മഴവെള്ളം കയറി കാർ കട്ടപ്പുറത്തായോ? ഇൻഷുറൻസ് ക്ലെയിം നിരസിക്കാൻ കമ്പനിക്ക് കഴിയുമോ? യുഎഇയിലെ നിയമം അറിയാം

ദുബായ്: യുഎഇയിൽ കഴിഞ്ഞ ദിവസങ്ങളിൽ പെയ്ത കനത്ത മഴയിൽ വാഹനങ്ങൾക്ക് കേടുപാടുകൾ സംഭവിച്ചവർക്ക് ഇൻഷുറൻസ് പരിരക്ഷ ലഭിക്കുമോ എന്ന കാര്യത്തിൽ പലർക്കും ആശങ്കയുണ്ട്. മഴക്കെടുതി മൂലമുള്ള കേടുപാടുകൾക്ക് ക്ലെയിം നൽകാൻ ഇൻഷുറൻസ് കമ്പനികൾ വിസമ്മതിക്കുന്നു എന്ന പരാതികൾ ഉയരുന്ന സാഹചര്യത്തിൽ, ഇതുസംബന്ധിച്ച യുഎഇയിലെ നിയമവശങ്ങൾ പരിശോധിക്കാം.

യുഎഇ സെൻട്രൽ ബാങ്കിന്റെ കീഴിലുള്ള ഏകീകൃത മോട്ടോർ വാഹന ഇൻഷുറൻസ് പോളിസി പ്രകാരമാണ് ഇത്തരം കേസുകളിൽ തീരുമാനമെടുക്കുന്നത്. നിങ്ങളുടെ ഇൻഷുറൻസ് ക്ലെയിം അംഗീകരിക്കപ്പെടുമോ എന്നത് പ്രധാനമായും രണ്ട് കാര്യങ്ങളെ ആശ്രയിച്ചിരിക്കും:

1. ഇൻഷുറൻസ് തരം (Comprehensive vs Third Party) നിങ്ങളുടെ വാഹനം ‘കോംപ്രിഹെൻസീവ്’ (Comprehensive) ഇൻഷുറൻസ് ഉള്ളതാണെങ്കിൽ, അപകടങ്ങൾക്കോ മഴ പോലുള്ള ബാഹ്യ കാരണങ്ങൾ മൂലമുള്ള കേടുപാടുകൾക്കോ പരിരക്ഷ ലഭിക്കാൻ അർഹതയുണ്ട്. എന്നാൽ ‘തേർഡ് പാർട്ടി’ (Third-party liability) ഇൻഷുറൻസ് മാത്രമാണുള്ളതെങ്കിൽ, നിങ്ങളുടെ വാഹനത്തിനുണ്ടാകുന്ന കേടുപാടുകൾക്ക് കമ്പനി പണം നൽകില്ല.

2. ഒഴിവാക്കലുകൾ (Exclusions) പോളിസിയിൽ പ്രകൃതിക്ഷോഭങ്ങൾ (Natural Disasters) പ്രത്യേകം ഒഴിവാക്കിയിട്ടില്ലെങ്കിൽ മഴ മൂലമുള്ള നാശനഷ്ടങ്ങൾക്ക് ഇൻഷുറൻസ് ലഭിക്കും. എന്നാൽ താഴെ പറയുന്ന സാഹചര്യങ്ങളിൽ കമ്പനിക്ക് ക്ലെയിം നിരസിക്കാം:

• ഉടമയുടെ ഭാഗത്തുനിന്നുള്ള അശ്രദ്ധ (ഉദാഹരണത്തിന്, വെള്ളക്കെട്ടുള്ള റോഡിലൂടെ മനഃപൂർവ്വം വാഹനം ഓടിക്കാൻ ശ്രമിച്ചാൽ).
• ലൈസൻസ് ഇല്ലാത്ത വ്യക്തിയാണ് വാഹനം ഓടിച്ചതെങ്കിൽ.
• റേസിംഗ് പോലുള്ള കാര്യങ്ങൾക്കായി വാഹനം ഉപയോഗിച്ചപ്പോൾ അപകടം സംഭവിച്ചാൽ.

പരാതി എവിടെ നൽകണം? നിങ്ങളുടേത് കോംപ്രിഹെൻസീവ് ഇൻഷുറൻസ് ആയിരിക്കുകയും, കമ്പനി പറയുന്ന കാരണങ്ങൾ ന്യായമല്ലെന്ന് നിങ്ങൾക്ക് തോന്നുകയും ചെയ്താൽ പരാതിപ്പെടാൻ നിയമപരമായ വഴികളുണ്ട്. യുഎഇ സെൻട്രൽ ബാങ്കിന് കീഴിലുള്ള ‘സനദ്’ (Sanad/Sandak) പ്ലാറ്റ്‌ഫോം വഴി ഇൻഷുറൻസ് തർക്ക പരിഹാര കമ്മിറ്റിയെ സമീപിക്കാവുന്നതാണ്.

ചുരുക്കത്തിൽ, കൃത്യമായ പോളിസി നിബന്ധനകൾക്ക് വിധേയമായി മാത്രമേ കമ്പനികൾക്ക് ക്ലെയിം നിരസിക്കാൻ സാധിക്കൂ. അല്ലാത്തപക്ഷം ഉപഭോക്താവിന് നിയമസഹായം തേടാവുന്നതാണ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

മാതൃകയായി മടക്കം; യുഎഇയിൽ ആറു പേർക്ക് പുതുജീവൻ നൽകി പ്രവാസി മലയാളി

അബുദാബിയിൽ ഇ-സ്കൂട്ടറിടിച്ച് മസ്തിഷ്ക മരണം സംഭവിച്ച മലയാളി പ്രവാസി എം. ബാബുരാജൻ മരണാനന്തരവും ആറുപേരിലൂടെ ജീവിതത്തിലേക്ക് മടങ്ങിവരുന്നു. പുതുവർഷത്തിന് തൊട്ടുമുൻപ് ആറ് കുടുംബങ്ങൾക്ക് പ്രത്യാശയുടെ വെളിച്ചം നൽകിക്കൊണ്ടാണ് ബാബുരാജന്റെ അവയവങ്ങൾ ദാനം ചെയ്യാൻ അദ്ദേഹത്തിന്റെ കുടുംബം തീരുമാനമെടുത്തത്. സ്വർണ്ണപ്പണിക്കാരനായ ബാബുരാജൻ ഈ മാസം 16-ന് അബുദാബി വേൾഡ് ട്രേഡ് സെന്ററിന് സമീപമുണ്ടായ വാഹനാപകടത്തിലാണ് അന്തരിച്ചത്.

അബുദാബി വേൾഡ് ട്രേഡ് സെന്ററിനടുത്തുള്ള ട്രാഫിക് സിഗ്നലിൽ റോഡ് മുറിച്ചുകടക്കുന്നതിനിടെയാണ് ഇലക്ട്രിക് സ്കൂട്ടർ ബാബുരാജനെ ഇടിച്ചത്. ജോലിസ്ഥലത്തേക്ക് പോകുന്നതിനിടെയുണ്ടായ അപകടത്തിൽ തലയ്ക്ക് ഗുരുതരമായി പരിക്കേറ്റ അദ്ദേഹത്തെ ഉടൻ ആശുപത്രിയിൽ എത്തിച്ച് ശസ്ത്രക്രിയയ്ക്ക് വിധേയനാക്കിയെങ്കിലും മസ്തിഷ്ക മരണം സംഭവിക്കുകയായിരുന്നു. പ്രിയപ്പെട്ടവന്റെ വിയോഗവാർത്ത കേട്ട ആഘാതത്തിനിടയിലും മറ്റുള്ളവർക്ക് ജീവൻ പകർന്നു നൽകുക എന്ന പുണ്യപ്രവൃത്തിയിലേക്ക് അദ്ദേഹത്തിന്റെ കുടുംബം ധീരമായ ചുവടുവെച്ചു.

യുഎഇ ആരോഗ്യ മന്ത്രാലയത്തിന്റെ അവയവദാന സംരംഭമായ ‘ഹയാത്ത് പ്രോഗ്രാമുമായി’ ഏകോപിപ്പിച്ചാണ് ഹൃദയം, വൃക്കകൾ, പാൻക്രിയാസ്, കരൾ, ശ്വാസകോശം എന്നിവ ദാനം ചെയ്തത്. തങ്ങൾക്ക് പ്രിയപ്പെട്ടവനെ നഷ്ടപ്പെട്ടെങ്കിലും മറ്റുള്ളവരിലൂടെ അദ്ദേഹം ജീവിക്കട്ടെ എന്ന കുടുംബത്തിന്റെ ആഗ്രഹം മനുഷ്യത്വത്തിന്റെ വലിയൊരു മാതൃകയാണ് സമൂഹത്തിന് മുന്നിൽ വെക്കുന്നത്. മൃതദേഹം നാട്ടിലേക്ക് കൊണ്ടുപോകുന്നതിനുള്ള നടപടിക്രമങ്ങളിൽ ഹയാത്ത് ടീം കുടുംബത്തെ സഹായിക്കുന്നുണ്ട്. കുമാരിയാണ് ബാബുരാജന്റെ ഭാര്യ. പ്രീതി, കൃഷ്ണ പ്രിയ എന്നിവർ മക്കളാണ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

കനത്ത മഴ; യുഎഇയിൽ പല റോഡുകളിലും വെള്ളക്കെട്ട്, ജാഗ്രതാ നി‍ർദ്ദേശം

യുഎഇയുടെ വിവിധ മേഖലകളിൽ കഴിഞ്ഞ ദിവസം ശക്തമായ മഴ പെയ്തു. കനത്ത മഴയെ തുടർന്ന് നിരവധി റോഡുകളിൽ വെള്ളക്കെട്ട് രൂപപ്പെടുകയും ഗതാഗതം തടസ്സപ്പെടുകയും ചെയ്തു. വടക്കൻ, കിഴക്കൻ എമിറേറ്റുകളിൽ മഴ ശക്തമായതോടെ ദേശീയ കാലാവസ്ഥാ നിരീക്ഷണ കേന്ദ്രം യെല്ലോയും ആംബർ അലർട്ടുകളും പ്രഖ്യാപിച്ചിരുന്നു. ദുബൈ, റാസൽഖൈമ, ഫുജൈറ എന്നീ എമിറേറ്റുകളിലാണ് പ്രധാനമായും മഴ ലഭിച്ചത്. താഴ്ന്ന പ്രദേശങ്ങളിൽ വെള്ളം കെട്ടിനിന്നത് യാത്രക്കാർക്ക് ബുദ്ധിമുട്ടുണ്ടാക്കി. പർവത മേഖലകളിൽ നിന്നുള്ള മഴവെള്ളം കുത്തിയൊഴുകി റോഡുകളിലേക്ക് എത്തിയതോടെ റാസൽഖൈമയിലും ഫുജൈറയിലും ഗതാഗതം ഏറെക്കുറെ താറുമാറായി. നിരവധി വാഹനങ്ങൾ വെള്ളക്കെട്ടിൽ കുടുങ്ങിയതായി റിപ്പോർട്ടുണ്ട്.

ഫുജൈറയിലെ മസാഫി, ആസ്മ, മുർബാദ് മേഖലകളിൽ മിതമായതും ചിലയിടങ്ങളിൽ അതിശക്തമായതുമായ മഴ രേഖപ്പെടുത്തി. ദുബൈയിലെ അൽ ലിസൈലി പ്രദേശത്തും ശക്തമായ മഴ അനുഭവപ്പെട്ടു. റാസൽഖൈമയിലെ മസാഫി മേഖലയിലും മഴ റിപ്പോർട്ട് ചെയ്തു. ഖോർഫക്കാൻ റോഡിലും മുർബാദ്–മസാഫി പാതയിലും കനത്ത മഴയ്‌ക്കൊപ്പം ചെറിയ തോതിൽ ആലിപ്പഴ വർഷവും ഉണ്ടായതായി അധികൃതർ അറിയിച്ചു. മഴയെ തുടർന്ന് റോഡുകളിൽ വെള്ളക്കെട്ട് രൂപപ്പെടാനുള്ള സാധ്യത കണക്കിലെടുത്ത് വാഹനയാത്രക്കാർക്ക് അധികൃതർ മുന്നറിയിപ്പ് നൽകിയിരുന്നു. യാത്രയ്ക്കിടെ വേഗത കുറയ്ക്കാനും മുൻപിലുള്ള വാഹനങ്ങളുമായി ആവശ്യമായ സുരക്ഷാ അകലം പാലിക്കാനും നിർദേശിച്ചിരുന്നു. റോഡ് സുരക്ഷ ഉറപ്പാക്കാൻ ജാഗ്രത പാലിക്കണമെന്ന് ബന്ധപ്പെട്ട വകുപ്പുകൾ അഭ്യർത്ഥിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt