യുഎഇയിലെ പ്രവാസികളുടെ ശ്രദ്ധയ്ക്ക്; ഈ ദിവസങ്ങൾ യാത്രകൾക്കായി തിരഞ്ഞെടുക്കൂ; ടിക്കറ്റുകളിൽ വലിയ തുക ലാഭിക്കാം

യുഎഇയിലെ പ്രവാസികൾക്ക് സന്തോഷവാർത്ത. ശൈത്യകാലവും ക്രിസ്മസ് അവധിയും മുന്നിൽ കണ്ടു യാത്ര പ്ലാൻ ചെയ്യുന്നവർക്ക് നവംബർ മാസത്തിൽ വിമാന ടിക്കറ്റുകളിൽ വലിയ തോതിൽ ലാഭം നേടാനാകും. യുഎഇയിൽ നിന്നുള്ള അന്താരാഷ്ട്ര യാത്രകൾക്കായി ഏറ്റവും അനുയോജ്യമായ ദിവസങ്ങൾ ഏതൊക്കെയാണെന്ന് വ്യക്തമാക്കുന്ന ഫാൾ ട്രാവൽ ഔട്ട്‌ലുക്ക് റിപ്പോർട്ട് യാത്രാ പ്ലാറ്റ്‌ഫോമായ എക്‌സ്പീഡിയ പുറത്തിറക്കി.

റിപ്പോർട്ട് പ്രകാരം നവംബർ 11, 19 തീയതികളിൽ യാത്ര ആരംഭിക്കുന്നവർക്ക് ടിക്കറ്റ് നിരക്കിൽ വലിയ ഇളവ് ലഭിക്കും. നവംബർ 24 ഏറ്റവും ചെലവേറിയ ദിവസമായി രേഖപ്പെടുത്തിയിട്ടുണ്ട്. തിരക്ക് ഒഴിവാക്കാനും പണം ലാഭിക്കാനും നവംബർ 20 മുതൽ 22 വരെ യാത്ര തിരഞ്ഞെടുക്കുന്നത് മികച്ചതായിരിക്കുമെന്നും റിപ്പോർട്ട് പറയുന്നു. നവംബർ മൂന്നാം ആഴ്ചയിൽ വിമാന റൂട്ടുകൾ ശാന്തമാകുന്നതോടെ യുഎസ്, കാനഡ തുടങ്ങിയ ദീർഘദൂര യാത്രകൾക്കും മികച്ച അവസരമുണ്ടാകുമെന്ന് പ്രവചിക്കുന്നു.

വേനൽക്കാലത്തേക്കാൾ കുറഞ്ഞ നിരക്കിലാണ് നവംബർ-ഡിസംബർ മാസങ്ങളിലെ വിമാന ടിക്കറ്റുകൾ ലഭിക്കുന്നത്.ജോർജിയ, അസർബൈജാൻ, അർമേനിയ, കിഴക്കൻ യൂറോപ്പ് തുടങ്ങിയിടങ്ങളാണ് ഇപ്പോൾ പ്രവാസികളുടെ പ്രധാന യാത്രാ കേന്ദ്രങ്ങൾ. കുറഞ്ഞ നിരക്കുകൾ ഉറപ്പാക്കാൻ ടിക്കറ്റ് അലേർട്ടുകൾ സജ്ജീകരിക്കണമെന്നും, ഹോട്ടൽ ബുക്കിംഗിൽ ഇളവുകൾ ശ്രദ്ധിക്കണമെന്നും, വിമാന ടിക്കറ്റും താമസവും ഒരുമിച്ച് ബുക്ക് ചെയ്താൽ കൂടുതൽ ലാഭം നേടാനാകുമെന്നും റിപ്പോർട്ടിൽ ഉപദേശിക്കുന്നു.

യുഎഇയിലെ പ്രവാസികളുടെ ശ്രദ്ധയ്ക്ക്; പുതിയ വീട്ടിലേക്ക് താമസം മാറുമ്പോൾ നിങ്ങൾക്കുണ്ടാകുന്ന അധിക ചെലവുകൾ അറിയാം

ദുബായിൽ പുതിയ അപ്പാർട്ട്‌മെന്റിലേക്കോ വില്ലയിലേക്കോ താമസം മാറുന്നവർക്കു വാടകയ്ക്ക് പുറമേ നിരവധി അധിക ചെലവുകൾ ഉണ്ടാകുമെന്നാണ് റിപ്പോർട്ടുകൾ. ഇജാരി രജിസ്‌ട്രേഷൻ, യൂട്ടിലിറ്റി ഡെപ്പോസിറ്റുകൾ, മൂവിംഗ് കമ്പനി ചാർജുകൾ തുടങ്ങി പല ചെലവുകളും കുടിയേറ്റക്കാർക്കായി കാത്തിരിക്കുന്നു.

ദുബായ് ലാൻഡ് ഡിപ്പാർട്ട്‌മെന്റ് (DLD) കൈകാര്യം ചെയ്യുന്ന ഔദ്യോഗിക ലീസ് രജിസ്‌ട്രേഷൻ സംവിധാനമായ ഇജാരി വഴിയാണ് വാടക കരാർ രജിസ്റ്റർ ചെയ്യേണ്ടത്. കരാർ രജിസ്റ്റർ ചെയ്താൽ മാത്രമേ ജല-വൈദ്യുതി കണക്ഷൻ, ഇന്റർനെറ്റ്, ടിവി, ലാൻഡ് ലൈൻ തുടങ്ങിയ അവശ്യ സേവനങ്ങൾ സജീവമാക്കാൻ സാധിക്കൂ. കൂടാതെ, താമസം തുടങ്ങുന്നതിനുമുമ്പ് വീട്ടുടമസ്ഥർ സുരക്ഷാ ഡെപ്പോസിറ്റും ആവശ്യപ്പെടും. വാടക സമയത്ത് നൽകാത്തതോ വീടിന് നാശനഷ്ടം വരുത്തിയതോ ആയാൽ ഈ തുക തിരികെ ലഭിക്കില്ല.

ഇജാരി രജിസ്‌ട്രേഷൻ കഴിഞ്ഞാൽ DEWA കണക്ഷൻ എടുക്കുന്നതിനായി ആക്ടിവേഷൻ ഫീസും സെക്യൂരിറ്റി ഡെപ്പോസിറ്റും അടയ്ക്കണം. വാർഷിക വാടകയുടെ 5 ശതമാനം ഭവനഫീസ് ദുബായ് മുനിസിപ്പാലിറ്റി ഈടാക്കും. ഇത് പ്രതിമാസ DEWA ബില്ലിൽ ചേർക്കപ്പെടും. പ്രോപ്പർട്ടി ഏജന്റിനെ ഉപയോഗിച്ചാൽ വാർഷിക വാടകയുടെ 5 ശതമാനം, കുറഞ്ഞത് 5,000 ദിർഹം കമ്മീഷനായി നൽകേണ്ടതുണ്ടാകും.

താമസം മാറ്റുന്നതിനായി മൂവിംഗ് കമ്പനികളുടെ സേവനം ഉപയോഗിക്കുകയാണെങ്കിൽ അവരുടെ ഫീസും ചേർന്നുതന്നെ വരും. വൃത്തിയാക്കൽ, നവീകരണ ചെലവുകൾ, ഇന്റർനെറ്റ്-ടിവി-ടെലികോം ഇൻസ്റ്റലേഷൻ, ഗ്യാസ് കണക്ഷൻ തുടങ്ങിയവയ്ക്കും അധികമായി വലിയൊരു തുക ചെലവഴിക്കേണ്ടിവരുമെന്നാണ് റിപ്പോർട്ട്.

യുഎഇ: ഭാര്യയെയും മകനെയും നാട്ടിലേക്ക് യാത്രയാക്കി തിരികെ താമസസ്ഥലത്തെത്തിയ യുവാവ് കുഴഞ്ഞുവീണ് മരിച്ചു

ഭാര്യയെയും മകനെയും വിമാനത്താവളത്തിൽ നാട്ടിലേക്ക് യാത്രയാക്കി താമസസ്ഥലത്ത് തിരിച്ചെത്തിയ മലയാളി യുവാവ് കുഴഞ്ഞുവീണു മരിച്ചു. ആലപ്പുഴ മണ്ണഞ്ചേരി സ്വദേശിയായ ഹരിരാജ് സുദേവൻ (37) ആണ് മരിച്ചത്. അബുദാബി ഇൻ്റർനാഷനൽ ഡെവലപ്‌മെൻ്റ് കമ്പനിയിൽ മെക്കാനിക്കൽ എൻജിനീയറായിരുന്നു ഹരിരാജ്. ഭാര്യ അനു അശോകിനെയും ഏകമകൻ ഇഷാനെയും നാട്ടിലേക്ക് യാത്രയാക്കിയ ശേഷം താമസസ്ഥലത്തേക്ക് മടങ്ങിയെത്തിയ ഉടനെയാണ് കുഴഞ്ഞുവീണത്. കുഴഞ്ഞുവീണതിനെ തുടർന്ന് സുഹൃത്തുക്കൾ ഉടൻ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. എം.വി. സുദേവൻ, ബീനാ സുദേവൻ എന്നിവരാണ് മാതാപിതാക്കൾ. ഭാര്യ അനു അശോക് ഇന്ത്യൻ റെയിൽവേയിലെ ഡോക്ടറാണ്. ഇഷാൻ ഏക മകനാണ്. മൃതദേഹം നാട്ടിലെത്തിച്ച് ഇന്ന് (ചൊവ്വാഴ്ച) ഉച്ചയ്ക്ക് ഒരു മണിക്ക് വീട്ടുവളപ്പിൽ സംസ്കരിക്കും.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dkr4HqQL4ZcCnF60iKb3SK?mode=ac_t

ട്രോപ്പിക്കൽ കൊടുങ്കാറ്റ് ‘ശക്തി’ യുഎഇയെ ബാധിക്കുമോ?; സ്ഥിരീകരണവുമായി ദേശീയ കാലാവസ്ഥാ കേന്ദ്രം

അബുദാബി: പടിഞ്ഞാറൻ അറബിക്കടലിൽ രൂപംകൊണ്ട ‘ശക്തി’ എന്ന ട്രോപ്പിക്കൽ കൊടുങ്കാറ്റ് രാജ്യത്തെ ഒരു തരത്തിലും ബാധിക്കില്ലെന്ന് യുഎഇ സ്ഥിരീകരിച്ചു. ദേശീയ കാലാവസ്ഥാ കേന്ദ്രം (NCM) ആണ് ഇക്കാര്യം ഔദ്യോഗികമായി അറിയിച്ചത്. നിലവിൽ അക്ഷാംശം 19.6 വടക്ക്, രേഖാംശം 60.5 കിഴക്ക് എന്നിവിടങ്ങളിൽ സ്ഥിതി ചെയ്യുന്ന ഉഷ്ണമേഖലാ ന്യൂനമർദം യുഎഇക്ക് ഭീഷണിയല്ലെന്ന് NCM വ്യക്തമാക്കി.

ശ്രീലങ്കൻ ഭാഷയിൽ ‘ശക്തി’ എന്നാൽ ഊർജ്ജം അല്ലെങ്കിൽ ശക്തി എന്നാണർത്ഥമാക്കുന്നത്. മണിക്കൂറിൽ 60 മുതൽ 70 കിലോമീറ്റർ വരെ വേഗതയിലുള്ള കാറ്റോടുകൂടി പടിഞ്ഞാറൻ അറബിക്കടലിലാണ് ഈ ട്രോപ്പിക്കൽ കൊടുങ്കാറ്റ് നിലവിൽ കേന്ദ്രീകരിച്ചിരിക്കുന്നത്.

നേരത്തെ, കാലാവസ്ഥാ മുന്നറിയിപ്പായി റെഡ് അലർട്ട് നൽകിയിരുന്നെങ്കിലും, ഈ കൊടുങ്കാറ്റ് രാജ്യത്തെ ബാധിക്കില്ലെന്ന് അധികൃതർ താമസക്കാർക്ക് ഉറപ്പുനൽകിയിരുന്നു. പൊതുജനങ്ങൾ ഔദ്യോഗിക വിവരങ്ങൾ മാത്രം പിന്തുടരണമെന്നും കിംവദന്തികൾ ഒഴിവാക്കണമെന്നും സ്ഥിതിഗതികൾ തുടർച്ചയായി നിരീക്ഷിക്കുന്നുണ്ടെന്നും NCM അറിയിച്ചു.

അടുത്ത 24 മണിക്കൂറിനുള്ളിൽ ഉഷ്ണമേഖലാ കൊടുങ്കാറ്റിന്റെ ശക്തി കുറഞ്ഞ്, ക്രമേണ ഉഷ്ണമേഖലാ ന്യൂനമർദ്ദമായും തുടർന്ന് ന്യൂനമർദ്ദമായും മാറാനാണ് സാധ്യത. ഇത് മണിക്കൂറിൽ 25 മുതൽ 55 കിലോമീറ്റർ വരെ വേഗതയിൽ തെക്കുകിഴക്ക് ദിശയിൽ നീങ്ങിക്കൊണ്ടിരിക്കും.

അതേസമയം, ശനിയാഴ്ച ഒക്ടോബർ 4 ന് ഒമാൻ അധികൃതർ വടക്കുകിഴക്കൻ അറബിക്കടലിൽ രൂപപ്പെട്ട ഉഷ്ണമേഖലാ കൊടുങ്കാറ്റ് കാറ്റഗറി 1 ചുഴലിക്കാറ്റായി മാറാൻ സാധ്യതയുണ്ടെന്ന് സ്ഥിരീകരിച്ചിരുന്നു. ലോകമെമ്പാടും ഏറ്റവും കൂടുതൽ അംഗീകരിക്കപ്പെട്ടിട്ടുള്ള സാഫിർ-സിംപ്സൺ സ്കെയിലിലെ ഏറ്റവും താഴ്ന്ന നിലയാണ് കാറ്റഗറി 1 ചുഴലിക്കാറ്റ്. ഇതിന് മണിക്കൂറിൽ 119 മുതൽ 153 കിലോമീറ്റർ വരെ വേഗതയുണ്ടാകാം, കൂടാതെ ഇത് മൂലമുണ്ടാകുന്ന നാശനഷ്ടങ്ങൾ കുറഞ്ഞതോ മിതമായതോ ആയിരിക്കും.

ഒമാനിലെ അധികൃതർ പൊതുജനങ്ങളോട് ഔദ്യോഗിക ചാനലുകൾ വഴി വിവരങ്ങൾ പിന്തുടരാനും കടലിൽ നീന്തുന്നതോ ജലാശയങ്ങളിൽ മറ്റ് പ്രവർത്തനങ്ങൾ നടത്തുന്നതോ ഒഴിവാക്കാനും ആവശ്യപ്പെട്ടിട്ടുണ്ട്.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dkr4HqQL4ZcCnF60iKb3SK?mode=ac_t