യുഎഇ ലോട്ടറിയിൽ ഭാഗ്യദേവത കനിഞ്ഞു; ഏഴുപേർക്ക് വമ്പൻ സമ്മാനം, ജാക്ക്പോട്ട് തുടരുന്നു!

ദുബായ്: യുഎഇ ലോട്ടറിയുടെ ലക്കി ഡേ (ലക്കം 260103) നറുക്കെടുപ്പിൽ ഏഴ് പേർക്ക് വൻ തുക സമ്മാനമായി ലഭിച്ചു. ഓരോരുത്തർക്കും ഒരു ലക്ഷം ദിർഹം വീതമാണ് (ഏകദേശം 22 ലക്ഷത്തിലധികം ഇന്ത്യൻ രൂപ) സമ്മാനം ലഭിച്ചത്. അതേസമയം, 30 ദശലക്ഷം ദിർഹത്തിന്റെ വമ്പൻ ജാക്ക്പോട്ട് ഇത്തവണയും ആർക്കും ലഭിക്കാത്തതിനാൽ വരും ആഴ്ചയിലും ഈ ഭാഗ്യം ആർക്കും സ്വന്തമാക്കാം.

ജയിച്ച ഏഴ് ഭാഗ്യശാലികളിൽ നാല് പേർ അഞ്ച് ദിവസത്തെ നമ്പറുകളും മാസവും (11) കൃത്യമായി ഒത്തുനോക്കിയാണ് സമ്മാനം നേടിയത്. ബാക്കിയുള്ള മൂന്ന് വിജയികളെ ‘ലക്കി ചാൻസ്’ എന്ന പ്രത്യേക വിഭാഗത്തിലൂടെയാണ് തിരഞ്ഞെടുത്തത്. 15, 30, 7, 31, 27, 2 എന്നിവയായിരുന്നു ദിവസങ്ങളെ സൂചിപ്പിക്കുന്ന വിജയിച്ച നമ്പറുകൾ. മാസം 11-ഉം ആയിരുന്നു.

ലക്കി ചാൻസ് വിഭാഗത്തിൽ തിരഞ്ഞെടുക്കപ്പെട്ട വിജയികളുടെ ഐഡികൾ ഇവയാണ്: AU1943197, AI0733977, CP6642835. അടുത്തിടെ നവീകരിച്ച യുഎഇ ലോട്ടറി നിയമങ്ങൾ പ്രകാരം എല്ലാ ശനിയാഴ്ചകളിലുമാണ് ഇപ്പോൾ നറുക്കെടുപ്പ് നടക്കുന്നത്. 30 ദശലക്ഷം ദിർഹം ഒന്നാം സമ്മാനമായി ലഭിക്കുന്ന ഗ്രാന്റ് പ്രൈസിന് പുറമെ, 5 ദശലക്ഷം ദിർഹം ലഭിക്കുന്ന രണ്ടാം സമ്മാനവും എല്ലാ ആഴ്ചയും ഒരു ലക്ഷം ദിർഹം വീതം നൽകുന്ന ലക്കി ചാൻസ് ഓഫറുകളും പുതിയ രീതിയിൽ ഉൾപ്പെടുത്തിയിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

മാതൃകയായി മടക്കം; യുഎഇയിൽ ആറു പേർക്ക് പുതുജീവൻ നൽകി പ്രവാസി മലയാളി

അബുദാബിയിൽ ഇ-സ്കൂട്ടറിടിച്ച് മസ്തിഷ്ക മരണം സംഭവിച്ച മലയാളി പ്രവാസി എം. ബാബുരാജൻ മരണാനന്തരവും ആറുപേരിലൂടെ ജീവിതത്തിലേക്ക് മടങ്ങിവരുന്നു. പുതുവർഷത്തിന് തൊട്ടുമുൻപ് ആറ് കുടുംബങ്ങൾക്ക് പ്രത്യാശയുടെ വെളിച്ചം നൽകിക്കൊണ്ടാണ് ബാബുരാജന്റെ അവയവങ്ങൾ ദാനം ചെയ്യാൻ അദ്ദേഹത്തിന്റെ കുടുംബം തീരുമാനമെടുത്തത്. സ്വർണ്ണപ്പണിക്കാരനായ ബാബുരാജൻ ഈ മാസം 16-ന് അബുദാബി വേൾഡ് ട്രേഡ് സെന്ററിന് സമീപമുണ്ടായ വാഹനാപകടത്തിലാണ് അന്തരിച്ചത്.

അബുദാബി വേൾഡ് ട്രേഡ് സെന്ററിനടുത്തുള്ള ട്രാഫിക് സിഗ്നലിൽ റോഡ് മുറിച്ചുകടക്കുന്നതിനിടെയാണ് ഇലക്ട്രിക് സ്കൂട്ടർ ബാബുരാജനെ ഇടിച്ചത്. ജോലിസ്ഥലത്തേക്ക് പോകുന്നതിനിടെയുണ്ടായ അപകടത്തിൽ തലയ്ക്ക് ഗുരുതരമായി പരിക്കേറ്റ അദ്ദേഹത്തെ ഉടൻ ആശുപത്രിയിൽ എത്തിച്ച് ശസ്ത്രക്രിയയ്ക്ക് വിധേയനാക്കിയെങ്കിലും മസ്തിഷ്ക മരണം സംഭവിക്കുകയായിരുന്നു. പ്രിയപ്പെട്ടവന്റെ വിയോഗവാർത്ത കേട്ട ആഘാതത്തിനിടയിലും മറ്റുള്ളവർക്ക് ജീവൻ പകർന്നു നൽകുക എന്ന പുണ്യപ്രവൃത്തിയിലേക്ക് അദ്ദേഹത്തിന്റെ കുടുംബം ധീരമായ ചുവടുവെച്ചു.

യുഎഇ ആരോഗ്യ മന്ത്രാലയത്തിന്റെ അവയവദാന സംരംഭമായ ‘ഹയാത്ത് പ്രോഗ്രാമുമായി’ ഏകോപിപ്പിച്ചാണ് ഹൃദയം, വൃക്കകൾ, പാൻക്രിയാസ്, കരൾ, ശ്വാസകോശം എന്നിവ ദാനം ചെയ്തത്. തങ്ങൾക്ക് പ്രിയപ്പെട്ടവനെ നഷ്ടപ്പെട്ടെങ്കിലും മറ്റുള്ളവരിലൂടെ അദ്ദേഹം ജീവിക്കട്ടെ എന്ന കുടുംബത്തിന്റെ ആഗ്രഹം മനുഷ്യത്വത്തിന്റെ വലിയൊരു മാതൃകയാണ് സമൂഹത്തിന് മുന്നിൽ വെക്കുന്നത്. മൃതദേഹം നാട്ടിലേക്ക് കൊണ്ടുപോകുന്നതിനുള്ള നടപടിക്രമങ്ങളിൽ ഹയാത്ത് ടീം കുടുംബത്തെ സഹായിക്കുന്നുണ്ട്. കുമാരിയാണ് ബാബുരാജന്റെ ഭാര്യ. പ്രീതി, കൃഷ്ണ പ്രിയ എന്നിവർ മക്കളാണ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt