വൃത്തിയാക്കലിനിടെ ചവറ്റുകുട്ടയിൽ പോയത് പത്ത് ലക്ഷത്തിലേറെ വിലമതിക്കുന്ന സ്വർണം; 3 ദിവസത്തിനകം കണ്ടെത്തി തിരികെ നൽകി ദുബായ് പോലീസ്

ദുബായിൽ സന്ദർശനത്തിനെത്തിയ മുൻ പ്രവാസി കുടുംബത്തിന് അബദ്ധത്തിൽ നഷ്ടമായ സ്വർണം മൂന്ന് ദിവസത്തിനുള്ളിൽ കണ്ടെത്തി ഉടമസ്ഥർക്ക് കൈമാറി ദുബായ് പോലീസ്. ദുബായ് പോലീസിന്റെ കാര്യക്ഷമതയ്ക്കും സത്യസന്ധതയ്ക്കും വീണ്ടും തെളിവാകുകയാണ് ഈ സംഭവം. 23 വർഷത്തോളം യുഎഇയിൽ താമസിച്ച ശേഷം 2021-ൽ ഇന്ത്യയിലേക്ക് മടങ്ങിയ കാമിനി കണ്ണൻ, ഒരു വിവാഹ ചടങ്ങിൽ പങ്കെടുക്കാനാണ് അടുത്തിടെ ദുബായിൽ എത്തിയത്. ഈ സമയത്താണ് കുടുംബത്തിന് വിലപിടിപ്പുള്ള സ്വർണം നഷ്ടമായത്. 8 ഗ്രാം വീതമുള്ള നാല് 22 കാരറ്റ് സ്വർണ്ണനാണയങ്ങളും 50 ഗ്രാം തൂക്കമുള്ള 24 കാരറ്റ് സ്വർണ്ണക്കട്ടിയുമാണ് നഷ്ടപ്പെട്ടത്. ഏകദേശം 50,000 ദിർഹം (11 ലക്ഷത്തിലധികം ഇന്ത്യൻ രൂപ) മൂല്യമുള്ള സ്വർണമാണ് നഷ്ടമായത്. പഴയ ബാഗിൽ നിന്നും സ്വർണം മാറ്റി മറ്റൊരു പൗച്ചിലാക്കി ഡൈനിംഗ് ടേബിളിൽ വെച്ചിരുന്നതായി കുടുംബം പറഞ്ഞു. വീട് വൃത്തിയാക്കുന്നതിനിടെ, മകൻ അബദ്ധത്തിൽ ഈ പൗച്ച് ചവറ്റുകുട്ടയിൽ എറിയുകയായിരുന്നു. ഫെബ്രുവരി ഒന്നിനാണ് സ്വർണം നഷ്ടപ്പെട്ട വിവരം കുടുംബം മനസിലാക്കിയത്. ചവറ്റുകുട്ടയിൽ പോയ സാധനം ഇനി തിരികെ ലഭിക്കില്ലെന്ന് കരുതി പോലീസിൽ പരാതി പോലും നൽകിയിരുന്നില്ല.

എന്നാൽ ഫെബ്രുവരി നാലിന് അപ്രതീക്ഷിതമായി ദുബായ് പോലീസിൽ നിന്ന് കുടുംബത്തെ തേടി വിളിയെത്തി. മാലിന്യം ശേഖരിക്കുന്ന തൊഴിലാളിക്ക് ചവറ്റുകുട്ടയിൽ നിന്ന് സ്വർണം ലഭിക്കുകയും, അദ്ദേഹം അത് ഗോൾഡ് സൂക്കിൽ എത്തിക്കുകയുമായിരുന്നു. അവിടെ നടത്തിയ പരിശോധനയിൽ, മാലിന്യത്തിനിടയിൽ നിന്നാണ് സ്വർണം ലഭിച്ചതെന്ന് തൊഴിലാളി പോലീസിനോട് വെളിപ്പെടുത്തി.
ദുബായിലെ ആധുനിക മാലിന്യ സംസ്കരണ സംവിധാനത്തിന്റെ സഹായത്തോടെ, ഏത് ബാഗ് ഏത് കെട്ടിടത്തിൽ നിന്നാണ് വന്നതെന്ന് കണ്ടെത്താൻ പോലീസിന് സാധിച്ചു. തുടർന്ന് അതേ ദിവസം വൈകുന്നേരം നായിഫ് പോലീസ് സ്റ്റേഷനിൽ എത്തിയ കുടുംബം സ്വർണവുമായി ബന്ധപ്പെട്ട രേഖകളും ചിത്രങ്ങളും ഹാജരാക്കി. പരിശോധനകൾ പൂർത്തിയാക്കിയ ശേഷം, മിനിറ്റുകൾക്കുള്ളിൽ തന്നെ വിലപിടിപ്പുള്ള സ്വർണം പോലീസ് കുടുംബത്തിന് കൈമാറി. നഷ്ടപ്പെട്ട വസ്തുക്കൾ കണ്ടെത്തുന്നതിൽ ദുബായ് പോലീസ് പുലർത്തുന്ന കൃത്യതയും വിശ്വാസ്യതയും വീണ്ടും പൊതുജന ശ്രദ്ധയിൽ കൊണ്ടുവന്ന സംഭവമാണിത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

യുഎഇയിൽ മെട്രോയിൽ കരുതിയിരുന്നോ! നിയമം തെറ്റിച്ചാൽ വൻ പിഴ; പരിശോധന കർശനമാക്കി ആർടിഎ

ദുബായ്: ദുബായ് മെട്രോയിലെ യാത്ര കൂടുതൽ സുരക്ഷിതവും അച്ചടക്കമുള്ളതുമാക്കാൻ നിയമലംഘകർക്കെതിരെ കടുത്ത നടപടികളുമായി റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA). സ്റ്റേഷനുകളിലും ട്രെയിനുകളിലും സുരക്ഷ ഉറപ്പാക്കുന്നതിന്റെ ഭാഗമായി നിയമങ്ങൾ ലംഘിക്കുന്നവരിൽ നിന്ന് 100 ദിർഹം മുതൽ 2,000 ദിർഹം വരെ പിഴ ഈടാക്കാനാണ് തീരുമാനം. യാത്രാ മര്യാദകൾ പാലിക്കാത്തവർക്കെതിരെ യാതൊരു വിട്ടുവീഴ്ചയും ഉണ്ടാകില്ലെന്ന് അധികൃതർ വ്യക്തമാക്കി.

മെട്രോ ക്യാബിനുകളിൽ ഭക്ഷണം കഴിക്കുകയോ പാനീയങ്ങൾ കുടിക്കുകയോ ചെയ്യുന്നത് പിഴ ലഭിക്കാവുന്ന കുറ്റമാണ്. കൂടാതെ, സ്ത്രീകൾക്കും കുട്ടികൾക്കുമായുള്ള ക്യാബിനുകളിൽ പുരുഷന്മാർ പ്രവേശിക്കുകയോ ഗോൾഡ് ക്ലാസ് ടിക്കറ്റില്ലാതെ ആ ക്യാബിനിൽ ഇരിക്കുകയോ ചെയ്യുന്നതും ശിക്ഷാർഹമാണ്. ടിക്കറ്റില്ലാതെ യാത്ര ചെയ്യുക, ട്രെയിനിലും സ്റ്റേഷനിലും പുകവലിക്കുക, പൊതുമുതൽ നശിപ്പിക്കുക എന്നിവ ഗുരുതരമായ നിയമലംഘനങ്ങളുടെ പരിധിയിൽ വരും.

അടിയന്തര സാഹചര്യങ്ങളിലല്ലാതെ എമർജൻസി സംവിധാനങ്ങളിൽ അനാവശ്യമായി ഇടപെടുന്നവർക്ക് 2,000 ദിർഹം വരെയാണ് പിഴ ഒടുക്കേണ്ടി വരിക. കുറ്റങ്ങൾ ആവർത്തിക്കുന്ന സാഹചര്യമുണ്ടായാൽ കർശനമായ മറ്റ് നിയമനടപടികളും നേരിടേണ്ടി വരും. യാത്രക്കാരെ ബുദ്ധിമുട്ടിക്കാനല്ല, മറിച്ച് ലോകോത്തര നിലവാരമുള്ള ദുബായ് മെട്രോയുടെ സൗകര്യങ്ങൾ സംരക്ഷിക്കാനും യാത്രക്കാർക്ക് മികച്ച അനുഭവം ഉറപ്പാക്കാനുമാണ് ഈ നടപടികളെന്ന് ആർടിഎ അറിയിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

പ്രവാസികൾക്ക് ആശ്വാസം: കേരളത്തിലേക്കുള്ള വിമാന സർവീസുകൾ കൂട്ടാൻ ഇന്ത്യ-യുഎഇ ധാരണ

യുഎഇയിൽ നിന്നും കേരളത്തിലെ വിവിധ നഗരങ്ങളിലേക്ക് കൂടുതൽ വിമാന സർവീസുകൾ ആരംഭിക്കുന്നതിനുള്ള നിർണായക ചർച്ചകൾ പൂർത്തിയായി. ഹൈദരാബാദിൽ നടന്ന ‘വിങ്സ് ഓഫ് ഇന്ത്യ 2026’ സമ്മേളനത്തിനിടെ കേന്ദ്ര വ്യോമയാന മന്ത്രി കെ. റാംമോഹൻ നായിഡുവും യുഎഇ മന്ത്രി അബ്ദുല്ല ബിൻ തൂഖ് അൽ മർറിയുമാണ് പ്രവാസികൾക്ക് പ്രതീക്ഷ നൽകുന്ന ഈ കൂടിക്കാഴ്ച നടത്തിയത്.

നിലവിലുള്ള വിമാന സീറ്റ് ക്വോട്ട കരാർ പൂർണ്ണമായും വിനിയോഗിക്കപ്പെട്ട സാഹചര്യത്തിൽ, യാത്രക്കാരുടെ വർധനവ് കണക്കിലെടുത്ത് കരാർ പുതുക്കാൻ ഇരുരാജ്യങ്ങളും തീരുമാനിച്ചു. ഇത് നിലവിൽ വരുന്നതോടെ കണ്ണൂർ, കോഴിക്കോട്, തിരുവനന്തപുരം വിമാനത്താവളങ്ങളിലേക്ക് കൂടുതൽ വിമാനങ്ങൾ എത്തും. 2014-ന് ശേഷം കരാർ പുതുക്കാത്തത് സർവീസുകളുടെ എണ്ണം വർധിപ്പിക്കുന്നതിന് തടസ്സമായിരുന്നു. പുതിയ കരാർ പ്രാബല്യത്തിൽ വരുന്നതോടെ കൂടുതൽ സീറ്റുകൾ ലഭ്യമാകുകയും വിമാന കമ്പനികൾ തമ്മിലുള്ള മത്സരം കാരണം ടിക്കറ്റ് നിരക്ക് കുറയാൻ സാധ്യത തെളിയുകയും ചെയ്യും.

കൊച്ചി ആസ്ഥാനമായുള്ള അൽ ഹിന്ദ് എയർ ഉൾപ്പെടെയുള്ള പുതിയ വിമാന കമ്പനികൾ ഈ വർഷം പ്രവർത്തനം തുടങ്ങുന്നതും പ്രവാസികൾക്ക് വലിയ ഗുണകരമാകും. ഉഭയകക്ഷി വ്യാപാര ബന്ധം മെച്ചപ്പെടുത്തുന്നതിന്റെ ഭാഗമായി വ്യോമയാന മേഖലയിൽ വലിയ മാറ്റങ്ങളാണ് വരാനിരിക്കുന്നത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt