യുഎഇയില്‍ ഈ പ്രദേശത്ത് ‘പെയ്ഡ് പാര്‍ക്കിങ്’ വരുന്നു; കൂടുതൽ അറിയാം

അബുദാബിയിലെ പ്രധാന വ്യാവസായിക മേഖലയായ മുസഫയിൽ പൊതു പാർക്കിംഗ് സംവിധാനം കൂടുതൽ ക്രമീകരിക്കുന്നതിന്റെ ഭാഗമായി പെയ്ഡ് പാർക്കിംഗ് ഏർപ്പെടുത്തുന്നു. ജനുവരി 12 മുതൽ പദ്ധതിയുടെ ആദ്യഘട്ടം നടപ്പാക്കുമെന്ന് ക്യു മൊബിലിറ്റി അറിയിച്ചു. ആദ്യ ഘട്ടത്തിൽ മുസഫയിലെ M1, M2, M3, M4, M24 സെക്ടറുകളിലാണ് പെയ്ഡ് പാർക്കിംഗ് സംവിധാനം നിലവിൽ വരുന്നത്. ഭിന്നശേഷിക്കാർക്കായി പ്രത്യേകം ഒരുക്കിയ ഇടങ്ങൾ ഉൾപ്പെടെ മൊത്തം 4,680 പാർക്കിംഗ് ഇടങ്ങൾ ഈ ഘട്ടത്തിന്റെ പരിധിയിലുണ്ടാകും. സാധാരണ പാർക്കിംഗിന് മണിക്കൂറിന് 2 ദിർഹമാണ് നിരക്ക്. പാർക്കിംഗ് ഫീസ് ദർബ് (Darb), ടാം (Tamm) ആപ്പുകൾ വഴിയോ, എസ്‌എംഎസ് സേവനം വഴിയോ, പാർക്കിംഗ് മേഖലകളിൽ സ്ഥാപിച്ചിരിക്കുന്ന മെഷീനുകൾ വഴിയോ അടയ്ക്കാൻ കഴിയും. നിശ്ചിത സമയത്തിനുള്ളിൽ ഫീസ് അടയ്ക്കണമെന്ന് വാഹന ഉടമകളോട് അധികൃതർ നിർദ്ദേശിച്ചിട്ടുണ്ട്.

മുസഫയിൽ ദിനംപ്രതി വർധിച്ചുവരുന്ന വാഹനത്തിരക്കും ക്രമരഹിതമായ പാർക്കിംഗും നിയന്ത്രിക്കുക എന്നതാണ് പുതിയ സംവിധാനത്തിലൂടെ ലക്ഷ്യമിടുന്നത്. ഇതുവഴി ഗതാഗതക്കുരുക്ക് കുറയ്ക്കാനും തൊഴിലാളികൾക്കും സന്ദർശകർക്കും പാർക്കിംഗ് ഇടങ്ങൾ എളുപ്പത്തിൽ കണ്ടെത്താനും സാധിക്കുമെന്നാണ് പ്രതീക്ഷ. അബുദാബിയിലെ പാർക്കിംഗ് ശൃംഖല വിപുലീകരിക്കുന്നതിന്റെ ഭാഗമായി കഴിഞ്ഞ വർഷം അൽ ഷഹാമ, മുഹമ്മദ് ബിൻ സായിദ് സിറ്റി എന്നിവിടങ്ങളിലും പെയ്ഡ് പാർക്കിംഗ് സംവിധാനം നടപ്പാക്കിയിരുന്നു. ഈസ്റ്റ് മംഗ്രൂവ്സ്, ഡോൾഫിൻ പാർക്ക് തുടങ്ങിയ വിനോദസഞ്ചാര കേന്ദ്രങ്ങളിലും നിലവിൽ ക്രമീകരിച്ച പാർക്കിംഗ് സംവിധാനമാണ് പ്രവർത്തിക്കുന്നത്. പുതിയ സംവിധാനം നിലവിൽ വരുന്നതോടെ മുസഫയിലെ ഗതാഗത നിയന്ത്രണം കൂടുതൽ കാര്യക്ഷമമാകുമെന്നാണ് അധികൃതരുടെ വിലയിരുത്തൽ.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

യുഎഇയിലെ കാറപകടം; ഒരു പിഞ്ചു ജീവൻ കൂടി പൊലിഞ്ഞു, പ്രവാസി മലയാളി കുടുംബത്തിന് നഷ്ടമായത് നാല് കണ്മണികളെ!

അബുദാബി: പ്രവാസി മലയാളികളെ ഒന്നടങ്കം നോവിലാഴ്ത്തി അബുദാബിയിലെ കാറപകടത്തിൽ ചികിത്സയിലായിരുന്ന നാലാമത്തെ കുട്ടിയും മരണത്തിന് കീഴടങ്ങി. ദുബായിലെ വ്യാപാരിയും കോഴിക്കോട് സ്വദേശിയുമായ അബ്ദുൽ ലത്തീഫിന്റെ മകൻ അസാം ബിൻ അബ്ദുൽ ലത്തീഫ് (7) ആണ് ഇന്ന് മരിച്ചത്. ഇതോടെ അപകടത്തിൽ മരിച്ചവരുടെ എണ്ണം അഞ്ചായി.

അബുദാബിയിൽ നിന്ന് സന്ദർശനം കഴിഞ്ഞ് മടങ്ങുന്നതിനിടെ ഇവർ സഞ്ചരിച്ചിരുന്ന നിസാൻ പട്രോൾ കാർ അപകടത്തിൽപെടുകയായിരുന്നു. അബ്ദുൽ ലത്തീഫിന്റെ മക്കളായ അഷസ് (14), അമ്മാർ (12), അയാഷ് (5) എന്നിവരും വീട്ടുജോലിക്കാരിയായ മലപ്പുറം ചമ്രവട്ടം സ്വദേശി ബുഷറയും നേരത്തെ മരണപ്പെട്ടിരുന്നു. നാല് മക്കളെയും നഷ്ടപ്പെട്ട ഈ കുടുംബത്തിന്റെ ദുഃഖത്തിൽ പ്രവാസി ലോകം ഒന്നടങ്കം പങ്കുചേരുകയാണ്.

അപകടത്തിൽ പരിക്കേറ്റ അബ്ദുൽ ലത്തീഫും ഭാര്യയും മാതാവും ഇപ്പോഴും ആശുപത്രിയിൽ ചികിത്സയിലാണ്. സ്നേഹത്തോടെ കൂടെക്കൂട്ടിയ വീട്ടുവേലക്കാരിയും തന്റെ നാല് മക്കളും വിട്ടുപിരിഞ്ഞത് അറിയാതെ തീവ്രപരിചരണ വിഭാഗത്തിൽ കഴിയുന്ന മാതാപിതാക്കൾ നോവാവുകയാണ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

മാതൃകയായി മടക്കം; യുഎഇയിൽ ആറു പേർക്ക് പുതുജീവൻ നൽകി പ്രവാസി മലയാളി

അബുദാബിയിൽ ഇ-സ്കൂട്ടറിടിച്ച് മസ്തിഷ്ക മരണം സംഭവിച്ച മലയാളി പ്രവാസി എം. ബാബുരാജൻ മരണാനന്തരവും ആറുപേരിലൂടെ ജീവിതത്തിലേക്ക് മടങ്ങിവരുന്നു. പുതുവർഷത്തിന് തൊട്ടുമുൻപ് ആറ് കുടുംബങ്ങൾക്ക് പ്രത്യാശയുടെ വെളിച്ചം നൽകിക്കൊണ്ടാണ് ബാബുരാജന്റെ അവയവങ്ങൾ ദാനം ചെയ്യാൻ അദ്ദേഹത്തിന്റെ കുടുംബം തീരുമാനമെടുത്തത്. സ്വർണ്ണപ്പണിക്കാരനായ ബാബുരാജൻ ഈ മാസം 16-ന് അബുദാബി വേൾഡ് ട്രേഡ് സെന്ററിന് സമീപമുണ്ടായ വാഹനാപകടത്തിലാണ് അന്തരിച്ചത്.

അബുദാബി വേൾഡ് ട്രേഡ് സെന്ററിനടുത്തുള്ള ട്രാഫിക് സിഗ്നലിൽ റോഡ് മുറിച്ചുകടക്കുന്നതിനിടെയാണ് ഇലക്ട്രിക് സ്കൂട്ടർ ബാബുരാജനെ ഇടിച്ചത്. ജോലിസ്ഥലത്തേക്ക് പോകുന്നതിനിടെയുണ്ടായ അപകടത്തിൽ തലയ്ക്ക് ഗുരുതരമായി പരിക്കേറ്റ അദ്ദേഹത്തെ ഉടൻ ആശുപത്രിയിൽ എത്തിച്ച് ശസ്ത്രക്രിയയ്ക്ക് വിധേയനാക്കിയെങ്കിലും മസ്തിഷ്ക മരണം സംഭവിക്കുകയായിരുന്നു. പ്രിയപ്പെട്ടവന്റെ വിയോഗവാർത്ത കേട്ട ആഘാതത്തിനിടയിലും മറ്റുള്ളവർക്ക് ജീവൻ പകർന്നു നൽകുക എന്ന പുണ്യപ്രവൃത്തിയിലേക്ക് അദ്ദേഹത്തിന്റെ കുടുംബം ധീരമായ ചുവടുവെച്ചു.

യുഎഇ ആരോഗ്യ മന്ത്രാലയത്തിന്റെ അവയവദാന സംരംഭമായ ‘ഹയാത്ത് പ്രോഗ്രാമുമായി’ ഏകോപിപ്പിച്ചാണ് ഹൃദയം, വൃക്കകൾ, പാൻക്രിയാസ്, കരൾ, ശ്വാസകോശം എന്നിവ ദാനം ചെയ്തത്. തങ്ങൾക്ക് പ്രിയപ്പെട്ടവനെ നഷ്ടപ്പെട്ടെങ്കിലും മറ്റുള്ളവരിലൂടെ അദ്ദേഹം ജീവിക്കട്ടെ എന്ന കുടുംബത്തിന്റെ ആഗ്രഹം മനുഷ്യത്വത്തിന്റെ വലിയൊരു മാതൃകയാണ് സമൂഹത്തിന് മുന്നിൽ വെക്കുന്നത്. മൃതദേഹം നാട്ടിലേക്ക് കൊണ്ടുപോകുന്നതിനുള്ള നടപടിക്രമങ്ങളിൽ ഹയാത്ത് ടീം കുടുംബത്തെ സഹായിക്കുന്നുണ്ട്. കുമാരിയാണ് ബാബുരാജന്റെ ഭാര്യ. പ്രീതി, കൃഷ്ണ പ്രിയ എന്നിവർ മക്കളാണ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt