യുഎഇയിൽ വിദ്യാഭ്യാസ–ആരോഗ്യ മേഖലകളിൽ സ്ത്രീ മുന്നേറ്റം; സ്വകാര്യ വിദ്യാഭ്യാസ സ്ഥാപനങ്ങളിൽ വനിതാ ജീവനക്കാർക്ക് മേൽക്കൈ

രാജ്യത്തെ സ്വകാര്യ മേഖലയിലുള്ള ആരോഗ്യ സംരക്ഷണ സ്ഥാപനങ്ങളിലെ ജീവനക്കാരിൽ വനിതകളാണ് ഭൂരിഭാഗമെന്നും, മൊത്തം തൊഴിലാളികളുടെ 66.5 ശതമാനവും സ്ത്രീകളാണെന്നും മാനവ വിഭവശേഷി–സ്വദേശിവത്ക്കരണ മന്ത്രാലയം അറിയിച്ചു. കഴിഞ്ഞ വർഷം ഈ മേഖലയിലെ 36 ശതമാനം സ്ഥാപനങ്ങൾ സ്ത്രീകളെ നിയമിച്ചതായും മന്ത്രാലയം വ്യക്തമാക്കി. ആരോഗ്യ മേഖലയിലെ സ്ഥാപനങ്ങളുടെ എണ്ണത്തിൽ മുൻവർഷത്തേക്കാൾ 2.5 ശതമാനം വളർച്ചയാണ് രേഖപ്പെടുത്തിയിട്ടുള്ളത്. വിദഗ്ധ തസ്തികകളിൽ ജോലി ചെയ്യുന്ന ജീവനക്കാരിൽ 27.4 ശതമാനവും നൈപുണ്യമുള്ള വനിതകളാണെന്നും റിപ്പോർട്ടിൽ പറയുന്നു. സ്വകാര്യ മേഖലയിലെ വിദ്യാഭ്യാസ സ്ഥാപനങ്ങളിലാണ് സ്ത്രീ പങ്കാളിത്തം ഏറ്റവും കൂടുതലെന്ന് മന്ത്രാലയം ചൂണ്ടിക്കാട്ടി. ഈ രംഗത്തെ മൊത്തം ജീവനക്കാരിൽ 74.3 ശതമാനവും സ്ത്രീകളാണ്. വിവരസാങ്കേതിക വിദ്യാ മേഖലയിലും വനിതകളുടെ സാന്നിധ്യം ശക്തമാണ്; ഐടി ജോലികളിലെ ജീവനക്കാരിൽ 37.9 ശതമാനം സ്ത്രീകളാണ്.
തൊഴിൽ മേഖലയിൽ ലിംഗ വിവേചനം പൂർണമായി നിരോധിക്കുകയും സ്ത്രീ തൊഴിൽ പങ്കാളിത്തം പ്രോത്സാഹിപ്പിക്കുകയും ചെയ്തതിന്റെ ഫലമായാണ് ഈ മുന്നേറ്റമെന്ന് മന്ത്രാലയം വിശദീകരിച്ചു. ഒരേ ജോലി അല്ലെങ്കിൽ തുല്യമൂല്യമുള്ള തൊഴിൽ ചെയ്യുന്ന സ്ത്രീകൾക്കും പുരുഷന്മാർക്കും തുല്യ വേതനം നൽകണമെന്നാണ് യുഎഇ തൊഴിൽ നിയമം വ്യവസ്ഥ ചെയ്യുന്നത്.

