പ്രവാസികൾക്ക് വിദേശത്തുനിന്ന് നാട്ടിലേക്ക് എത്ര സ്വർണം കൊണ്ടുവരാം? ഇനി ആശയക്കുഴപ്പങ്ങൾ വേണ്ട

വിദേശരാജ്യങ്ങളിൽ നിന്ന് ഇന്ത്യയിലേക്ക് എത്തുന്ന പ്രവാസികൾ സ്വർണാഭരണങ്ങളുമായി ബന്ധപ്പെട്ട കസ്റ്റംസ് പരിശോധനകളിൽ നേരിടുന്ന അനിശ്ചിതത്വത്തിനും ബുദ്ധിമുട്ടുകൾക്കും പരിഹാരം പ്രതീക്ഷിക്കാം. കസ്റ്റംസ് നിയമങ്ങളിൽ സമഗ്ര പരിഷ്കാരം കൊണ്ടുവരാൻ കേന്ദ്ര സർക്കാർ തയ്യാറെടുക്കുകയാണെന്ന് ധനമന്ത്രി നിർമല സീതാരാമൻ അറിയിച്ചു. വിമാനത്താവളങ്ങളിലെ കസ്റ്റംസ് നടപടികൾ കൂടുതൽ ലളിതമാക്കുകയും വ്യക്തത ഉറപ്പാക്കുകയും ചെയ്യുകയാണ് സർക്കാരിന്റെ ലക്ഷ്യമെന്ന് അവർ വ്യക്തമാക്കി.

ഗൾഫ് രാജ്യങ്ങളിലടക്കമുള്ള വിദേശത്തുള്ള ഇന്ത്യൻ പ്രവാസികൾ വർഷങ്ങളായി ഉന്നയിച്ച ആവശ്യങ്ങൾ പരിഗണിച്ചാണ് ഈ നീക്കം. യാത്രക്കാർക്ക് അനാവശ്യ തടസ്സങ്ങളില്ലാതെ കസ്റ്റംസ് നടപടികൾ പൂർത്തിയാക്കാൻ കഴിയുന്ന സംവിധാനം ഉണ്ടാകേണ്ടതുണ്ടെന്ന് മന്ത്രി ഒരു പൊതുപരിപാടിയിൽ പറഞ്ഞു. നിലവിലുള്ള പരിശോധനകൾ പലപ്പോഴും അനാവശ്യമായി കടുപ്പമുള്ളവയാണെന്നും ഇത് പരിഷ്കരിക്കപ്പെടേണ്ടതുണ്ടെന്നും അവർ കൂട്ടിച്ചേർത്തു.

പ്രത്യേകിച്ച് യുഎഇയിലെ പ്രവാസികൾക്കിടയിൽ നികുതി ഒഴിവാക്കി കൊണ്ടുവരാൻ അനുവദിച്ചിരിക്കുന്ന സ്വർണപരിധി പുതുക്കണമെന്ന ആവശ്യം ശക്തമായി ഉയരുകയാണ്. 2016-ൽ നിശ്ചയിച്ച പരിധി ഇപ്പോഴത്തെ സ്വർണവിലയും സാമ്പത്തിക സാഹചര്യങ്ങളും പ്രതിഫലിപ്പിക്കുന്നില്ലെന്നാണ് പ്രവാസി സംഘടനകളുടെ നിലപാട്. ഇതുമായി ബന്ധപ്പെട്ട് ഷാർജ ഇന്ത്യൻ അസോസിയേഷൻ അടക്കമുള്ള സംഘടനകൾ അടുത്തിടെയായി ധനമന്ത്രിക്ക് നിവേദനം സമർപ്പിച്ചിരുന്നു.

ഇപ്പോൾ ഇന്ത്യയിൽ സ്വർണം ഗ്രാമിന് ഏകദേശം 13,000 രൂപയ്ക്കും ദുബായിൽ 500 ദിർഹത്തിന് മുകളിലും വിലവരുകയാണ്. എന്നാൽ നികുതിയിളവോടെയുള്ള സ്വർണപരിധി പുരുഷന്മാർക്ക് 20 ഗ്രാമും സ്ത്രീകൾക്ക് 40 ഗ്രാമുമെന്ന രീതിയിൽ മാറ്റമില്ലാതെ തുടരുന്നു. ഇതിന്റെ മൂല്യം യഥാക്രമം 50,000 രൂപയും ഒരു ലക്ഷവും എന്നതാണ്. നിലവിലെ വില കണക്കിലെടുത്താൽ ഈ പരിധിയിൽ വരുന്ന സ്വർണത്തിന്റെ തൂക്കം വളരെ കുറവായി തീരുന്നുവെന്നാണ് വിലയിരുത്തൽ.

പണിക്കൂലിയും മറ്റ് ചെലവുകളും ചേർത്താൽ, നികുതി ഒഴിവോടെ കൊണ്ടുവരാൻ കഴിയുന്ന സ്വർണത്തിന്റെ യഥാർഥ അളവ് ഗണ്യമായി കുറയുന്നുവെന്നും ഇതുമൂലം സാധാരണ ആഭരണങ്ങൾ പോലും കസ്റ്റംസ് പരിശോധനയുടെ പരിധിയിലാവുന്ന സാഹചര്യമുണ്ടാകുന്നുവെന്നും പ്രവാസികൾ ചൂണ്ടിക്കാട്ടുന്നു. വിവാഹ ടൂറിസവും വിനോദസഞ്ചാരവും പ്രോത്സാഹിപ്പിക്കാനുള്ള കേന്ദ്ര സർക്കാരിന്റെ പദ്ധതികളെ നിലവിലെ ചട്ടങ്ങൾ പ്രതികൂലമായി ബാധിക്കുന്നുവെന്ന ആശങ്കയും ഉയരുന്നുണ്ട്.ഖത്തറിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Cy3g5xfb5OSLA1HSZk7JwK?mode=wwt

ഖത്തറിലെ ഈ മ്യൂസിയം പുതിയ സീസൺ പരിപാടികൾ പ്രഖ്യാപിച്ചു

ഖത്തറിലെ കുട്ടികളുടെ മ്യൂസിയമായ ‘ദാദു’ 2026 ഏപ്രിൽ വരെ നീണ്ടുനിൽക്കുന്ന പ്രവർത്തനങ്ങളടങ്ങിയ പുതിയ പരിപാടി സീസൺ പ്രഖ്യാപിച്ചു. കുട്ടികളെയും കുടുംബങ്ങളെയും ലക്ഷ്യമാക്കി രൂപകൽപ്പന ചെയ്ത ഈ സീസണിൽ പ്രായോഗിക വർക്ക്‌ഷോപ്പുകളും ഔട്ട്‌ഡോർ അനുഭവങ്ങളും ഉൾപ്പെടുത്തിയിട്ടുണ്ട്.
അൽ ബിദ്ദ പാർക്കിൽ പ്രവർത്തിക്കുന്ന ദാദു ഗാർഡൻസ്, 0 മുതൽ 12 വയസ് വരെ പ്രായമുള്ള കുട്ടികൾക്കായി പ്രകൃതിയെ ആസ്പദമാക്കിയ കളിത്തറയായി ഒരുക്കിയിട്ടുള്ളതാണ്. പുതിയ സീസണിന്റെ ഭാഗമായി റീസൈക്കിൾഡ് ആർട്ട് വർക്ക്‌ഷോപ്പുകൾ, ഇന്ററാക്ടീവ് പാത്ത്‌വേകൾ, ‘ഫൈൻഡ് ദി പ്ലാന്റ്’ മാച്ചിംഗ്-കാർഡ് ഗെയിം, പപ്പറ്റ് ഷോകൾ, പൂന്തോട്ടപരിപാലന പ്രവർത്തനങ്ങൾ, പാചക സെഷനുകൾ എന്നിവ ഉൾപ്പെടുന്ന വിവിധ നേച്ചർ പ്ലേ പരിപാടികളാണ് ഒരുക്കിയിരിക്കുന്നത്.

സീഷോർ ഗ്രൂപ്പിന്റെ പിന്തുണയോടെ സംഘടിപ്പിക്കുന്ന ലൈഫ് സൈസ് കാർ പെയിന്റിംഗ്–വാഷിംഗ് ആക്ടിവിറ്റിയും ഈ സീസണിലെ ഒരു പ്രധാന ആകർഷണമായിരിക്കും. കുട്ടികൾക്ക് ഒരു മുഴുവൻ വലുപ്പത്തിലുള്ള കാർ പെയിന്റ് ചെയ്യാനും പിന്നീട് അത് കഴുകാനും അവസരം ലഭിക്കും. വർക്ക്‌ഷോപ്പുകൾ, കലാപ്രവർത്തനങ്ങൾ, ഗെയിമുകൾ, പ്രകടനങ്ങൾ തുടങ്ങിയവയ്ക്ക് പങ്കെടുക്കാനുള്ള സീറ്റുകൾ പരിമിതമായതിനാൽ, ടിക്കറ്റുകൾ മുൻകൂട്ടി ബുക്ക് ചെയ്യണമെന്ന് കുടുംബങ്ങളോട് അധികൃതർ അഭ്യർത്ഥിച്ചു.ഖത്തറിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Cy3g5xfb5OSLA1HSZk7JwK?mode=wwt