വീണ്ടും തിരിച്ചടി; യുഎഇയിൽ ഈ ബേബി ഫോർമുലയുടെ കൂടുതൽ ബാച്ചുകൾ പിൻവലിച്ചു 

നെസ്‌ലെ ബേബി ഫോർമുല ഉൽപ്പന്നങ്ങളിൽ ബാക്ടീരിയ സാന്നിധ്യം കണ്ടെത്തിയതിനെ തുടർന്ന് എമിറേറ്റ്‌സ് ഡ്രഗ് എസ്റ്റാബ്ലിഷ്‌മെന്റ് കൂടുതൽ ബാച്ചുകൾ വിപണിയിൽ നിന്ന് പിൻവലിച്ചു. മുൻകരുതൽ നടപടിയായി നെസ്‌ലെ കമ്പനിയുമായി ചേർന്നാണ് നടപടി സ്വീകരിച്ചതെന്ന് അധികൃതർ അറിയിച്ചു.

മെഡിക്കൽ മേൽനോട്ടത്തിൽ മാത്രം ഉപയോഗിക്കേണ്ട S26 A.R എന്ന ഉൽപ്പന്നത്തിന്റെ ചില ബാച്ചുകളാണ് പുതുതായി തിരിച്ചുവിളിച്ചത്. പിൻവലിച്ച ബാച്ച് നമ്പറുകൾ 5185080661, 5271080661, 5125080661എന്നിവയാണ്. ഉൽപ്പാദനത്തിൽ ഉപയോഗിച്ച അസംസ്‌കൃത വസ്തുക്കളിൽ ഒന്നിൽ ബാസിലസ് സെറിയസ് (Bacillus cereus) എന്ന ബാക്ടീരിയ കണ്ടെത്തിയതാണ് നടപടിക്ക് കാരണം. ഈ ബാക്ടീരിയ കുഞ്ഞുങ്ങളിൽ ഭക്ഷ്യവിഷബാധയ്ക്ക് ഇടയാക്കുന്ന ‘സെറൂലൈഡ്’ എന്ന വിഷവസ്തു ഉൽപ്പാദിപ്പിക്കാൻ സാധ്യതയുണ്ടെന്നാണ് വിലയിരുത്തൽ.

ഇതിന്റെ അടിസ്ഥാനത്തിൽ ആഗോളതലത്തിൽ തന്നെ നെസ്‌ലെ ഈ ഉൽപ്പന്നങ്ങൾ തിരിച്ചുവിളിച്ചതായും അധികൃതർ വ്യക്തമാക്കി. നേരത്തെ NAN Comfort 1, NAN Optipro 1, NAN Supreme Pro (1, 2, 3), S-26 Ultima (1, 2, 3), Alphamino തുടങ്ങിയ ഉൽപ്പന്നങ്ങളുടെ ബാച്ചുകൾ കഴിഞ്ഞ ആഴ്ച തന്നെ വിപണിയിൽ നിന്ന് പിൻവലിച്ചിരുന്നു.

പിൻവലിച്ച ബാച്ചുകൾ കൈവശമുള്ള ഉപഭോക്താക്കൾക്ക് ബാച്ച് നമ്പർ പരിശോധിക്കാനും പണം തിരികെ ലഭിക്കാനോ പകരം ഉൽപ്പന്നം ലഭിക്കാനോ നെസ്‌ലെ ഡിജിറ്റൽ സംവിധാനമൊരുക്കിയിട്ടുണ്ട്. തിരിച്ചുവിളിച്ച സ്റ്റോക്കുകൾ നിലവിൽ കമ്പനിയുടെ വെയർഹൗസുകളിൽ ക്വാറന്റൈനിലാക്കിയിരിക്കുകയാണ്.

കുട്ടികളുടെ ആരോഗ്യസുരക്ഷയ്ക്കാണ് പരമാവധി മുൻഗണന നൽകുന്നതെന്നും, മറ്റ് ബാച്ചുകൾ സുരക്ഷിതമാണെന്നും എമിറേറ്റ്‌സ് ഡ്രഗ് എസ്റ്റാബ്ലിഷ്‌മെന്റ് വ്യക്തമാക്കി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

യുഎഇയിൽ ‘ജോലി മാറ്റ’ സീസൺ; പുതിയ അവസരങ്ങൾ തേടി പ്രവാസികൾ, പ്രൊഫഷണലുകൾക്കിടയിൽ വൻ മാറ്റത്തിന് സാധ്യത!

ദുബായ്: പുതുവർഷത്തിൽ യുഎഇയിലെ തൊഴിൽ വിപണി വലിയൊരു അഴിച്ചുപണിക്ക് സാക്ഷ്യം വഹിക്കാനൊരുങ്ങുന്നു. പ്രമുഖ പ്രൊഫഷണൽ നെറ്റ്‍വർക്കിംഗ് പ്ലാറ്റ്‌ഫോമായ ലിങ്ക്ഡ്ഇൻ (LinkedIn) നടത്തിയ ഏറ്റവും പുതിയ സർവേ പ്രകാരം, യുഎഇയിൽ ജോലി ചെയ്യുന്ന 72 ശതമാനം ആളുകളും ഈ വർഷം നിലവിലെ ജോലി മാറി പുതിയ അവസരങ്ങൾ കണ്ടെത്താൻ ആഗ്രഹിക്കുന്നവരാണ്. അതായത് ഓരോ പത്ത് ജീവനക്കാരിലും ഏഴ് പേരും പുതിയ മേച്ചിൽപ്പുറങ്ങൾ തേടുകയാണെന്ന് റിപ്പോർട്ട് വ്യക്തമാക്കുന്നു.

നിലവിലെ ജോലിയിൽ 74 ശതമാനം പേരും സന്തുഷ്ടരാണെന്ന് മുൻപ് റിപ്പോർട്ടുകൾ വന്നിരുന്നെങ്കിലും, പുതിയ തൊഴിലവസരങ്ങളുടെ ആധിക്യമാണ് ആളുകളെ ജോലി മാറാൻ പ്രേരിപ്പിക്കുന്നത്. പുതിയ മേഖലകളിലേക്ക് ചേക്കേറുന്നത് കൂടുതൽ വെല്ലുവിളികൾ ഉയർത്തുമെന്ന് ഭൂരിഭാഗം പേരും കരുതുന്നുണ്ടെങ്കിലും, മെച്ചപ്പെട്ട ജീവിതസാഹചര്യങ്ങളും യുഎഇയിലെ അനുകൂലമായ തൊഴിൽ സാഹചര്യങ്ങളും ഈ മാറ്റത്തിന് ധൈര്യം നൽകുന്നു.

ജീവനക്കാർ കൂട്ടത്തോടെ ജോലി മാറാൻ ശ്രമിക്കുമ്പോൾ, വൈദഗ്ധ്യമുള്ള പുതിയ ഉദ്യോഗാർത്ഥികളെ കണ്ടെത്താൻ ബുദ്ധിമുട്ടുകയാണ് യുഎഇയിലെ തൊഴിലുടമകൾ. കഴിഞ്ഞ അഞ്ച് വർഷത്തിനിടെ രണ്ട് ദശലക്ഷത്തോളം ആളുകൾ പുതുതായി യുഎഇയിലേക്ക് എത്തിയത് തൊഴിൽ വിപണിയിൽ വലിയ മത്സരം സൃഷ്ടിച്ചിട്ടുണ്ട്. പ്രത്യേകിച്ച് ഉയർന്ന വൈദഗ്ധ്യം ആവശ്യമായ തസ്തികകളിലേക്കാണ് ഇപ്പോൾ കൂടുതൽ പ്രാധാന്യം നൽകുന്നത്.

ആർട്ടിഫിഷ്യൽ ഇന്റലിജൻസ് (AI), ഡിജിറ്റൽ മാർക്കറ്റിംഗ്, ഡാറ്റ അനലിറ്റിക്‌സ് തുടങ്ങിയ നൂതന മേഖലകളിൽ വലിയ തോതിലുള്ള തൊഴിലവസരങ്ങളാണ് യുഎഇയിൽ വരാനിരിക്കുന്നത്. അതിനാൽ തന്നെ കൃത്യമായ തൊഴിൽ നൈപുണ്യമുള്ളവർക്ക് ജോലി കണ്ടെത്തുക എന്നത് എളുപ്പമാകുമെന്നാണ് വിദഗ്ധരുടെ വിലയിരുത്തൽ. ഡിജിറ്റൽ പ്ലാറ്റ്‌ഫോമുകൾ ഉപയോഗിച്ച് ശരിയായ തൊഴിൽ വേഗത്തിൽ കണ്ടെത്താനുള്ള സൗകര്യങ്ങളും ഇപ്പോൾ സജീവമാണ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt