ഖത്തറിൽ ഇനി NOC ഇല്ലാതെ ജോലി മാറാം: അറിയേണ്ട കാര്യങ്ങൾ

ഖത്തറിലെ തൊഴിൽ നിയമങ്ങളിൽ നടപ്പാക്കിയ പരിഷ്‌കാരങ്ങളുടെ ഭാഗമായി, സ്വകാര്യ മേഖലയിൽ ജോലി ചെയ്യുന്ന തൊഴിലാളികൾക്ക് നിലവിലെ തൊഴിലുടമയുടെ നോ ഒബ്ജക്ഷൻ സർട്ടിഫിക്കറ്റ് (NOC) ഇല്ലാതെയും ജോലി മാറാൻ കഴിയുന്ന സാഹചര്യം നിലവിലുണ്ടെന്ന് അധികൃതർ വ്യക്തമാക്കി. 2020ലെ ഡിക്രി ലോ നമ്പർ 18 ഉൾപ്പെടെയുള്ള നിയമഭേദഗതികളിലൂടെയാണ് ഈ സൗകര്യം പ്രാബല്യത്തിൽ വന്നത്. എന്നാൽ NOC ഒഴിവാക്കിയിട്ടുണ്ടെങ്കിലും, തൊഴിൽ മന്ത്രാലയം (ADLSA / MADLSA) നിർദേശിച്ച ഔദ്യോഗിക നടപടിക്രമങ്ങളും നോട്ടീസ് കാലാവധിയും കൃത്യമായി പാലിക്കേണ്ടത് നിർബന്ധമാണെന്ന് അധികൃതർ ഓർമ്മിപ്പിച്ചു. നിലവിലെ നിയമ വ്യവസ്ഥകൾ പ്രകാരം, സ്വകാര്യ മേഖലയിൽ ജോലി ചെയ്യുന്ന ഭൂരിഭാഗം ജീവനക്കാർക്കും പുതിയ തൊഴിലുടമയിലേക്ക് നിയമപരമായി മാറാൻ അവകാശമുണ്ട്. എന്നാൽ സേവനകാലാവധിയെ ആശ്രയിച്ച് നോട്ടീസ് കാലാവധി നിർണ്ണയിച്ചിട്ടുണ്ട്. രണ്ട് വർഷം വരെ സേവനം പൂർത്തിയാക്കിയവർക്ക് ഒരു മാസവും, രണ്ട് വർഷത്തിലധികം സേവനം ചെയ്തവർക്ക് രണ്ട് മാസവും നോട്ടീസ് നൽകണം. പ്രൊബേഷൻ കാലയളവിലായാലും സാധാരണയായി കുറഞ്ഞത് ഒരു മാസത്തെ നോട്ടീസ് കാലാവധി ബാധകമാണെന്നാണ് ചട്ടം.

NOC ഇല്ലാതെ ജോലി മാറുന്നതിനുള്ള നടപടിക്രമങ്ങൾ ഘട്ടംഘട്ടമായാണ് നടപ്പാക്കേണ്ടത്. ആദ്യം, ADLSAയുടെ ഓൺലൈൻ സംവിധാനത്തിലൂടെ നിലവിലെ തൊഴിലുടമയെ ജോലി മാറ്റാനുള്ള ഉദ്ദേശ്യം അറിയിക്കണം. ഇതോടെയാണ് നോട്ടീസ് കാലാവധി ആരംഭിക്കുക. തുടർന്ന്, ജോലി മാറ്റത്തിനായുള്ള അപേക്ഷാ ഫോം, നിലവിലെ തൊഴിൽ കരാർ അല്ലെങ്കിൽ നിയമാനുസൃത ജോബ് ഓഫർ, പുതിയ തൊഴിലുടമ നൽകുന്ന അറബിക് ഭാഷയിലെ ജോബ് ഓഫർ ലെറ്റർ തുടങ്ങിയ രേഖകൾ സമർപ്പിക്കണം. അപേക്ഷ അംഗീകരിച്ചാൽ ജീവനക്കാരനും പുതിയ തൊഴിലുടമയ്ക്കും മന്ത്രാലയത്തിലൂടെ SMS സ്ഥിരീകരണം ലഭിക്കും.
അടുത്ത ഘട്ടത്തിൽ, പുതിയ തൊഴിലുടമ ADLSAയുടെ ഡിജിറ്റൽ സംവിധാനത്തിൽ ഇലക്ട്രോണിക് തൊഴിൽ കരാർ തയ്യാറാക്കി ഒപ്പിട്ട ശേഷം അപ്‌ലോഡ് ചെയ്യണം. കരാർ അംഗീകരിച്ചതിന് പിന്നാലെ ആഭ്യന്തര മന്ത്രാലയത്തിലൂടെ പുതിയ ഖത്തർ ഐഡി (QID)യും ഹെൽത്ത് കാർഡും അപേക്ഷിക്കാം. നോട്ടീസ് കാലാവധി പൂർത്തിയാക്കി പുതിയ QID ലഭിച്ചതിന് ശേഷം ജീവനക്കാരന് പുതിയ ജോലിയിൽ പ്രവേശിക്കാം.

അതേസമയം, ശമ്പളം നൽകാതിരിക്കുക, കരാർ ലംഘിക്കുക തുടങ്ങിയ നിയമവിരുദ്ധ നടപടികൾ നിലവിലെ തൊഴിലുടമ നടത്തിയിട്ടുണ്ടെങ്കിൽ, ADLSAയിൽ പരാതി നൽകുന്നതിലൂടെ നോട്ടീസ് കാലാവധി പാലിക്കാതെയും ജോലി മാറാൻ അവസരം ലഭിക്കാമെന്ന് മന്ത്രാലയം വ്യക്തമാക്കി. പ്രായോഗികമായി, നിയമപരമായി NOC ആവശ്യമില്ലെങ്കിലും, ചില കമ്പനികൾ നടപടിക്രമങ്ങൾ വേഗത്തിലാക്കുന്നതിനായി ഇപ്പോഴും NOC ആവശ്യപ്പെടാറുണ്ടെന്നും, NOC ഇല്ലാത്ത സാഹചര്യത്തിൽ ജോലി മാറ്റത്തിന് കുറച്ച് ആഴ്ചകളോ മാസങ്ങളോ വേണ്ടി വരാനിടയുണ്ടെന്നും അധികൃതർ ചൂണ്ടിക്കാട്ടി. രാജിക്കത്തുകളും അപേക്ഷാ രസീതുകളും സൂക്ഷിക്കണമെന്നും നിർദേശമുണ്ട്. കൂടുതൽ വിവരങ്ങൾക്കും സഹായത്തിനുമായി ADLSA ഹെൽപ്‌ലൈൻ 16008 എന്ന നമ്പറിൽ ബന്ധപ്പെടാമെന്നും അറിയിച്ചു.ഖത്തറിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Cy3g5xfb5OSLA1HSZk7JwK?mode=wwt

ഖത്തറിൽ വിമാന സർവീസുകളും യാത്രക്കാരും കൂടുന്നു

നവംബർ മാസത്തിൽ ഖത്തറിന്റെ വ്യോമയാന മേഖല സ്ഥിരതയുള്ള വളർച്ച തുടരുന്നതായി സിവിൽ ഏവിയേഷൻ അതോറിറ്റിയുടെ പുതിയ കണക്കുകൾ വ്യക്തമാക്കുന്നു. വിമാന സർവീസുകളുടെ എണ്ണം, യാത്രക്കാരുടെ ഒഴുക്ക്, ചരക്കുനീക്കം എന്നിവയിൽ ശ്രദ്ധേയമായ വർധനയാണ് രേഖപ്പെടുത്തിയിരിക്കുന്നത്. ഇതിലൂടെ ആഗോള ട്രാൻസിറ്റും ടൂറിസവും കേന്ദ്രമെന്ന നിലയിൽ ഖത്തറിന്റെ സ്ഥാനം കൂടുതൽ ശക്തമാകുന്നുവെന്നാണ് വിലയിരുത്തൽ.

അതോറിറ്റിയുടെ പ്രാഥമിക വിവരങ്ങൾ പ്രകാരം, നവംബർ മാസത്തിൽ നടത്തിയ വിമാന സർവീസുകൾ മുൻവർഷത്തെ അപേക്ഷിച്ച് 6.2 ശതമാനം വർധിച്ച് 24,020 ആയി. 2024 നവംബറിൽ ഇത് 22,610 ആയിരുന്നു. യാത്രക്കാരുടെ എണ്ണത്തിലും വൻ മുന്നേറ്റമാണ് ഉണ്ടായത്. 8.1 ശതമാനം വർധനയോടെ 2025 നവംബറിൽ 45.75 ലക്ഷം പേർ വിമാനയാത്ര നടത്തിയപ്പോൾ, മുൻവർഷം ഇത് 42.31 ലക്ഷം ആയിരുന്നു. എയർ കാർഗോയും മെയിൽ ഗതാഗതവും കൂടി 3.9 ശതമാനം ഉയർന്ന് 2,35,355 ടണ്ണിലെത്തി.

ഈ നേട്ടങ്ങൾ ആഗോളവും പ്രാദേശികവുമായ വ്യോമയാന വളർച്ചയുടെ പ്രവണതകളുമായി ഒത്തുചേരുന്നതാണെന്ന് അന്താരാഷ്ട്ര സിവിൽ ഏവിയേഷൻ സംഘടനയിലെ ഗ്രൗണ്ട് ഇൻസ്ട്രക്ടർ ഖമീസ് അബ്ദുല്ല അൽഖലീഫി പറഞ്ഞു. ആഗോളതലത്തിൽ യാത്രക്കാരുടെ ആവശ്യകത എട്ട് ശതമാനത്തിലധികം ഉയർന്നിട്ടുണ്ടെങ്കിലും, ഫ്ലൈറ്റ് കപ്പാസിറ്റിയിലെ വർധന ഏകദേശം 5.7 ശതമാനത്തിലൊതുങ്ങിയതായും അദ്ദേഹം വ്യക്തമാക്കി.

എയർലൈൻസുകൾ കൂടുതൽ സീറ്റുകൾ കാര്യക്ഷമമായി ഉപയോഗിക്കുന്നതായും കണക്കുകൾ സൂചിപ്പിക്കുന്നു. 83.4 ശതമാനം ലോഡ് ഫാക്ടർ കൈവരിച്ചത് പ്രവർത്തന കാര്യക്ഷമതയും വരുമാന വർധനയും സൂചിപ്പിക്കുന്നതാണെന്നും, ഇതിലൂടെ യൂണിറ്റ് ചെലവ് കുറയ്ക്കാൻ കഴിയുമെന്നും അൽഖലീഫി വിശദീകരിച്ചു. സമീപകാല മാസങ്ങളുമായി താരതമ്യപ്പെടുത്തുമ്പോൾ നവംബർ മാസത്തെ പ്രകടനം ഏറ്റവും ശക്തമായതാണെന്നും അദ്ദേഹം കൂട്ടിച്ചേർത്തു.

യാത്രക്കാരുടെ ഉയർന്ന ആവശ്യം, റെക്കോർഡ് ലോഡ് ഫാക്ടർ, നിയന്ത്രിതമായെങ്കിലും സ്ഥിരതയുള്ള കപ്പാസിറ്റി വർധന എന്നീ ഘടകങ്ങളാണ് ദോഹയുടെ സൂപ്പർ-ഹബ് സ്ഥാനം കൂടുതൽ ശക്തമാക്കുന്നതെന്ന് അദ്ദേഹം പറഞ്ഞു. ഖത്തർ എയർവേസിന്റെ നെറ്റ്‌വർക്ക് വിപുലീകരണവും ആഫ്രിക്കയും ഏഷ്യയും കേന്ദ്രീകരിച്ചുള്ള കോഡ്‌ഷെയർ പങ്കാളിത്തങ്ങളും രാജ്യത്തിന്റെ അന്താരാഷ്ട്ര ബന്ധം വിപുലമാക്കിയതായും വിലയിരുത്തുന്നു.

വ്യോമയാന മേഖല ഖത്തറിന്റെ സമ്പദ്‌വ്യവസ്ഥയിൽ നിർണായക പങ്കാണ് വഹിക്കുന്നതെന്ന് അൽഖലീഫി വ്യക്തമാക്കി. എയർലൈൻ വരുമാനം, വിമാനത്താവള സേവനങ്ങൾ, ചരക്കുനീക്കം എന്നിവ വഴി നേരിട്ടുള്ള നേട്ടങ്ങൾ ലഭിക്കുന്നതോടൊപ്പം, ടൂറിസം, ഹോട്ടൽ മേഖല, റസ്റ്റോറന്റുകൾ, ഷോപ്പിംഗ് മാളുകൾ, സാംസ്കാരിക കേന്ദ്രങ്ങൾ, മീറ്റിംഗ്–ഇവന്റ് മേഖലകൾ എന്നിവയ്ക്കും യാത്രക്കാരുടെ വർധന ഗുണകരമാകുന്നു. തൊഴിൽ സൃഷ്ടിയും അനുബന്ധ വരുമാനവും പരോക്ഷ നേട്ടങ്ങളായി മാറുന്നു.

കിഴക്കും പടിഞ്ഞാറും ബന്ധിപ്പിക്കുന്ന ആഗോള കേന്ദ്രമായി ഖത്തർ മുന്നേറുകയാണെന്നും, ഇത് വിദേശ നിക്ഷേപവും വ്യാപാരവും ആകർഷിക്കുന്നതിൽ നിർണായകമാണെന്നും അദ്ദേഹം പറഞ്ഞു. പുതിയ കണക്കുകൾ ഖത്തറിന്റെ ദീർഘകാല ഗതാഗത–സാമ്പത്തിക വൈവിധ്യവത്കരണ ലക്ഷ്യങ്ങളുമായി പൂർണമായും പൊരുത്തപ്പെടുന്നതാണെന്നും, ഖത്തർ നാഷണൽ വിഷൻ 2030-ലേക്കുള്ള മുന്നേറ്റത്തിന് ഇത് ശക്തമായ പിന്തുണ നൽകുന്നതായും വിലയിരുത്തൽ.ഖത്തറിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Cy3g5xfb5OSLA1HSZk7JwK?mode=wwt