Pravasiinfo

യുണിഫൈഡ് പേമെന്റ്സ് ഇന്റർഫേസ് (യുപിഐ) വഴിയുള്ള ഇടപാടുകൾ ജൂൺ 16(ഇന്ന്) മുതൽ വേഗത്തിലാകും. യുപിഐയുടെ മേൽനോട്ടം വഹിക്കുന്ന നാഷണൽ പേമെന്റ്സ് കോർപ്പറേഷൻ ഓഫ് ഇന്ത്യയാണ് (എൻപിസിഐ) ഇക്കാര്യം അറിയിച്ചത്. ഈ മാറ്റം ബാങ്കുകൾക്കും, ഫോൺപേ, ഗൂഗിൾപേ പോലുള്ള സേവനദാതാക്കൾക്കും ഉപകാരപ്പെടുമെന്ന് സർക്കുലറിലുണ്ട്.പണം അയക്കൽ, ഇടപാട് പരിശോധിക്കൽ തുടങ്ങിയവയ്ക്ക് നിലവിൽ 30 സെക്കൻഡാണ് ആവശ്യം. ഇനി 15 മുതൽ സെക്കൻഡുകൾ മതിയാകും. 30 സെക്കൻഡുകളെടുത്തിരുന്ന ട്രാൻസാക്ഷൻ റിവേഴ്സലിന് ഇനി 10 സെക്കൻഡും. 15 സെക്കൻഡ് എടുത്തിരുന്ന വിലാസം പരിശോധിക്കൽ, ഇനി 10 സെക്കൻഡുകൊണ്ടും പൂർത്തിയാകും.യുപിഐ സംവിധാനത്തിൽ വേറേയും സുപ്രധാന മാറ്റങ്ങൾ ഉടൻ നടപ്പാക്കുമെന്നും എൻപിസിഐ അറിയിച്ചു. ബാലൻസ് പരിശോധന, ഓട്ടോ-പേമെന്റ് തുടങ്ങിയവയിൽ ജൂലായ്ക്കുശേഷമാണ് മാറ്റങ്ങൾ വരുത്തുക. യുപിഐ ആപ്പ് വഴി ഒരു ദിവസം 50 തവണ മാത്രം അക്കൗണ്ട് ബാലൻസ് പരിശോധിക്കാൻ കഴിയുന്ന തരത്തിലാണ് മാറ്റം.

ഓട്ടോപേ മാൻഡേറ്റിൽ ഒരുതവണ ഇടപാടിന് ശ്രമിച്ച് പരാജയപ്പെട്ടാൽ വീണ്ടും മൂന്ന് തവണ കൂടി മാത്രമേ ശ്രമിക്കൂ. പീക്ക് അല്ലാത്ത സമയങ്ങളിൽ മാത്രമാണ് ഓട്ടോ-പേമെന്റിനായീ വീണ്ടും ശ്രമിക്കുക. ഒരുദിവസം ഒരു സെക്കൻഡിൽ ഏറ്റവും കൂടുതൽ ഇടപാടുകൾ നടക്കുന്ന സമയമാണ് പീക്ക് സമയം. സാധാരണഗതിയിൽ ഇത് രാവിലെ 10 മണി മുതൽ ഉച്ചയ്ക്ക് ഒരുമണിവരെയും വൈകീട്ട് അഞ്ച് മണി മുതൽ രാത്രി ഒമ്പതരവരെയുമാണ്.

ലിസ്റ്റ് അക്കൗണ്ട് ആണ് യുപിഐ ആപ്പുകളിൽ അവതരിപ്പിക്കാൻ പോകുന്ന മറ്റൊരു പ്രധാന ഫീച്ചർ. ഇതുപയോഗിച്ച് ഉപഭോക്താവിന്റെ മൊബൈൽ ഫോൺ നമ്പറുമായി ബന്ധിപ്പിച്ച എല്ലാ ബാങ്ക് അക്കൗണ്ടുകളും യുപിഐ ആപ്പിലൂടെ കാണാൻ കഴിയും. ഒരു ദിവസം പരമാവധി 25 തവണയാണ് ഇത് നോക്കാൻ കഴിയുക എന്നും എൻപിസിഐ അറിയിച്ചു.