സ്ത്രീ ശാക്തീകരണത്തിന്റെ ഭാഗമായി ഖനനം, നിർമാണം, ഉത്പാദനം, ഊർജം, കൃഷി, ഗതാഗതം തുടങ്ങിയ ശാരീരിക അധ്വാനം ആവശ്യമായ മേഖലകളിലും സ്ത്രീകൾക്ക് തൊഴിൽ അവസരങ്ങൾ തുറന്നതായി മന്ത്രാലയം അറിയിച്ചു. നേരത്തെ നിയന്ത്രണങ്ങൾ ഉണ്ടായിരുന്ന ഇത്തരം മേഖലകളിൽ നിന്നുള്ള വിലക്കുകൾ നീക്കിയതോടെ വനിതകളുടെ തൊഴിൽ സാന്നിധ്യം വർധിച്ചു. രാത്രി ഷിഫ്റ്റുകളിലെ നിയന്ത്രണങ്ങൾ ഒഴിവാക്കിയതും ഈ രംഗത്ത് സ്ത്രീകളുടെ പങ്കാളിത്തം ഉയരാൻ സഹായിച്ചു.
ഗർഭധാരണത്തിന്റെ പേരിൽ വനിതാ ജീവനക്കാരെ പിരിച്ചുവിടുന്നത് നിയമവിരുദ്ധമാണെന്നും, നിയമനത്തിലും സ്ഥാനക്കയറ്റത്തിലും സ്ത്രീകളോട് വിവേചനം കാണിക്കരുതെന്നും തൊഴിൽ നിയമം കർശനമായി വ്യക്തമാക്കുന്നുണ്ടെന്ന് മന്ത്രാലയം ഓർമ്മിപ്പിച്ചു. വംശം, വർണം, ദേശം, ജാതി തുടങ്ങിയ അടിസ്ഥാനങ്ങളിൽ തൊഴിൽ സ്ഥലങ്ങളിൽ യാതൊരു തരത്തിലുള്ള വേർതിരിവും അനുവദനീയമല്ലെന്നും വ്യക്തമാക്കി. ലിംഗസമത്വത്തിന്റെ ആഗോള മാതൃകയായി യുഎഇ മാറുകയെന്ന ലക്ഷ്യത്തിലേക്കാണ് ഈ നിയമങ്ങളും നയങ്ങളും രാജ്യത്തെ നയിക്കുന്നതെന്നും മന്ത്രാലയം കൂട്ടിച്ചേർത്തു..യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

യുദ്ധഭീതി ശക്തം! ഇറാനെ ലക്ഷ്യമിട്ട് ട്രംപിന്റെ കപ്പൽപ്പട അറബിക്കടലിൽ; പശ്ചിമേഷ്യയിൽ ആശങ്ക

ഇറാനെ ലക്ഷ്യമിട്ട് അമേരിക്ക ഉടൻ സൈനിക നടപടി ആരംഭിച്ചേക്കുമെന്ന സൂചനകളാണ് രാജ്യാന്തര മാധ്യമങ്ങൾ നൽകുന്നത്. പേര്‍ഷ്യൻ ഗൾഫ് മേഖലയിലൂടെയോ അറബിക്കടൽ വഴിയോ ആയിരിക്കും അമേരിക്കയുടെ സൈനിക നീക്കമെന്നാണ് റിപ്പോർട്ടുകൾ. ഇതിനായി യു.എസ്. നാവിക സേനയുടെ വിമാനവാഹിനിക്കപ്പലായ യുഎസ്എസ് എബ്രഹാം ലിങ്കൺ ഇതിനകം മേഖലയിൽ സജ്ജമായതായി വിവരം പുറത്തുവന്നു. ഗൈഡഡ് മിസൈൽ ഡിസ്ട്രോയറുകളടക്കമുള്ള യുദ്ധക്കപ്പലുകളും സൈനിക സന്നാഹങ്ങളും തയ്യാറാക്കിയിട്ടുണ്ട്. ദക്ഷിണ ചൈനാ കടൽ വഴി ഇന്ത്യൻ മഹാസമുദ്രത്തിലെത്തിയ വിമാനവാഹിനിക്കപ്പൽ അടുത്ത ദിവസങ്ങളിൽ അറബിക്കടലിൽ നങ്കൂരമിടുമെന്നാണ് വിലയിരുത്തൽ. പശ്ചിമേഷ്യയിൽ, പ്രത്യേകിച്ച് ഇസ്രയേൽ, ഖത്തർ തുടങ്ങിയ രാജ്യങ്ങളിൽ യുഎസ് കൂടുതൽ മിസൈൽ പ്രതിരോധ സംവിധാനങ്ങൾ വിന്യസിച്ചതായും അമേരിക്കൻ മാധ്യമങ്ങൾ റിപ്പോർട്ട് ചെയ്തു. യുഎസിന്റെ എഫ്-15ഇ സ്ട്രൈക്ക് ഈഗിൾ യുദ്ധവിമാനങ്ങൾ ഇതിനകം മേഖലയിൽ എത്തിയതായും യു.എസ്. സെൻട്രൽ കമാൻഡ് സ്ഥിരീകരിച്ചിട്ടുണ്ട്. സൈനിക വിമാനത്താവളത്തിൽ യുദ്ധവിമാനം ഇറങ്ങുന്ന ദൃശ്യങ്ങളും പുറത്തുവന്നിരുന്നു.

ഇറാനിലെ ആഭ്യന്തര കലാപവുമായി ബന്ധപ്പെട്ട മരണസംഖ്യ സംബന്ധിച്ച് ഔദ്യോഗിക കണക്കുകൾ ഇതുവരെ ഇറാൻ പുറത്തുവിട്ടിട്ടില്ല. പ്രതിഷേധങ്ങൾ ആരംഭിച്ചതിനുശേഷം ഏകദേശം 2,000 പേർ കൊല്ലപ്പെട്ടതായി പേര് വെളിപ്പെടുത്താത്ത ഇറാനിയൻ ഉദ്യോഗസ്ഥനെ ഉദ്ധരിച്ച് റോയിട്ടേഴ്‌സ് റിപ്പോർട്ട് ചെയ്തു. എന്നാൽ യഥാർത്ഥ മരണസംഖ്യ 12,000 മുതൽ 20,000 വരെ ആയിരിക്കാമെന്ന വിലയിരുത്തലുകളും രാജ്യാന്തര മാധ്യമങ്ങൾ മുന്നോട്ടുവയ്ക്കുന്നു. അതേസമയം, വർഷങ്ങളോളം നീണ്ടുനിൽക്കുന്ന ചെലവേറിയ യുദ്ധത്തിൽ അമേരിക്കക്ക് താൽപര്യമില്ലെന്ന സൂചനകളും ശക്തമാണ്. അതിനാൽ നേരിട്ടുള്ള യുദ്ധത്തിന് പകരം വെനസ്വേലയിലെ മാതൃകയിൽ ഭരണമാറ്റം ലക്ഷ്യമിട്ട നീക്കങ്ങളിലേക്ക് ട്രംപ് ഭരണകൂടം കടക്കുമെന്നാണു വിലയിരുത്തൽ. ഇറാന്റെ പരമോന്നത നേതാവ് ആയത്തുല്ല ഖമനയിയെ മാറ്റി റെസ പഹ്‌ലവിയെ അധികാരത്തിലേക്ക് കൊണ്ടുവരാനുള്ള പദ്ധതികളും പരിഗണനയിലുണ്ടെന്ന റിപ്പോർട്ടുകളാണ് പുറത്തുവരുന്നത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

ട്രക്ക് കവർന്ന് ഇന്ധനക്കടത്ത്; ദുബായിൽ പ്രതിക്ക് ജയിലും പിഴയും

ട്രക്ക് മോഷ്ടിച്ച് ഡീസൽ കടത്തിയ കേസിൽ പ്രതികൾക്ക് തടവും പിഴയും വിധിച്ച് ദുബായ് കോടതി. ട്രക്ക് മോഷ്ടിച്ച് ഡീസൽ കടത്തിയ ഒന്നാം പ്രതിക്ക് 1,650 ദിർഹം പിഴയും, മോഷ്ടിച്ച ഇന്ധനം വാങ്ങിയ രണ്ടാമത്തെ പ്രതിക്ക് 450 ദിർഹം പിഴയും കോടതി വിധിച്ചു. സംഭവം നടന്നത് ഒരു സ്വകാര്യ കമ്പനിയുടെ പാർക്കിംഗ് ഏരിയയിലാണ്. ട്രക്ക് ഡ്രൈവർ വാഹനം പാർക്ക് ചെയ്ത ശേഷം കുറച്ച് സമയം കഴിഞ്ഞ് തിരിച്ചെത്തിയപ്പോഴാണ് ട്രക്ക് കാണാതായത്. സ്ഥലത്ത് ടയറുകളുടെ നേരിയ പാടുകൾ മാത്രമാണ് അവശേഷിച്ചിരുന്നതെന്ന് ഡ്രൈവർ പോലീസിന് നൽകിയ മൊഴിയിൽ പറഞ്ഞു.

തുടർന്ന് നടത്തിയ അന്വേഷണത്തിലാണ് മോഷണത്തിന് പിന്നിലെ ആസൂത്രിത നീക്കം പുറത്തുവന്നത്. പ്രതി മുൻകൂട്ടി തയ്യാറാക്കിയ പദ്ധതിയുടെ ഭാഗമായി ട്രക്ക് മോഷ്ടിച്ച് ഡീസൽ ചോർത്തിയ ശേഷം, ഇന്ധനം വാങ്ങാൻ ഒരാളെ ബന്ധപ്പെടുകയായിരുന്നു. 450 ദിർഹത്തിന് ഇന്ധനം വാങ്ങാൻ രണ്ടാമത്തെ പ്രതി സമ്മതിക്കുകയും ഇടപാട് പൂർത്തിയാക്കിയ ശേഷം ഇരുവരും സ്ഥലത്ത് നിന്നും കടന്നുകളയുകയും ചെയ്തു.
സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലൂടെയാണ് പോലീസ് പ്രതികളെ തിരിച്ചറിഞ്ഞ് അറസ്റ്റ് ചെയ്തത്. കേസിൽ കുറ്റം തെളിഞ്ഞതിനെ തുടർന്നാണ് ദുബായ് കോടതി ശിക്ഷ വിധിച്ചത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt