കുട്ടികളുടെ ലഞ്ച് ബോക്സിൽ ഈ സാധനങ്ങൾ വേണ്ട; യുഎഇയിൽ കർശന നിയന്ത്രണം, ലംഘിച്ചാൽ പിടിവീഴും!

അബുദാബി: സ്കൂൾ കുട്ടികളുടെ ആരോഗ്യകാര്യത്തിൽ വിട്ടുവീഴ്ചയില്ലാത്ത നടപടികളുമായി അബുദാബി വിദ്യാഭ്യാസ വകുപ്പ് (അഡെക്). കുട്ടികളുടെ വളർച്ചാഘട്ടത്തിൽ മികച്ച പോഷകാഹാരം ഉറപ്പാക്കുന്നതിനായി ‘ഹെൽത്തി ഈറ്റിങ് ഗൈഡ്‌ലൈൻസ്’ പരിഷ്കരിച്ചു. ഇനി മുതൽ സ്കൂൾ കാന്റീനുകളിലും വീട്ടിൽ നിന്ന് കൊണ്ടുവരുന്ന ലഞ്ച് ബോക്സുകളിലും കൃത്രിമ മധുരപാനീയങ്ങൾ, കൊഴുപ്പേറിയ ഭക്ഷണങ്ങൾ, സംസ്കരിച്ച മാംസം എന്നിവയ്ക്ക് കർശന നിരോധനമുണ്ടാകും.

സോഫ്റ്റ് ഡ്രിങ്കുകൾ, എനർജി ഡ്രിങ്കുകൾ, ചോക്ലേറ്റുകൾ, മിഠായികൾ, ചിക്കൻ നഗ്ഗറ്റ്സ്, ഫ്രഞ്ച് ഫ്രൈസ്, സമൂസ, ഹോട്ട് ഡോഗ്, സോസേജ് എന്നിവയുൾപ്പെടെയുള്ള ഇനങ്ങൾ കുട്ടികൾക്ക് നൽകുന്നത് അഡെക് വിലക്കിയിട്ടുണ്ട്. കൂടാതെ അലർജി സാധ്യത കണക്കിലെടുത്ത് അണ്ടിപ്പരിപ്പ് വർഗങ്ങളും കൃത്രിമ നിറങ്ങളോ അജിനോമോട്ടോയോ ചേർത്ത ഭക്ഷണങ്ങളും ഒഴിവാക്കണം. ലൊലിപോപ്പ്, ജെല്ലി, ച്യൂയിങ് ഗം തുടങ്ങിയവയും നിരോധിച്ച പട്ടികയിലുണ്ട്.

പുതിയ നിയമങ്ങൾ പാലിക്കപ്പെടുന്നുണ്ടോ എന്ന് ഉറപ്പാക്കാൻ സ്കൂൾ നഴ്സിനോ ഹെൽത്ത് ആൻഡ് സേഫ്റ്റി ഓഫിസർക്കോ പ്രത്യേക ചുമതല നൽകും. നിയമം ആവർത്തിച്ച് ലംഘിക്കുന്ന രക്ഷിതാക്കൾക്കെതിരെയും സ്കൂൾ അധികൃതർക്കെതിരെയും പിഴയുൾപ്പെടെയുള്ള കർശന നിയമനടപടികൾ സ്വീകരിക്കും. കുട്ടികൾക്ക് ശിക്ഷയായോ പാരിതോഷികമായോ ഭക്ഷണം നൽകുന്ന രീതി പാടില്ലെന്നും പുതിയ നയം വ്യക്തമാക്കുന്നു. കൂടാതെ, ശിശുപരിചരണ കേന്ദ്രങ്ങളിൽ മുലയൂട്ടലിന് പ്രത്യേക സൗകര്യം ഒരുക്കണമെന്നും കുട്ടികളുടെ ശാരീരിക വളർച്ച കൃത്യമായ ഇടവേളകളിൽ പരിശോധിച്ച് രേഖപ്പെടുത്തണമെന്നും നിർദേശമുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

നോമ്പുകാരെ ശ്രദ്ധിക്കൂ; തിങ്കളും വ്യാഴവും യുഎഇ നിരത്തുകളിൽ ‘കടുപ്പം’; പുറത്തിറങ്ങുമ്പോൾ ശ്രദ്ധിക്കണം

ദുബായ്: റമസാൻ മാസത്തിൽ യുഎഇയിലെ റോഡുകളിൽ വാഹനാപകടങ്ങൾ വർധിക്കുന്നതായി ഞെട്ടിക്കുന്ന റിപ്പോർട്ട്. കഴിഞ്ഞ വർഷത്തെ റമസാൻ കാലയളവിലെ രണ്ടായിരത്തിലധികം ഇൻഷുറൻസ് ക്ലെയിമുകൾ വിശകലനം ചെയ്ത് റോഡ് സേഫ്റ്റി യുഎഇയും അൽ വത്ബ ഇൻഷുറൻസും പുറത്തുവിട്ട കണക്കുകളിലാണ് പ്രവാസികൾക്കും സ്വദേശികൾക്കും ജാഗ്രതാ നിർദ്ദേശം നൽകുന്നത്. നോമ്പ് തുറയ്ക്ക് തൊട്ടുമുമ്പുള്ള ഉച്ചയ്ക്ക് 2 മുതൽ 4 വരെയുള്ള സമയമാണ് റോഡുകളിൽ ഏറ്റവും അപകടസാധ്യതയുള്ളതെന്ന് റിപ്പോർട്ട് വ്യക്തമാക്കുന്നു.

ആഴ്ചയിലെ കണക്കുകളെടുത്താൽ തിങ്കൾ, വ്യാഴം ദിവസങ്ങളിലാണ് ഏറ്റവും കൂടുതൽ അപകടങ്ങൾ റിപ്പോർട്ട് ചെയ്തിരിക്കുന്നത്. ആകെ അപകടങ്ങളുടെ 17 ശതമാനവും ഈ രണ്ട് ദിവസങ്ങളിലായാണ് നടക്കുന്നത്. എന്നാൽ ഞായറാഴ്ച താരതമ്യേന സുരക്ഷിതമായ ദിവസമാണ്. ഉച്ചയ്ക്ക് 12 മുതൽ വൈകിട്ട് 6 വരെയുള്ള സമയത്താണ് ആകെ അപകടങ്ങളുടെ പകുതിയോളം (43 ശതമാനം) നടക്കുന്നത്. ഇതിൽ 36 മുതൽ 40 വയസ്സുവരെയുള്ള ഡ്രൈവർമാരാണ് അപകടങ്ങളിൽ കൂടുതൽ ഉൾപ്പെടുന്നത് എന്നതും ശ്രദ്ധേയമാണ്.

നോമ്പ് സമയത്തെ നിർജ്ജലീകരണം, രക്തത്തിലെ പഞ്ചസാരയുടെ അളവ് കുറയുന്നത് മൂലമുണ്ടാകുന്ന തളർച്ച, ഉറക്കക്കുറവ് എന്നിവ ഡ്രൈവർമാരുടെ ഏകാഗ്രതയെ ബാധിക്കുന്നുണ്ടെന്ന് റോഡ് സേഫ്റ്റി യുഎഇ മാനേജിങ് ഡയറക്ടർ തോമസ് എഡൽമാൻ പറഞ്ഞു. ഇത് പെട്ടെന്ന് തീരുമാനങ്ങൾ എടുക്കാനുള്ള കഴിവിനെ കുറയ്ക്കുകയും റോഡിൽ അക്ഷമയ്ക്കും അശ്രദ്ധയ്ക്കും കാരണമാവുകയും ചെയ്യുന്നു.

സുരക്ഷിതമായ യാത്രയ്ക്കായി ഡ്രൈവർമാർ ചില കാര്യങ്ങൾ പ്രത്യേകം ശ്രദ്ധിക്കണമെന്ന് അധികൃതർ ഓർമ്മിപ്പിക്കുന്നു. തിരക്ക് ഒഴിവാക്കാൻ യാത്രകൾ നേരത്തെ പ്ലാൻ ചെയ്യുകയും ഇഫ്താറിന് തൊട്ടുമുമ്പുള്ള സമയങ്ങളിൽ അമിതവേഗം ഒഴിവാക്കി ക്ഷമ പാലിക്കുകയും വേണം. സീറ്റ് ബെൽറ്റ് ധരിക്കുക, വല്ലാതെ ക്ഷീണമോ ഉറക്കമോ തോന്നിയാൽ വാഹനം സുരക്ഷിതമായ ഒരിടത്ത് ഒതുക്കി വിശ്രമിക്കുക, മുന്നിലുള്ള വാഹനവുമായി കൃത്യമായ അകലം പാലിക്കുക എന്നിവ അപകടങ്ങൾ കുറയ്ക്കാൻ സഹായിക്കും. പൊതുജനങ്ങളുടെ സുരക്ഷ മുൻനിർത്തിയാണ് തങ്ങളുടെ പക്കലുള്ള വിവരങ്ങൾ വിശകലനം ചെയ്ത് പുറത്തുവിടുന്നതെന്ന് അൽ വത്ബ ഇൻഷുറൻസ് സിഎഫ്ഒ മുരളീകൃഷ്ണൻ രാമൻ പറഞ്ഞു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

നാട്ടിലേക്കുള്ള പണം കൈമാറ്റത്തിന് ഇനി ക്യൂ വേണ്ട; വായ്പയും മിനിറ്റുകൾക്കകം! യുഎഇ പ്രവാസികൾക്ക് ഡിജിറ്റൽ വഴിയിൽ ആശ്വാസം

യുഎഇയിലെ പ്രവാസികൾക്ക് ഇനി ഡിജിറ്റൽ പ്ലാറ്റ്‌ഫോമിലൂടെ എളുപ്പത്തിൽ വായ്പകൾ ലഭ്യമാകുന്നു. പ്രമുഖ ഡിജിറ്റൽ വാലറ്റ് സേവനമായ e& money-ക്ക് Central Bank of the UAE ഫിനാൻസ് കമ്പനി ലൈസൻസ് അനുവദിച്ചു. ഇതോടെ ആപ്പ് വഴിയുള്ള ക്രെഡിറ്റ് സേവനങ്ങൾ ഔദ്യോഗികമായി ആരംഭിക്കാനൊരുങ്ങുകയാണ്. ഇതുവരെ പണം കൈമാറ്റം, ബിൽ പേയ്‌മെന്റ് തുടങ്ങിയ സേവനങ്ങൾക്കായി ഉപയോഗിച്ചിരുന്ന പ്ലാറ്റ്‌ഫോം ഇനി വായ്പകളും മറ്റ് ധനകാര്യ സേവനങ്ങളും നൽകുന്ന സമ്പൂർണ്ണ ഫിനാൻഷ്യൽ സ്ഥാപനമായി പ്രവർത്തിക്കും. രാജ്യത്തെ ഇരുപത് ലക്ഷത്തിലധികം ഉപയോക്താക്കൾക്ക് ആപ്പ് വഴിയായി വായ്പയ്ക്കും ക്രെഡിറ്റ് സൗകര്യങ്ങൾക്കും അപേക്ഷിക്കാനാകും.

ശമ്പളത്തിന് മുൻകൂർ ലഭ്യതയും തവണ സംവിധാനവും

ഷോപ്പിംഗ് ഇടപാടുകൾ തവണകളായി അടയ്ക്കുന്നതിനുള്ള ‘ബൈ നൗ പേ ലേറ്റർ’ സൗകര്യം, ശമ്പളത്തിന്റെ ഒരു ഭാഗം മുൻകൂട്ടി ലഭിക്കുന്ന സംവിധാനം, ചെറിയ തുകകളുടെ ക്ഷണിക വായ്പകൾ തുടങ്ങിയ സേവനങ്ങൾ ആപ്പിലൂടെ ലഭ്യമാകും. മാസാവസാന സാമ്പത്തിക ബുദ്ധിമുട്ടുകൾ മറികടക്കാൻ ഇത് സഹായകരമാകും.

കുറഞ്ഞ വരുമാനക്കാർക്കും ആശ്വാസം

യുഎഇയിൽ പുതുതായി എത്തിയവർക്കും കുറഞ്ഞ ശമ്പളമുള്ള തൊഴിലാളികൾക്കും ബാങ്കുകളിൽ ക്രെഡിറ്റ് ഹിസ്റ്ററി ഇല്ലാത്തതിനാൽ വായ്പ ലഭിക്കുന്നത് പലപ്പോഴും പ്രയാസകരമാണ്. ഉയർന്ന ശമ്പളപരിധി, കർശന രേഖകൾ തുടങ്ങിയ മാനദണ്ഡങ്ങൾ പല ബാങ്കുകളും ആവശ്യപ്പെടാറുണ്ട്. എന്നാൽ ആപ്പിലെ ഇടപാട് ചരിത്രം അടിസ്ഥാനമാക്കി ക്രെഡിറ്റ് യോഗ്യത വിലയിരുത്തി വായ്പ അനുവദിക്കാനാണ് കമ്പനി ലക്ഷ്യമിടുന്നത്.

സെൻട്രൽ ബാങ്കിന്റെ നിയന്ത്രണത്തിൽ

എല്ലാ വായ്പാ സേവനങ്ങളും യുഎഇ സെൻട്രൽ ബാങ്കിന്റെ നിയമങ്ങൾക്കും നിയന്ത്രണങ്ങൾക്കും വിധേയമായിരിക്കും. ഡിജിറ്റൽ ഫിനാൻഷ്യൽ സേവന മേഖലയിൽ വലിയ മാറ്റത്തിന് വഴിയൊരുക്കുന്ന നീക്കമായാണ് ഈ ലൈസൻസ് വിലയിരുത്തപ്പെടുന്നത്. പ്രവാസികൾക്ക് വേഗത്തിൽ, ലളിതമായി ധനസഹായം ലഭ്യമാക്കുന്നതിലൂടെ ഡിജിറ്റൽ ബാങ്കിംഗ് രംഗത്ത് പുതിയ അധ്യായം തുറക്കുകയാണ് ഈ തീരുമാനം.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt