യുഎഇ സ്കൂൾ പ്രവേശനം: പ്രായപരിധിയിൽ വൻ മാറ്റം

ദുബായ്: യുഎഇയിലെ സ്കൂൾ പ്രവേശനത്തിനുള്ള പ്രായപരിധി (Age Cut-off) പരിഷ്കരിച്ചതോടെ പ്രവാസി കുടുംബങ്ങൾക്കും സ്വദേശികൾക്കും വലിയ ആശ്വാസം. 2026-27 അധ്യയന വർഷം മുതൽ പ്രാബല്യത്തിൽ വരുന്ന പുതിയ നിയമപ്രകാരം, ആഗസ്റ്റ്/സെപ്റ്റംബർ മാസങ്ങളിൽ അധ്യയന വർഷം തുടങ്ങുന്ന സ്കൂളുകളിൽ ഡിസംബർ 31-നകം നിശ്ചിത പ്രായം തികയുന്ന കുട്ടികൾക്ക് പ്രവേശനം നേടാം. മുൻപ് ഇത് ആഗസ്റ്റ് 31 ആയിരുന്നു.

പുതിയ നിയമം ഇങ്ങനെ:

പുതിയ നിയമം അനുസരിച്ച് അഡ്മിഷൻ വർഷം ഡിസംബർ 31-നകം താഴെ പറയുന്ന പ്രായം തികയണം:

• പ്രീ-കെജി (FS1): 3 വയസ്സ്
• കെജി 1 (FS2): 4 വയസ്സ്
• കെജി 2 (Year 1): 5 വയസ്സ്
• ഗ്രേഡ് 1 (Year 2): 6 വയസ്സ്

രക്ഷിതാക്കൾക്ക് ആശ്വാസം:

സെപ്റ്റംബർ മുതൽ ഡിസംബർ വരെയുള്ള മാസങ്ങളിൽ ജനിച്ച കുട്ടികൾക്ക് മുൻപ് ഒരു വർഷം നഷ്ടമാകുന്ന അവസ്ഥയായിരുന്നു. പല കുടുംബങ്ങളും കുട്ടിയുടെ അധ്യയന വർഷം നഷ്ടപ്പെടാതിരിക്കാൻ സ്വന്തം നാട്ടിലേക്ക് മടങ്ങുന്ന സാഹചര്യം പോലും ഉണ്ടായിരുന്നു. പുതിയ നിയമം വന്നതോടെ ഒരേ വർഷം ജനിച്ച കുട്ടികൾക്ക് ഒരേ ക്ലാസ്സിൽ തന്നെ പഠിക്കാൻ സാധിക്കും. സെപ്റ്റംബറിൽ ജനിച്ച കുട്ടികൾ ക്ലാസ്സിലെ ഏറ്റവും പ്രായം കൂടിയ കുട്ടിയായി മാറുന്ന രീതിക്കും ഇതോടെ മാറ്റമാകും.

വിദഗ്ധരുടെ അഭിപ്രായം:

പ്രായപരിധിയിൽ ഇളവ് നൽകിയെങ്കിലും കുട്ടികളുടെ മാനസികവും വൈകാരികവുമായ പക്വത കൂടി കണക്കിലെടുക്കണമെന്ന് അധ്യാപകരും മനഃശാസ്ത്രജ്ഞരും നിർദ്ദേശിക്കുന്നു.

• വൈകാരിക പക്വത: അക്ഷരങ്ങളും അക്കങ്ങളും പഠിക്കുന്നതിനേക്കാൾ പ്രധാനം സ്കൂളിലെ അന്തരീക്ഷവുമായി കുട്ടി എത്രത്തോളം ഇണങ്ങുന്നു എന്നതാണെന്ന് വിദഗ്ധർ പറയുന്നു.
• സ്കൂളുകളുടെ പിന്തുണ: പ്രായം കുറഞ്ഞ കുട്ടികൾ ക്ലാസ്സിലെത്തുമ്പോൾ അവർക്ക് ആവശ്യമായ പ്രത്യേക പരിഗണനയും നിരീക്ഷണവും നൽകുമെന്ന് പ്രമുഖ സ്കൂൾ ഗ്രൂപ്പുകൾ വ്യക്തമാക്കി. ആദ്യത്തെ 6-8 ആഴ്ചകളിൽ കുട്ടികളുടെ പെരുമാറ്റം നിരീക്ഷിച്ച ശേഷം മാത്രമേ അന്തിമമായ തീരുമാനങ്ങൾ എടുക്കുകയുള്ളൂ.

ശ്രദ്ധിക്കേണ്ട കാര്യം: പ്രായപരിധിയിൽ ഇനി യാതൊരു ഇളവും അനുവദിക്കില്ലെന്ന് വിദ്യാഭ്യാസ മന്ത്രാലയം വ്യക്തമാക്കിയിട്ടുണ്ട്. ഡിസംബർ 31-ന് ശേഷം ജനിച്ച കുട്ടികൾക്ക് അടുത്ത അധ്യയന വർഷം വരെ കാത്തിരിക്കേണ്ടി വരും.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

‘കുറഞ്ഞ നിരക്കിൽ വീട്ടുജോലിക്കാരെയും സഹായികളെയും നൽകാം’; ഈ പരസ്യത്തിൽ വീഴല്ലേ, മുന്നറിയിപ്പുമായി ദുബായ് പൊലീസ്

സമൂഹമാധ്യമങ്ങളിലൂടെ പ്രചരിക്കുന്ന വ്യാജ റിക്രൂട്ട്‌മെന്റ് പരസ്യങ്ങൾക്കെതിരെ ദുബായ് പൊലീസ് പൊതുജനങ്ങൾക്ക് ശക്തമായ മുന്നറിയിപ്പ് നൽകി. കുറഞ്ഞ നിരക്കിൽ വീട്ടുജോലിക്കാരെയും മറ്റ് സഹായികളെയും ലഭ്യമാക്കാമെന്ന് വാഗ്ദാനം ചെയ്ത് തട്ടിപ്പുകാർ സജീവമാകുന്ന സാഹചര്യത്തിലാണ് പൊലീസ് ജാഗ്രതാ നിർദേശവുമായി രംഗത്തെത്തിയത്. ദുബായ് പൊലീസ് ക്രിമിനൽ ഇൻവെസ്റ്റിഗേഷൻ വിഭാഗത്തിന് കീഴിലുള്ള ആന്റി ഫ്രോഡ് സെന്ററാണ് ഈ മുന്നറിയിപ്പ് പുറപ്പെടുവിച്ചത്. വീട്ടുജോലിക്കാരെ നിയമിക്കാൻ ഉദ്ദേശിക്കുന്നവർ യുഎഇയിൽ ലൈസൻസുള്ളതും സർക്കാർ അംഗീകൃതവുമായ റിക്രൂട്ട്‌മെന്റ് ഏജൻസികളെ മാത്രം സമീപിക്കണമെന്ന് അധികൃതർ നിർദേശിച്ചു. ഔദ്യോഗിക നിയമചാനലുകൾക്ക് പുറത്തുള്ള വ്യക്തികൾക്കോ സ്ഥാപനങ്ങൾക്കോ പണം കൈമാറുന്നത് അപകടകരമാണെന്നും പൊലീസ് വ്യക്തമാക്കി. നിയമപരമായ നടപടിക്രമങ്ങൾ പാലിച്ചാൽ മാത്രമേ തൊഴിലുടമയുടെയും തൊഴിലാളിയുടെയും അവകാശങ്ങൾ സംരക്ഷിക്കപ്പെടുകയുള്ളൂവെന്നും അധികൃതർ ചൂണ്ടിക്കാട്ടി. സമൂഹമാധ്യമങ്ങളിലൂടെ ലഭിക്കുന്ന ആകർഷകമായ ഓഫറുകളിൽ കുടുങ്ങാതിരിക്കണമെന്നും പൊലീസ് അഭ്യർഥിച്ചു. തട്ടിപ്പുകാരുടെ പുതിയ തന്ത്രങ്ങളെക്കുറിച്ച് പൊതുജനങ്ങളെ ബോധവൽക്കരിക്കുന്നതിനായി ദുബായ് പൊലീസ് നടത്തുന്ന #BewareofFraud ക്യാംപെയ്നിന്റെ ഭാഗമായാണ് ഈ ജാഗ്രതാ നിർദേശം. ഏതെങ്കിലും സേവനദാതാക്കൾക്ക് വ്യക്തിഗത വിവരങ്ങൾ നൽകുന്നതിനോ പണം കൈമാറുന്നതിനോ മുൻപ് അവരുടെ വിശ്വാസ്യത ഉറപ്പാക്കേണ്ടത് അനിവാര്യമാണെന്ന് പൊലീസ് ഓർമിപ്പിച്ചു.

തട്ടിപ്പ് റിപ്പോർട്ട് ചെയ്യാൻ

സമൂഹമാധ്യമങ്ങളിൽ സംശയാസ്പദമായ പരസ്യങ്ങളോ ഓഫറുകളോ ശ്രദ്ധയിൽപ്പെട്ടാൽ ഉടൻ ഔദ്യോഗിക സംവിധാനങ്ങൾ വഴി റിപ്പോർട്ട് ചെയ്യാം. ദുബായ് പൊലീസ് സ്മാർട്ട് ആപ്പ് വഴി നേരിട്ട് പരാതി നൽകാനാവും. സൈബർ കുറ്റകൃത്യങ്ങൾ റിപ്പോർട്ട് ചെയ്യുന്നതിനുള്ള eCrime പ്ലാറ്റ്‌ഫോം വഴിയും പരാതി നൽകാം. അടിയന്തരമല്ലാത്ത പരാതികൾക്കായി 901 എന്ന നമ്പറിൽ പൊലീസ് കോൾ സെന്ററിലേക്കും ബന്ധപ്പെടാം. സുരക്ഷിതമായ നിയമപരമായ വഴികളിലൂടെയേ റിക്രൂട്ട്‌മെന്റ് നടപടികൾ നടത്താവൂ എന്നതാണ് ദുബായ് പൊലീസിന്റെ ശക്തമായ സന്ദേശം.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

മലയാളി സോഷ്യൽ മീഡിയ സ്റ്റാറിന്റെ ചിത്രം മസാജ് സെന്റർ പരസ്യത്തിന്; യുഎഇയിൽ പ്രവാസി മലയാളി യുവതി അറസ്റ്റിൽ, കോടികൾ പിഴ ലഭിക്കാൻ സാധ്യത

യുഎഇയിലെ പ്രമുഖ മലയാളി സോഷ്യൽ മീഡിയ ഇൻഫ്ലുവൻസറായ ഹഫീസയുടെ ചിത്രങ്ങൾ അനുവാദമില്ലാതെ മസാജ് സെന്ററുകളുടെ പരസ്യത്തിനായി ദുരുപയോഗം ചെയ്ത സംഭവത്തിൽ കണ്ണൂർ സ്വദേശിയെ അജ്മാൻ പോലീസ് അറസ്റ്റ് ചെയ്തു. ഇൻസ്റ്റഗ്രാമിൽ ലക്ഷക്കണക്കിന് ഫോളോവേഴ്‌സുള്ള ഹഫീസയുടെ ചിത്രങ്ങൾ അശ്ലീലച്ചുവയുള്ള അടിക്കുറിപ്പുകളോടെ പ്രചരിപ്പിച്ചത് ശ്രദ്ധയിൽപ്പെട്ടതിനെ തുടർന്ന് യുവതി യാബ് ലീഗൽ സർവീസിന്റെ സഹായത്തോടെ അജ്മാൻ പബ്ലിക് പ്രോസിക്യൂഷനിൽ പരാതി നൽകുകയായിരുന്നു. തുടർന്ന് പോലീസ് നടത്തിയ പഴുതടച്ച അന്വേഷണത്തിലാണ് പ്രതി വലയിലായത്.

യുഎഇ സൈബർ നിയമപ്രകാരം സോഷ്യൽ മീഡിയ വഴി ഒരാളെ അപകീർത്തിപ്പെടുത്തുന്നതും സ്വകാര്യത ലംഘിക്കുന്നതും അതീവ ഗൗരവകരമായ കുറ്റമാണ്. കുറ്റം തെളിയിക്കപ്പെട്ടാൽ പ്രതിക്ക് തടവ് ശിക്ഷയും 2.5 ലക്ഷം മുതൽ 5 ലക്ഷം ദിർഹം വരെ പിഴയും ലഭിക്കാൻ സാധ്യതയുണ്ട്. അതായത് ഏകദേശം 56 ലക്ഷം മുതൽ 1.1 കോടി രൂപ വരെ പിഴയായി നൽകേണ്ടി വരും. സൈബർ അതിക്രമങ്ങൾ നേരിടുമ്പോൾ ഭയപ്പെടാതെ നിയമപരമായി മുന്നോട്ട് പോകണമെന്നും ഇത്തരം കുറ്റകൃത്യങ്ങളിൽ ഏർപ്പെടുന്നവർക്കെതിരെ കർശന നടപടി സ്വീകരിക്കുമെന്നും അധികൃതർ മുന്നറിയിപ്പ് നൽകി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt