കണ്ണീരൊപ്പാൻ പോലീസ്; യുഎഇയിലെ ഈ എമിറേറ്റ്സിൽ മരണാനന്തര നടപടികൾ ഇനി ‘വയാക്കും’ വഴി വേഗത്തിലാക്കാം

റാസൽഖൈമയിൽ പ്രിയപ്പെട്ടവരുടെ വേർപാടിൽ ഉഴലുന്ന കുടുംബങ്ങൾക്ക് ആശ്വാസമായി പോലീസ് പുതിയ ഡിജിറ്റൽ പാക്കേജ് പ്രഖ്യാപിച്ചു. ‘വയാക്കും’ അഥവാ ‘നിങ്ങളോടൊപ്പം’ എന്ന് പേരിട്ടിരിക്കുന്ന ഈ പദ്ധതിയിലൂടെ മരണാനന്തരമുള്ള നിയമപരമായ നടപടിക്രമങ്ങൾ 70 ശതമാനത്തോളം കുറയ്ക്കാൻ സാധിക്കുമെന്ന് റാക് പോലീസ് മേധാവി മേജർ ജനറൽ അലി അബ്ദുള്ള ബിൻ അൽവാൻ അൽ നുഐമി വ്യക്തമാക്കി.

നിലവിൽ ആവശ്യമായ രേഖകളിൽ പകുതിയോളം പുതിയ സംവിധാനത്തിലൂടെ ഒഴിവാക്കിയിട്ടുണ്ട്. മെഡിക്കൽ–ആരോഗ്യ സ്ഥാപനങ്ങൾ, മുനിസിപ്പാലിറ്റി, പോലീസ് സ്റ്റേഷനുകൾ എന്നിവയെ ഒരൊറ്റ ഡിജിറ്റൽ പ്ലാറ്റ്‌ഫോമിൽ ബന്ധിപ്പിച്ചാണ് ഈ സേവനം നടപ്പിലാക്കുന്നത്. ഇതുവഴി ഉറ്റവർ നഷ്ടപ്പെട്ട കുടുംബാംഗങ്ങൾക്ക് വിവിധ സർക്കാർ ഓഫീസുകൾ കയറിയിറങ്ങുന്നതും ദൂരയാത്രകൾ ചെയ്യുന്നതും ഒഴിവാക്കാം.

മരണവിവരം ബന്ധപ്പെട്ട വകുപ്പുകൾക്ക് ഈ പ്ലാറ്റ്‌ഫോം വഴി നേരിട്ട് ലഭിക്കുന്നതിനാൽ ആവശ്യമായ അനുമതികളും സർട്ടിഫിക്കറ്റുകളും വളരെ വേഗത്തിൽ തന്നെ അധികൃതർക്ക് തയ്യാറാക്കാൻ സാധിക്കും. പൊതുജനങ്ങളിൽ നിന്ന് ലഭിച്ച നിർദ്ദേശങ്ങൾ പരിഗണിച്ചാണ് ഈ മാനുഷിക സംരംഭം യാഥാർത്ഥ്യമാക്കിയത്. പ്രിയപ്പെട്ടവരുടെ വേർപാടിൽ ദുഃഖിക്കുന്ന കുടുംബങ്ങളുടെ മാനസികവും ശാരീരികവുമായ ഭാരം കുറയ്ക്കുക എന്ന ലക്ഷ്യത്തോടെയാണ് ഈ നൂതന പദ്ധതി ആവിഷ്കരിച്ചിരിക്കുന്നത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

യുഎഇയിൽ ടെന്റ് സ്ഥാപിക്കുന്നതിന് പുതിയ മാർഗനിർദേശങ്ങൾ പുറപ്പെടുവിച്ച് യുഎഇ; കൂടുതൽ അറിയാം

റമസാൻ മാസത്തെ സമൂഹ നോമ്പുതുറകൾക്കായി സ്ഥാപിക്കുന്ന കൂടാരങ്ങൾക്കായി യുഎഇ അധികൃതർ പുതിയ മാർഗനിർദേശങ്ങൾ പുറത്തിറക്കി. പൊതുജന സുരക്ഷ മുൻനിർത്തിയാണ് ഇത്തവണ കർശന നിബന്ധനകൾ ഏർപ്പെടുത്തിയിരിക്കുന്നത്. ഓരോ എമിറേറ്റിലെയും മുനിസിപ്പാലിറ്റിയുടെയും സിവിൽ ഡിഫൻസ് അതോറിറ്റിയുടെയും മുൻകൂർ അനുമതി നിർബന്ധമാണെന്ന് അധികൃതർ അറിയിച്ചു.
ചന്ദ്രദർശനത്തെ ആശ്രയിച്ച് ഫെബ്രുവരി 17 അല്ലെങ്കിൽ 18 നാണ് റമസാൻ വ്രതം ആരംഭിക്കാനിടയുള്ളത്. ഇതോടെ വിവിധ സംഘടനകളും വ്യക്തികളും ഒരുക്കുന്ന സമൂഹ നോമ്പുതുറകൾക്ക് വേണ്ടിയുള്ള ഒരുക്കങ്ങൾ സജീവമായിരിക്കുകയാണ്.

പുതിയ മാർഗനിർദേശങ്ങൾ പ്രകാരം, കൂടാര നിർമാണത്തിന് തീപിടിക്കാത്തതും ഉയർന്ന നിലവാരമുള്ളതുമായ വസ്തുക്കൾ മാത്രമേ ഉപയോഗിക്കാവൂ. കൂടാരങ്ങളുടെ വലുപ്പത്തിന് അനുസരിച്ച് ആവശ്യമായ അഗ്നിശമന ഉപകരണങ്ങൾ നിർബന്ധമായി ഒരുക്കണം. ടെന്റിനകത്തെ ഇലക്ട്രിക്കൽ വയറിങ് അംഗീകൃത സാങ്കേതിക വിദഗ്ധർ മുഖേന മാത്രമേ നടത്താവൂ. കൂടാരത്തിനകത്തെ താപനില നിയന്ത്രിക്കുന്നതിനായി എയർകണ്ടീഷനുകൾ സുരക്ഷിത അകലത്തിൽ സ്ഥാപിക്കണമെന്നും നിർദേശമുണ്ട്. സുരക്ഷാ കാരണങ്ങളാൽ ടെന്റിനകത്ത് പാചകം പൂർണമായും നിരോധിച്ചിട്ടുണ്ട്. ഭക്ഷണം അംഗീകൃത കേറ്ററിങ് കേന്ദ്രങ്ങളിൽ നിന്ന് മാത്രമേ എത്തിക്കാവൂ.

കൂടാരങ്ങൾ സ്ഥാപിക്കുമ്പോൾ റോഡുകൾക്കും കാൽനട യാത്രക്കാർക്കും ഗതാഗതത്തിനും തടസ്സമുണ്ടാകരുതെന്നും അധികൃതർ വ്യക്തമാക്കി. അടിയന്തര സാഹചര്യങ്ങളിൽ എമർജൻസി വാഹനങ്ങൾക്ക് എളുപ്പത്തിൽ പ്രവേശിക്കാൻ കഴിയുന്ന വിധത്തിലായിരിക്കണം ടെന്റ് ക്രമീകരണമെന്നും നിർദേശങ്ങളിൽ പറയുന്നു. നിബന്ധനകൾ കൃത്യമായി പാലിക്കുന്നുണ്ടെന്ന് ഉറപ്പാക്കാൻ പരിശോധനകൾ ശക്തമാക്കുമെന്നും നിയമലംഘനങ്ങൾ കണ്ടെത്തിയാൽ നടപടി സ്വീകരിക്കുമെന്നും ബന്ധപ്പെട്ട വകുപ്പുകൾ മുന്നറിയിപ്പ് നൽകി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt