആവേശകരമായി തുടരുകയാണ്. ഈ മാസത്തെ പ്രധാന സമ്മാനമായ 2.5 കോടി ദിർഹമിന്റെ (ഏകദേശം 55 കോടി രൂപ) ഗ്രാൻഡ് പ്രൈസ് നവംബർ 3-ന് പ്രഖ്യാപിക്കും.

ഇതുകൂടാതെ, 250 ഗ്രാം തൂക്കമുള്ള 24 കാറ്റ് സ്വർണ ബാറുകൾ സമ്മാനമായി നൽകുന്ന പ്രതിവാര നറുക്കെടുപ്പിൽ ഇതുവരെ അഞ്ച് പേർക്ക് ഭാഗ്യം ലഭിച്ചു. ‘ദ് ബിഗ് വിൻ’ മത്സരത്തിൽ 1.5 ലക്ഷം ദിർഹം വരെ സമ്മാനം നേടാൻ അവസരമുണ്ട്, നവംബർ 1-നാണ് ഇതിന്റെ വിജയികളെ പ്രഖ്യാപിക്കുക. ഡ്രീം കാർ സീരീസിലൂടെ നിസ്സാൻ പട്രോൾ (നവംബർ 3), മസെരാട്ടി ഗ്രെക്കെയിൽ (ഡിസംബർ 3) എന്നീ ആഡംബര കാറുകളും നേടാൻ അവസരമുണ്ട്. ടിക്കറ്റുകൾ www.bigticket.ae വഴിയും വിമാനത്താവളങ്ങളിലെ കൗണ്ടറുകൾ വഴിയും ലഭ്യമാണ്.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dkr4HqQL4ZcCnF60iKb3SK?mode=ac_t

പ്രവാസികളുടെ കാത്തിരിപ്പിന് വിരാമം: 70 വയസ്സുവരെ 5 ലക്ഷം രൂപയുടെ ചികിത്സാ പരിരക്ഷ, നോർക്ക കെയർ പദ്ധതി യാഥാർഥ്യമായി; അപേക്ഷിക്കേണ്ടത് എങ്ങനെ?

പ്രവാസി മലയാളികളുടെ ദീർഘകാലത്തെ ആവശ്യമായിരുന്ന സമഗ്ര ആരോഗ്യ– അപകട ഇൻഷുറൻസ് പദ്ധതിയായ ‘നോർക്ക കെയർ’ ഒടുവിൽ യാഥാർഥ്യമായി. വിദേശത്തും ഇന്ത്യയിലെ മറ്റു സംസ്ഥാനങ്ങളിലും ജോലി ചെയ്യുന്ന കേരളീയർക്കും അവരുടെ കുടുംബങ്ങൾക്കും ഈ പദ്ധതിയുടെ പ്രയോജനം ലഭിക്കും.

2025 സെപ്റ്റംബർ 22-ന് മുഖ്യമന്ത്രി പിണറായി വിജയൻ ഉദ്ഘാടനം ചെയ്ത പദ്ധതിയുടെ പരിരക്ഷ നവംബർ ഒന്നു മുതൽ ലഭ്യമായിത്തുടങ്ങും. ലോക കേരള സഭയിൽ ഉൾപ്പെടെ ഉയർന്നുവന്ന പ്രധാന ആശയമായിരുന്നു ഈ സമഗ്ര ഇൻഷുറൻസ് പരിരക്ഷ.

പദ്ധതിയുടെ പ്രധാന പ്രത്യേകതകൾ:

ഇൻഷുറൻസ് പരിരക്ഷ: 5 ലക്ഷം രൂപവരെയുള്ള ചികിത്സാ പരിരക്ഷയാണ് ‘നോർക്ക കെയർ’ ഉറപ്പാക്കുന്നത്.

ആശുപത്രികൾ: ഇന്ത്യയിലെ 14,000-ൽ അധികം ആശുപത്രികളിൽ കാഷ്‌ലെസ് (പണരഹിത) ചികിത്സാ സൗകര്യം ലഭിക്കും.

പ്രായം: 18 മുതൽ 70 വയസ്സുവരെയുള്ളവർക്ക് മെഡിക്കൽ പരിശോധനകൾ കൂടാതെ എൻറോൾ ചെയ്യാം.

നിലവിലുള്ള രോഗങ്ങൾ: നിലവിലുള്ള രോഗങ്ങൾക്കും (Pre-existing diseases) ഇൻഷുറൻസ് പരിരക്ഷ ലഭിക്കും.

ആർക്കൊക്കെ അംഗമാകാം?

നോർക്ക പ്രവാസി ഐഡി കാർഡ്, എൻ.ആർ.കെ. ഐഡി കാർഡ്, അല്ലെങ്കിൽ സ്റ്റുഡൻ്റ് ഐഡി കാർഡ് എന്നിവയുള്ള വിദേശത്തും കേരളത്തിന് പുറത്ത് ഇന്ത്യയിലും ജോലി ചെയ്യുന്ന പ്രവാസി കേരളീയർക്കും, സ്റ്റുഡന്റ് വീസയിൽ പോയിട്ടുള്ള വിദ്യാർഥികൾക്കും കുടുംബങ്ങൾക്കും പദ്ധതിയിൽ ചേരാം.

പ്രീമിയം തുക (വാർഷികം):

ഒരാൾക്ക് (Individual) 7,500 രൂപ
കുടുംബ ഇൻഷുറൻസ് (ഭാര്യ, ഭർത്താവ്, 2 കുട്ടികൾ) 13,275 രൂപ
25 വയസ്സിൽ താഴെയുള്ള അധിക കുട്ടികൾക്ക് (ഒരാൾക്ക്) 4,130 രൂപ അധികം

ഇൻഷുറൻസ് കവറേജ് വിശദാംശങ്ങൾ:

ചികിത്സാ ചെലവ്: ആശുപത്രിയിൽ പ്രവേശിപ്പിക്കുന്നതിനു മുൻപുള്ള 30 ദിവസത്തെയും ഡിസ്ചാർജ് ചെയ്ത ശേഷമുള്ള 60 ദിവസം വരെയുള്ള ചികിത്സാ ചെലവും ലഭിക്കും. ഡേ കെയർ ചികിത്സകളും ഉൾപ്പെടുന്നു.

റൂം വാടക: ചികിത്സയ്ക്കായി കിടക്കുന്ന മുറിയുടെ വാടകയായി ഇൻഷുറൻസ് തുകയുടെ ഒരു ശതമാനം വരെ ലഭിക്കും.

ഐ.സി.യു. ചാർജുകൾ: ഐ.സി.യു. ചാർജുകൾക്ക് ഇൻഷുറൻസ് തുകയുടെ രണ്ട് ശതമാനം വരെ ലഭിക്കും.

ക്ലെയിം സമയം: കാഷ്‌ലെസ് സൗകര്യം ഇല്ലാത്ത ആശുപത്രികളിൽ നിന്നുള്ള ക്ലെയിമുകൾ നൽകാൻ 60 ദിവസം വരെ സമയം ലഭിക്കും.

അപകട പരിരക്ഷ:

വിദേശത്ത് അപകട മരണം: 5 ലക്ഷം രൂപ നഷ്ടപരിഹാരമായി ലഭിക്കും. മൃതദേഹം നാട്ടിലെത്തിക്കുന്നതിന് 50,000 രൂപ അധികമായി ലഭിക്കും.

ഇന്ത്യയിൽ അപകട മരണം: മൃതദേഹം നാട്ടിലെത്തിക്കുന്നതിന് 25,000 രൂപ സഹായം ലഭിക്കും.

വൈകല്യം: അപകടത്തിൽ സ്ഥിരമോ പൂർണമോ ആയ ശാരീരിക വൈകല്യം സംഭവിച്ചാൽ 5 ലക്ഷം രൂപ ലഭിക്കും. ഭാഗിക വൈകല്യങ്ങൾക്ക് പോളിസി ഷെഡ്യൂൾ പ്രകാരം നഷ്ടപരിഹാരം നൽകും.

അപേക്ഷിക്കേണ്ട വിധം:

നോർക്ക കെയറിനായുള്ള മൊബൈൽ ആപ്പ് ഉപയോഗിച്ച്, നോർക്ക ഐഡി കാർഡ് നമ്പർ/ എൻ.ആർ.കെ. ഐഡി കാർഡ് നമ്പർ/ സ്റ്റുഡൻ്റ് കാർഡ് നമ്പർ എന്നിവ ഉപയോഗിച്ച് ലോഗിൻ ചെയ്യുക. വിവരങ്ങൾ സമർപ്പിച്ച് പ്രീമിയം അടച്ച് പദ്ധതിയിൽ അംഗമാകാവുന്നതാണ്. പോളിസിയുടെ കാലാവധി ഒരു വർഷമാണ്, എല്ലാ വർഷവും പുതുക്കണം.

കൂടുതൽ വിവരങ്ങൾക്കായി 24 മണിക്കൂറും പ്രവർത്തിക്കുന്ന നോർക്ക ഗ്ലോബൽ കോൺടാക്ട് സെന്ററുമായി ബന്ധപ്പെടാം:

ഇന്ത്യയിൽ നിന്നും ടോൾ ഫ്രീ നമ്പർ: 1800 425 3939

വിദേശത്തുനിന്നും: +91-8802 012 345 (മിസ്ഡ് കോൾ സർവീസ്)

വെബ്‌സൈറ്റ്: www.norkaroots.kerala.gov.in / www.nifl.norkaroots.org

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dkr4HqQL4ZcCnF60iKb3SK?mode=ac_t

യുഎഇയിൽ അസ്ഥിര കാലാവസ്ഥ തുടരുന്നു; ചിലയിടങ്ങളിൽ മഴ; വ​രും​ദി​വ​സ​ങ്ങ​ളി​ലും മ​ഴ​ക്ക്​ സാ​ധ്യ​ത

ദുബായ്: യുഎഇയുടെ പല ഭാഗങ്ങളിലും ഞായറാഴ്ചയും ശക്തമായും ഭാഗികമായും മഴ ലഭിച്ചു. ദുബായ്, ഷാർജ, അബുദാബി, റാസൽഖൈമ തുടങ്ങിയ എമിറേറ്റുകളിലാണ് ഞായറാഴ്ച മഴ രേഖപ്പെടുത്തിയത്.

റാസൽഖൈമയിലെ അൽ ഗൈൽ, അദൻ, ഹംറാനിയ, വിമാനത്താവള പരിസരം എന്നിവിടങ്ങളിൽ ഉച്ചയ്ക്ക് രണ്ടുമണിയോടെയാണ് മഴ പെയ്തത്. പ്രധാന കാർഷിക മേഖലയായ ഹംറാനിയയിൽ മഴ ലഭിച്ചത് കർഷകർക്ക് വലിയ ആശ്വാസമായി. ദുബായിൽ വൈകിട്ട് ആറുമണിയോടെ മഴ ആരംഭിച്ചു. മഴയുടെ ദൃശ്യങ്ങൾ ദേശീയ കാലാവസ്ഥാ നിരീക്ഷണ കേന്ദ്രം (NCM) സമൂഹമാധ്യമ പ്ലാറ്റ്‌ഫോമുകളിൽ പങ്കുവെച്ചിട്ടുണ്ട്.

വരും ദിവസങ്ങളിലും മഴയ്ക്ക് സാധ്യത:

അസ്ഥിരമായ കാലാവസ്ഥ തുടരുന്നതിനാൽ വരും ദിവസങ്ങളിലും യുഎഇയിൽ മഴ പ്രതീക്ഷിക്കാമെന്ന് എൻ.സി.എം മുന്നറിയിപ്പ് നൽകി. പുതുതായി രൂപപ്പെട്ട ന്യൂനമർദം മൂലമാണ് മഴ തുടരുന്നത്.

ഇടിമിന്നലോടുകൂടി മഴയ്ക്ക് സാധ്യതയുണ്ടെന്നാണ് എൻ.സി.എം ഞായറാഴ്ച പുറത്തുവിട്ട മുന്നറിയിപ്പിൽ നൽകുന്ന സൂചന. രാജ്യത്തിന്റെ മധ്യമേഖലകളിലും പടിഞ്ഞാറൻ പ്രദേശങ്ങളിലുമാകും ശക്തമായ മഴയ്ക്ക് സാധ്യതയെന്നും എൻ.സി.എം വ്യക്തമാക്കുന്നു.

യാത്രാ സുരക്ഷാ നിർദ്ദേശങ്ങൾ:

പൊതുവെ നേരിയതോ മിതമായതോ ആയ രീതിയിൽ കാറ്റ് വീശാൻ സാധ്യതയുണ്ടെങ്കിലും, ചില സമയങ്ങളിൽ കാറ്റ് ശക്തമാകാൻ സാധ്യതയുണ്ട്. ഇത് റോഡിലെ ദൃശ്യപരത കുറയ്ക്കാൻ ഇടയാക്കുമെന്നതിനാൽ യാത്രക്കാർ ജാഗ്രത പാലിക്കണം.

അസ്ഥിര കാലാവസ്ഥ തുടരുന്ന സാഹചര്യത്തിൽ എൻ.സി.എം സുരക്ഷാ നിർദ്ദേശങ്ങളും നൽകി:

ശക്തമായ മഴയോ ഇടിമിന്നലോ ഉള്ള സമയങ്ങളിൽ താഴ്‌വാരങ്ങളിലും വെള്ളപ്പൊക്ക സാധ്യതയുള്ള സ്ഥലങ്ങളിലും യാത്ര ചെയ്യുന്നവർ അതീവ ജാഗ്രത പുലർത്തണം.

ഇടിമിന്നൽ സമയങ്ങളിൽ തുറസ്സായതോ ഉയർന്നതോ ആയ സ്ഥലങ്ങളിൽനിന്ന് വിട്ടുനിൽക്കണമെന്നും എൻ.സി.എം അഭ്യർഥിച്ചു.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dkr4HqQL4ZcCnF60iKb3SK?mode=ac_t

യുഎഇയിൽ ഇനി വീട്ടുജോലിക്കാർക്കുള്ള വിസ നടപടികൾ ഒറ്റ പ്ലാറ്റ്‌ഫോമിൽ: ‘വർക്ക് ഇൻ യുഎഇ’ വഴി ഇനി എല്ലാം എളുപ്പം

ദുബായ്: യുഎഇയിലെ താമസക്കാർക്ക് ഇനി വീട്ടുജോലിക്കാർക്കുള്ള (Domestic Workers) റെസിഡൻസി വിസ നടപടികൾ പൂർണ്ണമായും ഒറ്റ ഡിജിറ്റൽ പ്ലാറ്റ്‌ഫോം വഴി പൂർത്തിയാക്കാം. ‘Work in UAE’ (workinuae.ae) എന്ന പോർട്ടൽ വഴി വിസകൾ നൽകാനും പുതുക്കാനും റദ്ദാക്കാനും, കൂടാതെ അവരുടെ മെഡിക്കൽ ടെസ്റ്റുകൾ ഉൾപ്പെടെയുള്ള നടപടികൾ പൂർത്തിയാക്കാനും സാധിക്കും.

യുഎഇയുടെ ‘സീറോ ഗവൺമെൻ്റ് ബ്യൂറോക്രസി പ്രോഗ്രാമി’നെ പിന്തുണച്ചുകൊണ്ട്, മിനിസ്ട്രി ഓഫ് ഹ്യൂമൻ റിസോഴ്‌സസ് ആൻഡ് എമിറൈസേഷൻ (MoHRE) ആണ് ‘വർക്ക് ബണ്ടിൽ’ പ്ലാറ്റ്‌ഫോമിൻ്റെ ഭാഗമായി പുതിയ ‘ഡൊമസ്റ്റിക് വർക്കർ സർവീസസ്’ പ്രഖ്യാപിച്ചത്. ഫെഡറൽ അതോറിറ്റി ഫോർ ഐഡൻ്റിറ്റി, സിറ്റിസൺഷിപ്പ്, കസ്റ്റംസ്, ആൻഡ് പോർട്ട് സെക്യൂരിറ്റി (ICP), എമിറേറ്റ്‌സ് ഹെൽത്ത് സർവീസസ്, ഡിപ്പാർട്ട്‌മെൻ്റ് ഓഫ് ഹെൽത്ത് – അബുദാബി, ടെലികമ്മ്യൂണിക്കേഷൻസ് ആൻഡ് ഡിജിറ്റൽ ഗവൺമെൻ്റ് റെഗുലേറ്ററി അതോറിറ്റി എന്നിവയുമായി സഹകരിച്ചാണ് ഈ സംരംഭം നടപ്പാക്കുന്നത്.

നടപടിക്രമങ്ങൾ എളുപ്പത്തിലാകും
ഈ ഡിജിറ്റൽ പ്ലാറ്റ്‌ഫോം വഴി, വീട്ടുജോലിക്കാരെ നിയമിക്കുന്നതിനും അവരുടെ കാര്യങ്ങൾ കൈകാര്യം ചെയ്യുന്നതിനുമുള്ള എല്ലാ പ്രധാന ഘട്ടങ്ങളും ഉപയോക്താക്കൾക്ക് ഓൺലൈനായി പൂർത്തിയാക്കാം.

വിസ അപേക്ഷകൾ സമർപ്പിക്കൽ.

കരാറുകളിൽ ഒപ്പിടൽ.

മെഡിക്കൽ പരിശോധനകൾ ക്രമീകരിക്കൽ.

എമിറേറ്റ്‌സ് ഐ.ഡി, വിസ എന്നിവ ഇഷ്യൂ ചെയ്യൽ.

വിവിധ സർക്കാർ ഓഫീസുകൾ കയറി ഇറങ്ങാതെ ഈ നടപടികളെല്ലാം ഒറ്റയിടത്ത് പൂർത്തിയാക്കാൻ സാധിക്കും.

ഡിജിറ്റൽ സർവീസുകളുടെ വിജയം
പങ്കാളിത്ത സ്ഥാപനങ്ങൾ തമ്മിലുള്ള ശക്തമായ സഹകരണമാണ് ഈ പുതിയ സേവനം പ്രാവർത്തികമാക്കിയതെന്ന് MoHRE-യിലെ ലേബർ മാർക്കറ്റ് ആൻഡ് എമിറൈസേഷൻ ഓപ്പറേഷൻസ് അണ്ടർസെക്രട്ടറി ഖലീൽ ഇബ്രാഹിം ഖൂരി പറഞ്ഞു. വേഗതയേറിയതും കാര്യക്ഷമവും സംയോജിതവുമായ ഡിജിറ്റൽ സേവനങ്ങൾ നൽകാനുള്ള യുഎഇയുടെ കാഴ്ചപ്പാടാണ് ഇത് പ്രതിഫലിപ്പിക്കുന്നത്.

നിലവിലുള്ള ‘വർക്ക് ബണ്ടിൽ’ പ്ലാറ്റ്‌ഫോമിൻ്റെ മികച്ച വിജയത്തിന് പിന്നാലെയാണ് ഡൊമസ്റ്റിക് വർക്കർ സേവനങ്ങൾ കൂടി ഇതിലേക്ക് കൂട്ടിച്ചേർത്തതെന്നും, ഇത് ലോകോത്തര ഡിജിറ്റൽ ഗവൺമെൻ്റ് സംവിധാനം നിർമ്മിക്കുന്നതിൽ യുഎഇ കൈവരിക്കുന്ന തുടർച്ചയായ പുരോഗതിയുടെ സൂചനയാണെന്നും അദ്ദേഹം കൂട്ടിച്ചേർത്തു.

സേവനങ്ങൾ കൂടുതൽ വേഗമേറിയതും സൗകര്യപ്രദവും സുരക്ഷിതവുമാക്കുമെന്നും ഉപഭോക്തൃ സംതൃപ്തിയും സർക്കാർ കാര്യക്ഷമതയും വർദ്ധിപ്പിക്കുമെന്നും ICP ഡയറക്ടർ ജനറൽ മേജർ ജനറൽ സുഹൈൽ സയീദ് അൽ ഖൈലി അഭിപ്രായപ്പെട്ടു.

‘വർക്ക് ബണ്ടിൽ’ എന്ന ഏകീകൃത പ്ലാറ്റ്‌ഫോം വഴി തൊഴിലാളിയുമായി ബന്ധപ്പെട്ട എല്ലാ സേവനങ്ങളും കൈകാര്യം ചെയ്യാൻ സാധിക്കും. ഒറ്റ അപേക്ഷാ ഫോം, ബന്ധപ്പെട്ട എല്ലാ സ്ഥാപനങ്ങൾക്കും പൊതുവായ ഒറ്റ പേയ്‌മെൻ്റ് സംവിധാനം എന്നിവ ഈ പ്ലാറ്റ്‌ഫോമിൻ്റെ പ്രധാന സവിശേഷതകളാണ്. UAE PASS, ഗവൺമെൻ്റ് സർവീസസ് ബസ് (GSB) തുടങ്ങിയ ഡാറ്റാ കൈമാറ്റ ടൂളുകൾ ഉപയോഗിച്ച് പേപ്പർവർക്കുകൾ കുറയ്ക്കാനും നേരിട്ടുള്ള സന്ദർശനങ്ങൾ ഒഴിവാക്കാനും ഇത് സഹായിക്കുന്നു.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dkr4HqQL4ZcCnF60iKb3SK?mode=ac_t

വ്യാജ രസീതുകളുപയോഗിച്ച് വാഹനങ്ങൾ തട്ടിയെടുത്തു; യുഎഇയിൽ ഏഷ്യൻ പൗരന്മാരടങ്ങുന്ന വൻ തട്ടിപ്പ് സംഘം പിടിയിൽ

ഷാർജ ∙ വ്യാജ രസീതുകൾ ഉപയോഗിച്ച് വാഹനങ്ങൾ തട്ടിയെടുത്ത കേസിൽ ഏഷ്യൻ പൗരന്മാരടങ്ങുന്ന വൻ സംഘത്തെ ഷാർജ പോലീസ് അറസ്റ്റ് ചെയ്തു. പരാതി ലഭിച്ച് 12 മണിക്കൂറിനുള്ളിൽ തന്നെ ക്രിമിനൽ ഇൻവെസ്റ്റിഗേഷൻ ഡയറക്ടറേറ്റ് (സിഐഡി) നടത്തിയ നിർണായക നീക്കത്തിലാണ് തട്ടിപ്പ് സംഘത്തെ വലയിലാക്കിയത്.

ഓൺലൈൻ വെബ്‌സൈറ്റുകളിലും സാമൂഹിക മാധ്യമങ്ങളിലും വാഹനം വിൽക്കാൻ വെക്കുന്നവരെയാണ് തട്ടിപ്പ് സംഘം പ്രധാനമായും ലക്ഷ്യമിട്ടിരുന്നത്. പണം നൽകാതെ തന്നെ വാഹനം സ്വന്തമാക്കുക, വിൽപനക്കാരെ കബളിപ്പിച്ച് വ്യാജ പണമിടപാട് രേഖകൾ നൽകുക എന്നിവയായിരുന്നു ഇവരുടെ രീതി.

തട്ടിപ്പ് നടന്നത് ഇങ്ങനെ:

ഓൺലൈനിൽ വാഹനം വിൽപനയ്ക്ക് വെച്ച ഒരാൾക്ക് തട്ടിപ്പുകാർ ആകർഷകമായ വില വാഗ്ദാനം ചെയ്തു. തുടർന്ന്, തുക ബാങ്ക് അക്കൗണ്ടിലേക്ക് ട്രാൻസ്ഫർ ചെയ്തതായി കാണിച്ച് വ്യാജ രസീത് വിൽപനക്കാരന് അയച്ചു നൽകി. പണം അക്കൗണ്ടിൽ എത്താൻ സമയമെടുക്കുമെന്ന് വിശ്വസിപ്പിച്ച ശേഷം വിൽപനക്കാരൻ വാഹനം ഇവർക്ക് കൈമാറുകയായിരുന്നു. താൻ കബളിപ്പിക്കപ്പെട്ടെന്ന് മനസ്സിലാക്കിയ ഉടൻ ഇയാൾ പോലീസിൽ പരാതി നൽകി.

സംഘത്തലവൻ ബുദ്ധികേന്ദ്രം:

സംഭവത്തെ തുടർന്ന് ഷാർജ പോലീസ് ക്രിമിനൽ ഇൻവെസ്റ്റിഗേഷൻ ഡയറക്ടറേറ്റ് (സിഐഡി) തലവൻ കേണൽ ഡോ. ഖലീഫ ബൽഹായ്യുടെ നേതൃത്വത്തിൽ പ്രത്യേക അന്വേഷണ സംഘം രൂപീകരിച്ചു. അന്വേഷണത്തിൽ, സംഘത്തിന് ഒരു സംഘത്തലവൻ ഉണ്ടെന്നും ഇയാളാണ് തട്ടിപ്പുകൾ ആസൂത്രണം നടത്തുകയും മറ്റുള്ളവർക്ക് ചുമതലകൾ വീതിച്ചു നൽകുകയും ചെയ്തിരുന്നതെന്നും വ്യക്തമായി.

ഓൺലൈൻ വിൽപനക്കാരുമായി ബന്ധപ്പെടുന്ന സംഘാംഗങ്ങൾ വ്യാജ ഐഡി കാർഡുകളും വ്യാജ രസീതുകളും അയച്ച് ആദ്യം വിശ്വാസം പിടിച്ചുപറ്റും. വിശ്വാസം വർധിപ്പിക്കാൻ, പണം ലഭിച്ച ശേഷം മാത്രം ഉടമസ്ഥാവകാശം മാറ്റിയാൽ മതിയെന്നും ഇവർ വിൽപനക്കാരോട് ആവശ്യപ്പെടും. തുടർന്ന്, വാഹനം ഒരു പ്രത്യേക സ്ഥലത്ത് എത്തിക്കുമ്പോൾ അത് കൈക്കലാക്കി നമ്പർ പ്ലേറ്റുകൾ ഉടൻ തന്നെ കേടുവരുത്തി വിൽപനക്കാരനുമായുള്ള ബന്ധം വിച്ഛേദിച്ച് അപ്രത്യക്ഷരാവുകയായിരുന്നു ഇവരുടെ പതിവ്. അതീവ രഹസ്യ സ്വഭാവത്തോടെ നടത്തിയ നീക്കത്തിലാണ് പ്രതികളെ പോലീസ് പിടികൂടിയത്.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dkr4HqQL4ZcCnF60iKb3SK?mode=ac_t

ഇത്തിഹാദ് പാസഞ്ചർ ട്രെയിൻ സേവനങ്ങൾക്ക് ഇനി പ്രത്യേക ആപ്പ്; ഇനി എല്ലാ യാത്രകളും ഒരുമിച്ച് ബുക്ക് ചെയ്യാം

അബുദാബി: അടുത്ത വർഷം ആരംഭിക്കാനിരിക്കുന്ന ഇത്തിഹാദ് പാസഞ്ചർ ട്രെയിൻ സർവീസുകൾക്കായി പ്രത്യേക മൊബൈൽ ആപ്ലിക്കേഷൻ പുറത്തിറക്കുന്നു. ട്രെയിൻ യാത്ര പൂർത്തിയാക്കിയ ശേഷം ബസ്, ടാക്സി, ദുബായ് മെട്രോ, ഓൺ ഡിമാൻഡ് ടാക്സി എന്നിവയിലേക്കുള്ള തുടർ യാത്രകളും ഒരേ സമയം ആസൂത്രണം ചെയ്യാനാകുന്ന വിധത്തിലാണ് ആപ്പ് രൂപകൽപ്പന ചെയ്യുന്നത്.

ഇത്തിഹാദ് റെയിൽ ശൃംഖലയെ ‘സിറ്റി മാപ്പർ’ ആപ്പുമായി സംയോജിപ്പിച്ചാണ് ഈ നൂതന പദ്ധതി നടപ്പിലാക്കുന്നത്. യാത്ര പുറപ്പെടുന്ന സ്ഥലം മുതൽ ലക്ഷ്യസ്ഥാനത്ത് എത്തുന്നതുവരെയുള്ള എല്ലാ കണക്ഷൻ സേവനങ്ങളും ഈ ആപ്പ് വഴി ഒറ്റയടിക്ക് ബുക്ക് ചെയ്യാനാകും.

കൂടാതെ, ട്രെയിൻ റൂട്ടുകൾ, ടിക്കറ്റ് നിരക്കുകൾ, മറ്റ് യാത്രാ മാർഗങ്ങളുമായുള്ള താരതമ്യം ചെയ്യാനുള്ള സൗകര്യം എന്നിവയും ആപ്പിലൂടെ ഉപയോക്താക്കൾക്ക് ലഭ്യമാകും. ഇത് യുഎഇയിലെ പൊതുഗതാഗത യാത്ര കൂടുതൽ എളുപ്പവും കാര്യക്ഷമവുമാക്കാൻ സഹായിക്കും.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dkr4HqQL4ZcCnF60iKb3SK?mode=ac_t

യുഎഇയിൽ ഈ സാധനങ്ങളുടെ കസ്റ്റംസ് തീരുവ ഇരട്ടിയായി തുടരും; വർധന 2026 ഒക്ടോബർ വരെ നീട്ടി

ദുബായ്: യുഎഇയിൽ സ്റ്റീൽ, സ്റ്റീൽ കോയിലുകൾക്ക് നിലവിലുള്ള കസ്റ്റംസ് തീരുവ വർധനവ് അടുത്ത വർഷം ഒക്ടോബർ വരെ നീട്ടി. കസ്റ്റംസ് തീരുവ അഞ്ച് ശതമാനത്തിൽ നിന്ന് 10% ആയി വർധിപ്പിച്ചത് 2026 ഒക്ടോബർ 12 വരെ തുടരുമെന്ന് ദുബായ് കസ്റ്റംസ് പുറത്തിറക്കിയ നോട്ടീസിൽ വ്യക്തമാക്കി.

ധനകാര്യ മന്ത്രാലയത്തിൻ്റെ കത്ത് പരിഗണിച്ച് ഫെഡറൽ അതോറിറ്റി ഫോർ ഐഡൻ്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട്സ് സെക്യൂരിറ്റി എടുത്ത തീരുമാനത്തെ തുടർന്നാണ് ഈ വർദ്ധനവ് നീട്ടിയതെന്ന് അധികൃതർ അറിയിച്ചു.

വേൾഡ് ട്രേഡ് ഓർഗനൈസേഷൻ്റെ (WTO) റിപ്പോർട്ട് അനുസരിച്ച്, 2024-ൽ യുഎഇയുടെ ഇരുമ്പ്, സ്റ്റീൽ വിദേശ വ്യാപാരം 6% ഇടിഞ്ഞിരുന്നു.

യുഎസ് പ്രസിഡൻ്റ് ഡൊണാൾഡ് ട്രംപ് സ്റ്റീൽ, അലുമിനിയം ഉൽപ്പന്നങ്ങളുടെ ഇറക്കുമതി തീരുവ 25% ൽ നിന്ന് 50% ആയി ഉയർത്തിയപ്പോൾ യുഎഇ സ്റ്റീൽ നിർമാതാക്കൾ നേരത്തെ ശ്രദ്ധ നേടിയിരുന്നു. യുഎഇയിലെ സ്റ്റീൽ നിർമാതാക്കൾക്ക് യുഎസ് വിപണിയിൽ കാര്യമായ സ്വാധീനമില്ലാത്തതിനാൽ യുഎസ് തീരുവ വർദ്ധനവ് തങ്ങളെ നേരിട്ട് ബാധിക്കില്ലെന്ന് അന്ന് അവർ ഉറപ്പുനൽകിയിരുന്നു. പുതിയ കസ്റ്റംസ് തീരുവ വർധനവ് നീട്ടാനുള്ള തീരുമാനം പ്രാദേശിക സ്റ്റീൽ വ്യവസായത്തിന് പിന്തുണ നൽകാനാണ് ലക്ഷ്യമിടുന്നത്.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dkr4HqQL4ZcCnF60iKb3SK?mode=ac_t